«Asanáli Áshimov óner men mádenıetti qoldaý qory» quryldy

 Memleket pen mádenıettiń mámileli dıalogy retinde túrli jobalardy júzege asyratyn  mańyzdy ári irgeli baǵdarlamalar qabyldanyp, jumys istep kele jatqanymen rýhanııatqa qamqor bolatyn jeke tulǵalar men toptardyń da jaýapkershiligi, oń kózqarasy qajet. Mádenıetti qarjylandyrý bıýdjettik mekemelermen birge kommersııalyq, qaıyrymdylyq bastamalarymen qatar júrgizilse, ónerde júrgen naqty talanttar men ulttyq mańyzǵa ıe qajetti jobalardyń joly da baılanbaı, jaryqqa shyǵyp, jetistigimen tanylýyna taptyrmas múmkindik bolatyny sózsiz. Qaıyrymdylyq sharýalarymen shuǵyldanatyn, mesenattyǵy márt minezine aınalyp ketken jekelegen atymtaı jomart azamattar bolǵanymen, mundaı bıik maqsatty ustanyp qurylǵan qorlar bizdiń qoǵamymyzda joqtyń qasy. Sondyqtan jańadan qurylǵan «Asanáli Áshimov óner men mádenıetti qoldaý qory» qoǵamdyq qory – elimizdegi osy baǵyttaǵy alǵashqy qor retinde qabyldanyp otyr.

Qazaqstannyń Eńbek Eri, KSRO halyq ártisi, KSRO Memlekettik syılyǵynyń laýreaty A.Áshimovtiń atymen baılanysty qurylyp otyrǵan qoǵamdyq qordyń saltanatty ashylý rásimi ótip, jınalǵan zııaly qaýym men kásipkerlerge maqsaty-mindetin tanystyrdy. Qor tek.

«Asanáli Áshimov óner men mádenıetti qoldaý qory» jas talanttarǵa demeýshilik jasap, mádenıet pen sportqa janashyrlyq tanytýmen ǵana shektelmeıdi. Keleli mindetterdi atqarýdy kózdep otyrǵan qor qyzmetiniń birqataryn sanamalasaq: halyq ártisiniń jetekshiligimen akter sheberligi mektebi, mýzeı, teatrdy toptastyrǵan Asanáli Áshimov atyndaǵy ortalyq qurylysyn bastaý, Qazaqstannyń óneri men mádenıetin damytý úshin teatr men kınoǵa eleýli úles qosqan korıfeılerdi qoldaý, kómek kórsetý. Sondaı-aq jyl saıyn T.Júrgenov atyndaǵy Qazaq ulttyq óner akademııasynyń eń úzdik talantty stýdentine stıpendııa taǵaıyndaý, alys jáne sheteldik oqý oryndarynda tájirıbe almasýǵa jiberý, Qazaqstanda ótkiziletin bes kınofestıvaldegi «úzdik er adam obrazy» atalymy úshin júlde tigý, elimizde ótetin halyqaralyq aıtys jeńimpazdarynyń birine qor atynan arnaıy júlde berý, jalpy A.Áshimovtiń shyǵarmashylyq jolyn jalǵastyrýdy qoldaý – joba jumysyndaǵy basty baǵyttardyń qatarynda.

Qor sahna sańlaǵynyń ónerin qadirleıtin zamandastary, úzeńgiles serikteriniń usynysymen qurylyp otyr. Jańadan tusaýy kesilip otyrǵan qor quryltaıshylyǵy Meıirjan Orazbaev, Erjan Tátishev, Dınara Ábsalyq sekildi belgili kásipkerlerden qurylsa, halyq ártisiniń jary Baǵdat Áshimova quryltaıshy mindetimen birge, qor tóraıymy retindegi jańa qyzmetin bastamaq. Buǵan qosa qor jumysynyń janynan tabylyp, keńes berýmen aınalysatyn Aqyldastar alqasy da quryldy. Qor jumysyn júrgizý qajyrly qaırat pen úzdiksiz jumysty qajet etedi. Úkimetke ǵana ıek artpaı, ult mádenıetiniń júgine arqasyn tósep, bir muqtajyn óteýdi murat tutyp kelgen qordyń jumysyna kópshilik sáttilik tilep, qorjynyna alǵashqy kómegi retindegi qomaqty qarajatyn salyp ketti.

ALMATY