Aıtýly jarysty biz Almatyda ulttyq ónerimizdi keńinen nasıhattaý jáne jergilikti turǵyndardy salaýatty ómir saltyna yntalandyrý maqsatynda ótkizip otyrmyz. Qazirgi kezde qazaq kúresi kúlli Qazaqstanda qaryshtap damyp kele jatqany barshaǵa málim. Álemdik jáne qurlyqtyq dodalarda úzdiksiz uıymdastyrylýda. Qazaq kúresinde tórttaǵan nemese aýyrtý jáne qylqyndyrý tásilderi joq. Bul – tik turyp kúresetin naǵyz bekzada óner, – deıdi respýblıkalyq dárejedegi tóreshi Talǵat Qonaev.
Qala birinshiliginiń qorytyndysy boıynsha Dımash pen Aıdar Qalmuratovtar, Arlan Qýanyshuly, Álı Ralıt, Álıhan Ilııas, Qýanysh Kemekbaı, Mıras Kalıekbarov, Daıyr Maqulbek, Nurjol Myrzahmetov jáne taǵy basqa balǵyn balýandar qarsylylas shaq keltirmeı, jeńis tuǵyrynyń eń bıik satysyna kóterildi.
Almaty qalasynyń birinshiligi aıaqtalǵan betti 2018 jyldyń qorytyndysy shyǵaryldy. Kadetter arasyndaǵy eń úzdik balýan Mıras Shakerov, jasóspirimder arasyndaǵy eń úzdik balýan Nursultan Núrseıitov, jastar arasyndaǵy eń úzdik balýan Erasyl Janataev, eń úzdik bapkerler Ǵanı Keldiqulov pen Ǵazız Turyskulov, eń úzdik tóreshi Bolatbek Ibragımov jáne de qazaq kúresin órkendetýge atsalysyp júrgen basqa da mamandar men azamattar dıplomdar jáne túrli syılyqtarmen marapattaldy.
Ǵalym SÚLEIMEN,
«Egemen Qazaqstan»
ALMATY
