Olympic.kz saıtyna suhbat bergen Artem Zaharov Azııa chempıonatyn qorytyndylap, olımpıadalyq reıtıngtegi jaǵdaıdy túsindirdi.
- Azııa chempıonatynan soń dereý Avstralııaǵa kettim. Tour Down Under velojarysynyń birinshi kezeńinde synǵa túsip úlgerdim. Qurlyq chempıonaty jaman ótken joq. Ásirese, araǵa birneshe jyl salyp komandalyq synda úzdik úshtikke engenimiz qýantady. Toptyq syndaǵy ekinshi oryn da kóńilimnen shyǵady. Birinshi oryn alǵym kelgenin jasyrmaımyn.
Degenmen, men kútpegen jaıttar da boldy. Omnıýmda júldesiz qalǵanym bıylǵy chempıonattaǵy basty ókinishim shyǵar. Bul synda jeńiske jeterim sózsiz edi, alaıda, ózge el sportshylary maǵan jol bermedi. Shabýyldyń barlyǵy meni toqtatýǵa baǵyttaldy.
Olımpıadalyq reıtıngte bári de jaqsy. Álem kýboginiń sońǵy, altynshy kezeńinde jáne álem chempıonatynda úzdikter qataryna enýge tyrysý kerek. Reıtıngte úzdik ondyqqa kiremin degen oıdamyn. Trektegi irikteý kezeńi osyndaı nátıjemen aıaqtalmaq, - deıdi Artem Zaharov.
