Áset Ássandı óziniń paraqshasynda birneshe post jarııalap, jantúrshigerlik sýretter salǵan. Aıtýynsha, bir úıdiń úsh qyzyna ógeı shesheleri ıne tyǵyp, tońazytqyshqa otyrǵyzyp qoıǵan.
«Apaly-sińlili - 2003 jylǵy Salıma, 2005 jylǵy Mánshúk, 2007 jylǵy Mılana. Bul qarakózderimizdiń kórmegen qorlyǵy qalmapty. О́geı anasy, 1991 jylǵy Kóbeeva Juldyz fashısterden de asyp túsken sııaqty. Kámelet jasyna tolmaǵan qyzdardyń tyrnaqtarynyń astyna qaıta-qaıta ıne tyǵyp, jylaıyn dese, uryp-soǵyp «kúlip tur» dep, jandaryna batyp tursa da, ezýlerin tartqyzyp, tońazytqyshqa birtalaı ýaqyt otyrǵyzyp qınap, qaıshymen denelerine jaraqat salyp, shaılaryna gel qosyp berip ishkizip, tipti jynystyq múshelerin kempiraýyzben qysyp, jaraqat salyp júrgen eken. Bul qyzdardyń kórgen azaptary adam aıtqysyz. Jetisaıdan tabylmaǵan arashany Túrkistan oblysynyń basshylary, zań oryndarynan, densaýlyq saqtaý basqarmasynan suraımyz! Qarakózderimizdi jylatýǵa jol bermeıik! Jáne álgi ógeı sheshelerin qatań jazaǵa tartaıyq»- dep jazady Áset Ássandı.
Aıta keteıik, atalmysh oqıǵaǵa qatysty Ishki ister mınıstrliginiń resmı ókili Nurdildá Oraz pikir bildirdi. Onyń aıtýynsha, máseleni Ishki ister mınıstri Erlan Turǵymbaev óz baqylaýyna alǵan. «Áleýmettik jeli arqyly keńinen taralyp, Jetisaı aýdanyndaǵy bir otbasynda oryn alǵan ógeı anasynyń qatygezdikpen balalaryn uryp-soǵyp, dene jaraqatyn salý arqyly zorlyq kórsetken jaıt boıynsha qylmystyq is qozǵaldy. Máseleniń mán-jaıyn anyqtaý úshin arnaıy komıssııa quryldy. Komıssııa sheshimimen balalar ájesine tapsyrylǵan», - dep jazady Nurdildá Oraz.
