Halyqaralyq konferensııanyń maqsaty – ózgeristerge toly kezeńde jastar boıynda patrıotızm sezimin kúsheıtý, el damýyna qosar úlesin arttyryp, jaqsylyqqa jumyldyratyn jigerli kúsh ári ulttar yntymaqtastyǵynda uıytqy, memleket tutastyǵyna kepil bolatyn jasampazdyǵyn qalyptastyrý.
Jastardyń qoǵamnyń qozǵaýshy kúshi ekenin kóregendikpen eskerip, olardyń ıntellektýaldyq qýaty men qaırat-jigeri el damýyna mańyzdy serpin beretinin bıylǵy jyldy «Jastar jyly» dep jarııalaǵan kezde Elbasy N.Nazarbaev baǵyt-baǵdaryn da aıqyndap, qutty jyldyń qaqpasyn aıqara ashyp bergen bolatyn. Aqparat jáne qoǵamdyq damý vıse-mınıstri M.Ázilhanov: «Nur-Múbarak Egıpet Islam mádenıeti ýnıversıteti» – jas ýnıversıtet jáne jastardyń súıikti oqý ordasy. Biz Elbasynyń bastamasyn qoldaı otyryp, jastarǵa senim artpaq nıetpen «Jastardyń qoǵam damýyndaǵy róli» atty halyqaralyq konferensııanyń shymyldyǵyn túrgeli otyrmyz. Joǵary bilimdi kásibı mamandar daıarlap otyrǵan oqý ornyna aldaǵy ýaqytta da memleket tarapynan kómek kórsete beremiz. Qoǵamdaǵy búgingi kóp suraqtar bilimsizdikten týyndap otyr. Qazirdiń ózinde teris úgit-nasıhattyń qurbanyna aınalyp, Sırııadan bir-aq shyqqan 300-den astam otandasymyz óz eline qaıtýǵa nıet etip otyr. Qaıtyp kelgennen keıin de olardyń oı-sanasyn qalypqa keltirý, qoǵamǵa qaıta beıimdeý qajyrly eńbekti talap etedi. Osy oraıda biz Nur-Múbarak ýnıversıtetiniń ustazdary men stýdentterine, teolog mamandarǵa, ıslamtaný bilgirleriniń kómegine arqa súıep, ıek artamyz», dedi.
Jastardyń dinge bet burýynyń mańyzy zor. Bilimdi, ımandy, kózi ashyq mamandar basy ashylmaǵan kúrdeli saýaldardyń ortasynda qalyp otyrǵan búgingi qoǵam úshin asa qajet. QMDB tóraǵasy, Bas múftı Serikbaı qajy Orazdyń baıandamasy ásirese jastar úshin óte áserli qabyldandy. «Jastyq shaqtyń ár sáti altynǵa da, jaýharǵa da, kez kelgen asylǵa da aıyrbastaýǵa kelmeıtin qaıtalanbaıtyn óte qundy ýaqyt. Múmkindikke baı mańyzdy kezeńdi qalaı paıdalanasyńdar, sol kózqaras, sol ustanym memlekettiń, eldiń bolashaǵyna sózsiz áser etetin bolady. Jastyq shaq – aspanda bir jarq etip joq bolatyn juldyz sekildi kezeń, osyny durys paıdalanyńdar. Bul shaq týraly dinimizde de jan-jaqty, keremet aıtylǵan oılar bar. Ol bilimge umtylý, oqý, izdený, kókirekke túıý sekildi ózi úshin de, ómir súrgen ortasy úshin de paıdaly maqsattarǵa jumsalýy tıis» dedi Bas múftı.
Otandy qorǵaý dindi qorǵaýdan da joǵary turatynyn Egıpetten kelgen vıse-mınıstr As-Seıd Hýseın Abdýlbarı erekshe atap ótti. Jastardyń boıynda, ásirese, otansúıgishtik qasıet basym bolýy kerek. Memleket myqty bolsa, dinniń de ary qaraı órken jaıýyna múmkindik týmaq. Eli bar, jeri bar, týy bar adamǵa aldymen Otanyn súıý mańyzdy. Sondyqtan da memleket turǵyndary eń aldyńǵy kezekte Otanyn qorǵaýǵa kúsh salýy kerek. Al Otanyńdy tastap nemese satyp, basqa elge ket dep din eshqashan úıretpeıdi. Otandy qurmetteý, qorǵaý, Otanda ósip-óný – dúnıege kelip, mán-maǵyna izdegen, baqyt ańsaǵan adam úshin qasıetti paryz ekenin arabtyń teolog mamany jan-jaqty ilim-bilim mysalymen jaqsy túsindirdi.
«Qoǵam damýyndaǵy jastardyń róli» atty halyqaralyq konferensııaǵa qatysqan Nur-Múbarak Egıpet ıslam mádenıeti ýnıversıtetiniń rektory Muhammad Ash-Shahhat al-Jındı, Qazaqstandaǵy BUU Qoǵamdyq aqparat bıýro jetekshisi Abdýrahım Mýhıdov, О́zbekstan Halyqaralyq ıslam akademııasynyń rektory, professor Shýhrat Evkoshev, Halyqaralyq Kýveıt ýnıversıtetiniń rektory Asan Ormýshev, ERCIYES ýnıversıteti, PhD doktory Iýnýs Apaıdyn, Q.A.Iаsaýı atyndaǵy ǵylymı-zertteý ortalyǵynyń dırektory, professor Dosaı Kenjetaı sııaqty bilikti din mamandary baıandama jasap, qoǵam men jastar máselesine baılanysty órbıtin keleli áńgimeni konferensııanyń ekinshi bólimindegi plenarlyq májiliste jalǵastyrdy. Al túski úziliste konferensııa qonaqtary ýnıversıtette ótken Naýryz merekesine qatysyp, ulttyq sport oıyndary men ónerli stýdentterdiń jáne Qazaqstan óner juldyzdarynyń konsertin tamashalady.
ALMATY
