1 qazan – halyqaralyq Qarttar kúni
Senbi, 29 qyrkúıek 2012 8:44
«Ardager» ardagerlerdi emdeıdi
Densaýlyq saqtaý salasynda eńbek etý úlken jaýapkershilik júkteıtini belgili. Sebebi, sala jumysy adam ómirimen tikeleı baılanysty, janyna shıpa izdegen aýrýdyń taǵdyry dárigerler men medbıkelerdiń kásibı biliktiligine táýeldi. Aýrýdy anyqtaý eshqandaı qatelikti kótermeıdi. Sonyń ishinde soǵys jáne eńbek ardagerleri bekitilgen «Ardager» emhanasy qyzmetkerleriniń jumysy eki ese jaýapty desem, artyq aıtqandyq bolmas. Aty aıtyp turǵanyndaı, emhana ardagerlerdiń densaýlyǵyn kózdiń qarashyǵyndaı saqtaýǵa, olardyń aýrýlarynyń aldyn alýǵa jáne emdeýge mindetti.
Senbi, 29 qyrkúıek 2012 8:44
«Ardager» ardagerlerdi emdeıdi
Densaýlyq saqtaý salasynda eńbek etý úlken jaýapkershilik júkteıtini belgili. Sebebi, sala jumysy adam ómirimen tikeleı baılanysty, janyna shıpa izdegen aýrýdyń taǵdyry dárigerler men medbıkelerdiń kásibı biliktiligine táýeldi. Aýrýdy anyqtaý eshqandaı qatelikti kótermeıdi. Sonyń ishinde soǵys jáne eńbek ardagerleri bekitilgen «Ardager» emhanasy qyzmetkerleriniń jumysy eki ese jaýapty desem, artyq aıtqandyq bolmas. Aty aıtyp turǵanyndaı, emhana ardagerlerdiń densaýlyǵyn kózdiń qarashyǵyndaı saqtaýǵa, olardyń aýrýlarynyń aldyn alýǵa jáne emdeýge mindetti.
Emhananyń tynys-tirshiligimen tanyspaq bolyp kelgen bizdiń kózimiz kórgen mundaǵy jınaqylyq pen uqyptylyq, tazalyq pen dárigerlerdiń iltıpatty qyzmeti júregimizge jylylyq uıalatty. «Ardager» emhanasynyń bas dárigeri Totııa Imanqulova – ujym jumysyn ortaq iske jumyldyryp otyrǵan bilikti dáriger, bedeldi basshy. Aqtóbe memlekettik medısına ınstıtýtyn emdeý isi mamandyǵy boıynsha bitirgen ol mamandandyrýdan ótkennen keıin eńbek jolyn terapevt dárigerden bastap, kardıolog dárigerlik qyzmetin de atqarǵan. 2005 jyldan bastap osy emhanany basqaryp keledi.
– Soǵys jáne eńbek ardagerleri úshin óz aldyna derbes ashylǵan mundaı emhana Almaty men Astanany eseptemegende, oblystardyń ishinde bizde ǵana bar, dep bastady áńgimesin Totııa Sydyqqyzy. – Ashylǵanyna jıyrma bes jyldan astam ýaqyt bolǵan emdeý mekemesinde bastapqyda tek Uly Otan soǵysynyń ardagerlerine ǵana medısınalyq kómek kórsetiletin-di. Uly Jeńistiń 60 jyldyǵy qurmetine oraı bul sanatqa soǵys ardagerlerine teńestirilgen tyl eńbekkerleri qosyldy. Emhananyń materıaldyq-tehnıkalyq bazasy, qarjylaı jaǵdaıy jaqsara kele olarmen birge Aýǵan soǵysyna jáne Chernobyl apatyn aýyzdyqtaýǵa qatysýshylarǵa, Semeı ıadrolyq polıgonynan zardap shekkenderge tegin medısınalyq kómek kórsetile bastady. Qazir emhanada 347, Uly Otan soǵysyna jáne 13272 tyldaǵy eńbek maıdanyna qatysýshylar, Aýǵan soǵysyna qatysqan 662 azamat, Semeı ıadrolyq polıgonynan zaqymdanǵan 381 adam, Chernobyl apatynan zardap shekken 239 adam tegin medısınalyq kómek alady. Jalpy 2005 jyly bizdiń emhanada 3000 adam esepte tursa, qazir olardyń sany 15 myńnan asyp jyǵylady. Shyny kerek, olardyń aýrýlarynyń da ózindik erekshelikteri bar. Munyń ózi ár naýqasqa meılinshe jan-jaqty nazar aýdarýdy alǵa tartady. «Ardagerdiń» esebinde turǵandardyń barlyǵyna dári-dármek tegin berilip, medısınalyq kómek aqysyz kórsetiledi, – deıdi emhananyń bas dárigeri Totııa Sydyqqyzy.
