Pavlodar oblysynyń ákimi Bolat Baqaýov jergilikti kásipkerlermen kezdesti

Aýdan ákimi Ernur Áıtkenov 2019 jyly Tereńkól aýdanynda birneshe sútti-taýarly fermanyń qurylysy josparlanǵanyn aıtty.

— Bobrovka aýyldyq okrýginde «Astyq PV» JShS-i ınvestısııalar kólemi 1,2 mıllıard teńgeni quraıtyn sútti-taýarly fermanyń qurylysyn aıaqtady, — dedi ol. – Sáýir aıynda fermaǵa Eýropadan 700 bas iri qara mal ákelinedi.

«Sharov» sharýa qojalyǵy osyǵan uqsas 400 bas malǵa arnalǵan jobany júzege asyrmaqshy. Fermanyń qurylysyn bastaý úshin tek kepildik múliktiń azdyǵy qol baılaý bolyp otyr.

— Ferma salý úshin ynta-jigerden bólek, tehnıkalyq-ekonomıkalyq negizdeme, arnaıy bólingen jer ýchaskesi, STF-ǵa qajetti ınfraqurylymnyń jobalaý-smetalyq qujattamasy bolýy kerek, — dedi aımaq basshysy. — Siz fermanyń qurylysyn bastap, ary qaraı ony kepildik múlik retinde qoıýyńyzǵa bolady. Biz óz tarapymyzdan kezeń-kezeńmen qarajat bóletin bolamyz. Eger sýbsıdııa alǵyńyz kelse, saraptamadan ótken jobalaý-smetalyq qujattamasyz aqsha berilmeıdi.

Aýdan kásipkerleri bordaqylaý alańdaryn salýǵa da qulshynyp otyr. «Vılgelm» sharýa qojalyǵynyń basshysy 200 mıllıon teńge kólemindegi óz qarajaty esebinen aýdan ákimdigi bergen 42 gektar jerde bir myń bas iri qara malǵa arnalǵan bordaqylaý alańyn salaıyn dep jatyr. Oblys ákimi sharýalarǵa sýbsıdııa alý úshin kem degende 5 myń bas malǵa arnalǵan alań salý qajet ekendigin eskertti.

Kezdesýde Baıqonys aýyldyq aımaǵynda tuz óndirýmen aınalysyp jatqan «InterKontınent PV» JShS-iń ókilderi de boldy. Aldaǵy jazda kásiporyn tuzdy baıytýǵa arnalǵan, ónimdiligi saǵatyna 100 tonnany quraıtyn qural-jabdyq satyp almaqshy eken.

— Biz tuz kenine aparatyn joldy jóndep, kombınat qurylysyna qajetti alań saldyq. Qysqa deıin ızraıldik tehnologııa boıynsha as tuzyn qaptaýǵa arnalǵan qural-jabdyqtar ornatatyn bolamyz, — dedi kompanııa ókilderi. — Sondaı-aq, 350 bas usaq múıizdi malǵa arnalǵan fermerlik shaýrýashylyq ashyp, balshyqpen emdeıtin demalys ornyn ashýdy josparlap otyrmyz.

Jınalys barysynda oblys ákimi aýdan basshylyǵynyń jumysyn synǵa alyp, aýdan ortalyǵynda jańadan ashylǵan «Master» dúkeniniń qojaıyny úsh jyl boıy saýda úıiniń qurylysyna qajetti alańǵa qol jetkize almaǵanyn mysal retinde keltirdi.

— Aýdanǵa jańa ınvestorlar qajet, — dedi aımaq basshysy. – Ertis ózeniniń boıynda sýarmaly egistikke qajetti jerler jeterlik. Jol shetindegi bıznesti damytýdyń da áleýeti asa zor. Jergilikti ákimder naqty jobalarmen aınalysýlary qajet.