Búginde atalǵan kafedralardyń túlekteri halyqaralyq, respýblıkalyq óner dodalarynda top jaryp júr. Stýdentterge respýblıkaǵa belgili ónerpazdar R.Stamǵazıev, P.Momynov, N.Janpeıisov, M.Abýǵazy, T.Muqyshev, S.Bapanova, R.Bazarbaeva, E.Daýbaev syndy kásibı tájirıbeli oqytýshylar bilim beredi. Ýaqytpen birge olardyń qataryn dástúrli óner salasy boıynsha bilikti mamandar tolyqtyryp keledi.
Qashan da halyqtyq ónerdi dáripteýdiń ozyq úlgisin kórsetýden tanbaı kele jatqan T. Júrgenov atyndaǵy Qazaq Ulttyq óner akademııasynda dástúrli «Ashyq esik kúni» aıasynda Elbasynyń «Uly dalanyń jeti qyry» atty maqalasy jáne «Jastar jylyna» oraı «Uly dala daryndary» atty Respýblıkalyq jas ónerpazdar baıqaýyn ótkizdi.
Dástúrge aınalǵan merekelik sharaǵa elimizdiń barlyq aımaǵynan kelgen talapkerler jáne ózge de ynta bildirgender Akademııaǵa qabyldanatyn mamandyqtarmen tanysyp, oqytýshylarmen kezdesti. Sondaı-aq, jeti fakýltet jóninde bilikti professorlyq-oqytýshylyq qurammen júzdesip, fakýltet boıynsha tolyq málimetke qanyǵyp, daıarlyq baǵdarlamasymen tanysyp, mamandyq tańdaý boıynsha suraqtaryna jaýap aldy.
Resmı ashylýdan keıin belgili óner qaıratkerlerimen jáne shyǵarmashylyqpen aınalysatyn jastarmen kezdesý ótti. Sharaǵa Akademııanyń ónerpaz stýdentterimen qatar, búginde qazaq estradasynda ózindik orny bar «Estradalyq óner» fakýltetiniń magıstranttary Dınara Sultan, Aıqyn Tólepbergen, sondaı-aq osy fakýltettiń stýdenti Ernar Aıdar kelgenderdiń aldynda óner kórsetti.
Júrgenov atyndaǵy Qazaq Ulttyq óner akademııasynda dástúrli «Ashyq esik kúni» aıasyndaǵy sharaǵa Qazaqstannyń eńbek sińirgen qaıratkeri, «Azııanyń úzdik aktrısasy» Samal Eslıamova qurmetti qonaq retinde qatysyp, quttyqtap sóz sóıledi. «Ashyq esik kúni» jarııalanǵan eń jaǵymdy jańalyq – aldaǵy jańa oqý jylynda «Ulttyq óner» fakýltetiniń ishinen «Aıtysker aqyn» mamandyǵy ashylady. «Aıtysker aqyn» mamandyǵy boıynsha kýrs qabyldaýǵa aqyn, jýrnalıst, qazirgi aıtys óneriniń aqtańgeri, Qazaqstannyń eńbek sińirgen qaıratkeri Júrsin Erman arnaıy shaqyryldy. Akademııa rektory Ashat Maemırov Qazaqstan Respýblıkasy Mádenıet jáne sport mınıstrligi, T.Júrgenov atyndaǵy Qazaq Ulttyq óner akademııasy akademııalyq ǵylymı keńesiniń sheshimimen Erman Júrsin Moldashulyna «Qurmetti professor» ataǵy berilgendigin habarlap, kýáligin tabystady. Júrsin Erman óz sózinde: «Bir kezderi ózimiz tálim alǵan Qazaq Ulttyq óner akademııasy ǵımaratyna kelip, osyndaı qutty kúni tosyn syıǵa ıe bolyp turmyn. Bul meniń uzaq jylǵy eńbegime jasalǵan qoshemet dep oılaımyn. Qazir ǵana jańadan ashylyp jatqan «Aıtysker aqyn» mamandyǵyna oqýǵa kelgisi keletin talapkerlerdi tyńdap jatyrmyz. El ishi – qazyna. Árıne, talantty balalar bar. Qazylar alqasy atynan osy jastardyń arasynan qazaq óneriniń týyn kókke kóterer talanttar shyǵaryna kámil senemiz. Elden kelgen balalar ónerin tanytyp jatyr. Ashyq esik kúninde Akademııa tabaldyryǵyn attaǵysy keletin talapkerlerdiń barlyǵyna tabys tileımin. Táýelsiz Qazaqstanymyzdyń kóshin alǵa súıreıtin naǵyz mamandary bolyńdar. Jańa býyn, jas qaýym, baqtaryń ashylsyn. Bizdiń bolashaǵymyz sizderdiń qoldaryńyzda, jeńiske jete berińizder!»,– dep ystyq yqylasyn bildirdi.
«Uly dala daryndary» atty Respýblıkalyq jas ónerpazdar baıqaýyna qaıta oralsaq, mýzykalyq jáne kórkemsýret orta oqý oryndarynyń 4-kýrs stýdentteri men arnaıy mamandandyrylǵan mýzyka jáne kórkemsýret mektepteriniń 12-synyp oqýshylary qatysyp, 12 nomınasııa (án, jyr, dombyra, qobyz, sybyzǵy-sazsyrnaı, jetigen, sherter, aıtys, kórkem qysh, kórkem toqyma, zergerlik is, aǵashty kórkemdep óńdeý) boıynsha baq synaǵan edi. Qazaqstan Respýblıkasynyń kórnekti óner qaıratkerleri men T. Júrgenov atyndaǵy Qazaq Ulttyq óner akademııasynyń bilikti ustazdarynan quralǵan qazylar alqasynyń sheshimimen respýblıkalyq baıqaýdyń jeńimpazdary marapattaldy.
