Keshe Qazaqstan Respýblıkasy Kásipodaqtar federasııasy Atqarý komıtetiniń kezekten tys otyrysy ótip, onda Qazaqstan Respýblıkasy Prezıdentiniń kezekten tys saılaý ótkizý sheshimin qoldaý týraly úndeý qabyldanǵan edi. Onda Qazaqstan Respýblıkasy Kásipodaqtar federasııasynyń tóraǵasy Baqytjan Ábdiraıym alda saılaý ótkizý týraly sheshimge qatysty óziniń pikirin bildirgen bolatyn:
– Bul – tarıhı oqıǵa. Keshe ǵana Elbasymyz óz ókilettigin toqtatyp, Qasym-Jomart Toqaevty Parlament biraýyzdan Prezıdent laýazymyna saılady. Biraq Prezıdentti siz ben biz, halyq saılaıdy. Qazaqstannyń turaqtylyǵy úshin saılanǵan Prezıdent qajet. Sol sebepti qazirgi Prezıdentimiz Q.Toqaev myrzanyń kezekten tys saılaý ótkizý usynysyn tolyǵymen qoldaımyz, – dedi federasııa basshysy. Onyń aıtýynsha, aldaǵy kezekten tys Prezıdenttik saılaý úlgili túrde ótip, ádil bolýy kerek. Barlyq úmitkerge jan-jaqty múmkinshilik jasalýy tıis. «Osy múmkindikterdi paıdalaný arqyly Qazaqstanǵa laıyqty, qazirgi zamanǵa saı bilimdi, saýatty, alǵyr Prezıdent saılap alýymyz kerek. Sol arqyly búkil álemge birligimizdi, yntymaǵymyzdy, saıası sana-sezimimizdiń joǵary ekendigin pash etip kórsetýimiz kerek».
