Bella Sát-Myrza qıyn jaǵdaıǵa tap bolǵan áıelderge, sonyń ishinde kóp balaly analarǵa, jalǵyz basty analarǵa, aýyr dertke shaldyqqan áıelderge, múmkindigi shekteýli jandarǵa óziniń sán úıiniń toptamasynan 50 kóılekti syılaýdy jón kórdi.
«Bul aksııanyń maqsaty – kúnin tek járdemaqymen kórip otyrǵan áıelderdi, balalarymen birge kishkentaı bólmelerdi jaldap turatyn áıelderdi, balalaryn jalǵyz ózi tárbıelep otyrǵan áıelderdi nemese óz ómirin uzartý úshin tapqan qarajatyn dári-dármekke jumsaıtyn áıelderdi qoldaý. 8 naýryz merekesi qarsańynda meniń olarǵa kóńil-kúı, qýanysh syılaǵym keledi. Men olıgarh bolmasam da, ózimniń qol ushymdy bergim keledi», – deıdi Bella Sát-Myrza. О́ziniń qaıyrymdylyq bastamasy týraly dızaıner áleýmettik jeli arqyly habarlaǵan. Naýqan týraly aqparat turǵyndar arasynda qas qaǵym sátte taralyp ketti. Aksııa jarııalanǵannan bir kún ótken soń, oǵan 25 ómirlik jaǵdaı týraly aqparat tússe, qazir ótinimderdiń sany júzden asyp jyǵylady.
«Maǵan Pavlodar, Oral, Shymkent, Qyzylorda qalalarynyń turǵyndary habarlasyp jatyr. Men úmitkerlerdi muqııat tańdaımyn. Olardyń bergen aqparatynyń rastyǵyn tekseremin, olardan qujattaryn kórsetýdi talap etemin», – deıdi dızaıner. Sát-Myrza áıelderge merekelik sharaǵa da, kúndelikti kıim retinde de kııýge keletin kóılekterdi syılaıtynyn aıtty. Dızaıner syılyǵyn ózi tabys etpek nıette: «Mereke qarsańynda barlyq názik jandylardy bir jerde jınap, olardy quttyqtaǵym keledi, gúl shoqtaryn syılaǵym keledi. Shynymdy aıtsam, atalmysh naýqandy jarnamalaýdy qalamadym. Maǵan pıardyń esh qajeti joq. Alaıda jalǵyzdyń úni shyqpas demekshi, meniń bastamamdy dámhana, gúl dúkenderiniń ıeleri, vızajıster, basqa da azamattar qoldasa eken deımin»,– dedi ol.
Dızaıner Bella Sát-Myrza 2015 jyldan bastap múmkindigi shekteýli jandarǵa arnalǵan kıimderdi tigýmen aınalysady.
