Qazaqstan Respýblıkasynyń Aýyr atletıka federasııasy baspasóz qyzmetinen habarlaǵandaı, saıystyń alǵashqy kúni aýyr atletter Farhad Harkı men Arlı Chonteı tórtinshi oryn ıelengen. Igor Son bolsa Qazaqstan quramasynyń qorjynyna kúmis medal salǵan.
Saıystyń keshegi qorytyndysy boıynsha, Nıjat Rahımov (73 kelige deıingi salmaqta) qola medal ıelengen edi.
Sonymen birge, qos saıystyń birinen oryn alǵany úshin beriletin «kishi» medalǵa Aıdar Qazov (81 kelige deıingi salmaqta, serpe kóterý), Karına Gorıcheva (64 kelige deıinshi salmaqta, serpe kóterýde) ıe boldy.
Sonymen birge, 89 kelige deıingi salmaqta óner kórsetken Rústem Sybaı qos saıystyń qorytyndysy boıynsha 8-shi orynnan kórindi.
Týrnırdiń sońǵy kúninde jarys alańyna 2018 jylǵy álem chempıonatynyń kúmis júldegeri atanǵan - Raýshan Meshithanova shyqty. Raýshan 87 kelige deıingi salmaq sanatynda óner kórsetip, qos saıysta 215 kelini baǵyndyrdy. Osylaısha, Qazaqstan quramasynyń qorjyny taǵy bir kúmis medalmen tolyqty. Aıta keterligi, Raýshan julqa kóterýde (100 kelini kóterip) birinshi orynnan kórinip, serpe kóterýde (115 kelini) ekinshi oryndy ıelendi.
Búgin jaraqat alýyna baılanysty lısenzııalyq týrnırdiń pomostyna Ilıa Ilın shyǵa almaı qalǵan edi. Bapkerler quramy aýyr atletke saıysqa qatysýǵa ruqsat bermegen.
«Biz Ilıanyń aýyr jaraqat alýyn boldyrmaý kerek dep sheshtik. Em júrgizilip, densaýlyǵyn qalpyna keltirý prosesi júrgizilip jatqanyna qaramastan, jattyǵý kezinde omytrtqasy qaıta syr berdi. Nátıjege qol jetkizýge barynsha tyrysýǵa bolar edi, biraq ondaı jaǵdaıda beldi úzip alý qaýpi bar-tyn. Jattyqtyrýshylar shtaby ony pomostqa jibermeý týraly sheshim qabyldady, óıtkeni aldaǵy ýaqytta basymdyqqa ıe básekeli saıystar bar», - dedi aýyr atletıkadan QR Ulttyq quramasynyń bas bapkeri Iýrıı Melnıkov.
