– Osy jarys jaıynda tolyǵyraq maǵulmat berseńiz?
– Alataý baýraıyndaǵy jarysty «Alash praıd» klýby qyrǵyzstandyq JFC promoýterlik kompanııasymen birlesip uıymdastyryp otyr. Sol kúni «Almaty Arenaǵa» jınalǵan kórermender 12 jup arasyndaǵy básekelerdi tamashalaıdy. Aıqas alańyna Qazaqstannyń alty sportshysy shyǵady. Baqtııar Nesipbek (56,7 kılo), Nursultan Qasymhanov (61,1 kılo), Artem Reznıkov (70,1 kılo), Igor Kıchıgın (77 kılo) jáne Evgenıı Egemberdıev (93 kılo) erejesiz jekpe-jekten saıysqa tússe, Ǵalymjan Qanaev (81 kılo) K-1 erejesi boıynsha kúsh synasady.
– Bizdiń jigitterge Brazılııanyń beldi sportshylary qarsylas atanyp otyr dep estidik. Sol ras pa?
– Dál solaı. Búgingi tańda óreli ónerlerimen kózge túsip júrgen úsh birdeı órenimiz Brazılııanyń ókilderimen aıqasady. Tarqatyp aıtsaq, Baqtııar Nesipbek Lopes Do Nasmımentomen, Nursultan Qasymhanov Sanderson Santospen jáne Igor Kıchıgın Hose Gomespen kezdesedi. Muhıttyń arǵy betinen kelgen jigitterdiń barlyǵy talaı dúrmekte ysylǵan naǵyz dúldúlder ekeni esh kúmán týǵyzbaýǵa tıis. Evgenıı Egemberdıev Argentınanyń ókili Emılıano Sordımen saıysqa túsedi. Ońtústik Amerıkanyń oǵlany osy kúnge deıin 25 kezdesý ótkizip, 17 ret jeńiske jetken saqa sportshy. Keshtiń basty jekpe-jegi qazaqstandyq Artem Reznıkov pen reseılik Rezvan Abýev arasynda ótedi. Chelıabi qalasynda turatyn cheshen jigitiniń de júrip ótken joly jarqyn jeńisterge toly. Olar «Alash praıdtyń» chempıondyq belbeýi úshin talasady. Al Ǵalymjan Qanaevtyń qarsylasy áli anyqtalǵan joq. Osy joly biz qandasymyzdy K-1 sporty keremet damyǵan Gollandııa eliniń kıkboksshysymen jolyqtyrýdy jón kórip otyrmyz. Áńgimeni qysqa qaıyrsaq, 30 sáýirde «Almaty Arenaǵa» jınalǵan jurt alapat aıqastyń kýási bolady.
– Iá, biz de Almatydaǵy týrnırdiń sátti ótýine tilektespiz. Ol odan keıin «Alash praıdtyń» sapyndaǵy sańlaqtardy qandaı dúbirli dodalar kútip tur?
– Qazirgi kezde bes jigitimiz Reseıdiń Cheshenstandaǵy «Ahmad» klýby uıymdastyryp júrgen AVS týrnırinde kúsh synasý quqyǵyna ıe bolyp otyr. Olar – Asyljan Baqytjanuly, Evgenıı Egemberdıev, Nursultan Qasymhanov, Artem Reznıkov jáne Shahmaral Jetpisov. Búgingi tańda qart qurlyqta teńdessiz dep tanylyp, álemdegi besinshi promoýshen sanalatyn uıymnyń jarysy ústimizdegi jyldyń shilde aıynda bastalady. Aıqas alańynda jasyndaı jarqyrap júrgen Baqtııar Nesipbekti de aldaǵy kúnderi AVS týrnırinen kórip qalýymyz múmkin. Sonymen qatar elimizde joǵaryda esimderi atalǵan myqtylardyń izin basyp jalyndy jastardyń qalyń shoǵyry ósip keledi. Olarǵa da artar úmitimiz zor.