Emhanada qabyldaýǵa kelgen ár adamnyń munda tek medısınalyq kómek alýy ǵana emes, kóńili marqaıyp qaıtýyna da mán beriledi eken. Sondyqtan da qyzmetkerlerdiń adamı qasıetteri men jaıdary minezdi bolýy qajettigi, pasıenttermen ortaq til tabysý birinshi kezekke qoıylady. О́zderi qarttyqtyń taýqymetin tartyp júrgen, sondaı-aq, aýrý qajytqan jannyń densaýlyǵy úshin qoldan kelgenniń barlyǵyn jasap jatqanyn sezinýi dertin sylyp tastaǵandaı áserge bóleıtinin dárigerler de túsinedi. Bul baǵytta aldyńǵy tolqynnan keıingi jastarǵa úlgi bolar ulaǵatty urpaqtar sabaqtastyǵy úzilgen emes. Jastar óz isiniń bilgirleri birinshi dárejeli dáriger Gúljıhan Qalmenovadan, endokrınolog Jaınagúl Tólegenovadan, kardıolog Aıgúl Sársenbaevadan, rentgenolog Amanjol Ámireevten úlgi-ónege alady. Emhanada jumys isteıtinder óz isine berilgen mamandar. Áıtpese, kún saıyn qabyldaýǵa keletin júzdegen aýrýshań qart adamnyń kóńilinen shyǵý ońaı emes.
– Kelýshiler emhanaǵa engennen-aq ózderine kóńil bólingenin sezinýi úshin ıntererden bólmelerge deıin tartymdy etýge tyrystyq. Al kelýshilerdi tirkeý men dárigerlerdiń qabyldaýy aralyǵynda uzaq kútip qalmaýy da nazarda ustalady. Bizde esepte turǵan ardagerlerdiń medısınalyq derekterin tez taýyp, qaı maman dárigerge barýy da ýaqyt almaı tez anyqtalady. Bólmelerdi taza, uqypty ustaý da qalyptasqan dástúr, shashaý jatqan eshnárse bolmaýyn qadaǵalaımyz, – deıdi Totııa Sydyqqyzy sál úzilip qalǵan áńgime jelisin jalǵaı otyryp.
Bul arada árıne, oblystyq ákimdiktiń udaıy qoldaý-kómek kórsetip kele jatqanyn atap aıtý oryndy bolmaq. Oblystyq bıýdjetten qarjy bólinýiniń arqasynda budan birazyraq buryn emhananyń shatyry jańartyldy, ishine de jóndeý jumystary júrgizildi, emhana janynan naýqastar men múgedekterdi ońaltý ortalyǵy ashyldy. Jyl saıyn jańa qondyrǵylar satyp alynýda. Sońǵy jyldary 12850 myń teńgege «ERGOS» lor, 119900 myń teńgege «TOPCON» oftalmologııalyq kombaındary, 4280 myń teńgege «METROLAB PLUS-2300» bıohımııalyq analızatory, 995 myń teńgege «QUALITI» tis emdeý apparaty satyp alynǵan. Bul qondyrǵylar ardagerlerge sapaly medısınalyq kómek kórsetýge anaǵurlym qolaıly bola tústi. Emhanada esepte turatyn 108 adamǵa qyzmet úılerinde kórsetiledi. Emhanada esepte turatyndar jylyna eki ret arnaıy dıspanserlik medısınalyq tekserýden ótkiziledi. Mundaı kezde júrýge múmkindigi joqtarǵa úılerinde keshendi tekserý júrgiziledi. Olar qatty naýqastanyp qalsa, olarǵa dárigerler jedel jetedi, ol úshin arnaıy avtokólik bólingen.
Emhanada 65 adam eńbek etedi eken. Uzaq jyldar osy jerde taban aýdarmaı eńbek etip kele jatqan terapevt Tatıana Lıamınanyń, lor dáriger Sáýle Rahıevanyń, medbıke Jumasulý Maýytovanyń jáne basqalarynyń kásibı biliktiligi men adamı qasıetterine, kórsetken medısınalyq qyzmet sapasy men ystyq yqylasyna qarııalar dán rıza.
– Biz «Ardager» emhanasyna ózimizdiń ekinshi úıimizdeı kelemiz. Dárigerler men medbıkeler týǵandarymyzdaı qarsy alady, tegin dári-dármek beredi, aýyra qalsaq, úıimizge kelip emdeıdi.Terapevtter Roza Qulbaevǵa, Tatıana Lıamınaǵa, Janna Dandyǵaraevaǵa, kardıolog Aıgúl Sársenbaevaǵa, medbıkeler Dına Qurǵanbekovaǵa, Aısulý Haırýllınaǵa, Mereke Sabyrovqa alǵysymyz sheksiz, – deıdi ardager Álıhan Dandaev.
– Meniń jasym toqsannan asty. Uly Otan soǵysynyń ardagerimin. Men ózimizdiń «Ardager» emhanasynyń dárigerleriniń, medbıkeleriniń biliktiligi men iltıpatty qyzmetine dán rızamyn. Olar – shyn máninde adam janynyń arashashylary. Qashan barsań da qabaǵyn shytpaı qarsy alyp, janyńa meıirim shýaǵyn quıyp júrgenderi ylǵı da. Biz qarttar sondaı iltıpatty kórgende aýrýymyzdan qulan-taza saýyǵyp ketkendeı bolamyz. Emdeýi de, adamǵa degen yqylasy da alabóten emhana ujymyna alǵystan basqa aıtarymyz joq, – deıdi Uly Otan soǵysynyń ardageri Vasılıı Kokorev.
Árıne, mundaı alǵysqa toly ystyq yqylasty kóptep keltirýge bolady. Osy emhanaǵa kelýshilerdiń árqaısysy osyndaı pikirde desek qatelese qoımaspyz.
Satybaldy SÁÝIRBAI,
«Egemen Qazaqstan».
Aqtóbe oblysy.
