Sol jyly tabysty bolǵan týryna qaramastan onyń bedeli tek on jyl buryn dáýirlegen ánderimen ǵana tikeleı baılanysty boldy. 1960-shy jyldardyń sońynda Dılan Výdstoktaǵy bas tartýynan keıin margınaldanǵan fıgýraǵa aınaldy. Onyń sol jerden tapqan ishki turaqtylyǵy 1969 jyly jazylǵan «Nashville Skyline-dan» 1974 jyldaǵy «Planet Waves-ǵa» deıingi sátsiz ári shyǵarmashylyq fokýssyz albomdardyń jaryqqa shyǵýyn tezdetti. Endi osynyń báriniń ózgeretin ýaqyty týǵan edi.
«Blood on the Tracks» shedevrin jasaý da Dılannyń uzaq mansaby sııaqty shytyrmanǵa toly boldy. Albomnyń nusqasy Nıý-Iorktegi stýdııada tórt kúnde aıaqtaldy, Dılannyń shydamsyz shyǵarmashylyq qarqyny onyń ánderin naqtylaý úshin jınalǵan topty shatystyrdy. Gıtarıst Erık Vaısberg keıinirek bul sátterdi eske túsirgende «Men Bobtyń án jazý barysyna asa nazar aýdarmaǵany ári qyzyqpaǵandyǵy týraly anyq bildim. Ol kóp sharap ishti, ol sál uqypsyz boldy, biraq ol anyq qatelikterdi túzetpeı, kelesi ánge aýysyp alǵa jyljýdy talap etti» deıdi. Sessııanyń ekinshi kúninde alty mýzykanttyń bireýi ǵana qaldy.
Albomnyń shyǵarylymy jeltoqsan aıynyń sońyna josparlanǵan edi. Albom muqabasy basyp shyǵaryldy, jarnamalyq naýqan aıaqtalyp, tańdaýly radıostansııalarǵa synaq tırajdary da taratylyp qoıdy. Kóńili tolmaǵan Dılan Rojdestvony óziniń aǵasy ári senimdi dosy Devıd Sımmermanmen ótkizdi. Albomdy tyńdaǵan Devıd ánderdiń tym ótkir jáne qarapaıym halyqtyń kóńilinen shyqpaıtynyn aıtyp, sol sebepti onyń kommersııalyq turǵyda sátsizdikke ushyraıtynyn jetkizdi. Boıyn qorqynysh bılegen Dılan óziniń trıýmfaldy qaıta oralýyn shegerip, sońǵy mınýtta albomnyń shyǵarylmaýyn talap etedi.
Sodan keıin on ánniń beseýi Mınneapolıstegi Sound 80 stýdııasynda Rojdestvodan keıingi aptada eki kúnde shuǵyl arada jergilikti mýzykanttardan quralǵan toppen qaıta jazylǵan. Qaıta óńdelgen albom 1975 jyldyń 20 qańtarynda tez arada jaryq kórdi. Osyndaı túsiniksiz ári qıyn mán-jaılardyń ortasynda keremet óner týyndysy dúnıege keldi.
Blood on the Tracks jaryqqa shyqqan kúnnen bastap, meniń de ómirimniń saýndtregine aınaldy. Bul án de Van Morrısonnyń «Astral Weeks» pen Marvın Gaııannyń «What’s Going On» jáne Dılannyń 1966 jyly shyqqan «Blonde on Blonde» sııaqty klassıkalyq ánder qataryna jaıǵasty. 1990 jyldardyń ortasynda «Blood on the Tracks: The New York Sessions» degen atpen SD jaryq kórdi, bul taspanyń beıresmı nusqasy resmı jaryq kórgennen soń kóp uzamaı shyqty. Bunyń tizimine burynǵy, spartandyq «If You See Her, Say Hello and Idiot Wind» sııaqty ánderi kirdi. Ýaqyt óte kele men resmı nusqalarǵa qaraǵanda beıresmılerin óte jaqsy kórdim, óıtkeni shıki ári áli aıaqtalmaǵan kúıde olar sezimtal jáne ashyq estiledi.
Shon O'Hagan
Aýdarǵan Mádına JÁLELQYZY
«Egemen Qazaqstan»
