Sońǵy derekterge qaraǵanda, jarylystan qaza tapqandar sany 262 adamǵa jetken. Al japa shekkenderdiń jalpy sany 500-ge jýyq. Japa shekkender arasynda Danııa, Japonııa, Pákistan, Marokko, Úndistan, Bangladesh, QHR, Nıderland, AQSh, Túrkııa jáne Anglııa azamattary bar. Biraq negizgi bóligi jergilikti azamattar. Derekterge qaraǵanda, barlyǵy 35 sheteldik azamattyń japa shekkendigi aıtylýda. Qaza tapqandar arasynda tek Ulybrıtanııa azamattarynyń bar ekendigi málim boldy.
Qazaqstan Syrtqy ister mınıstrligi Shrı-Lanka Ishki ister mınıstrliginiń aqparatyna súıenip, qaza tapqandar arasynda Qazaqstan azamattary joq ekenin habarlady.
Qazir Shrı-Lanka ókimeti jarylystarǵa qatysy bolýy múmkin degen 13 adamdy quryqtaǵan. Qazaqstannyń Syrtqy ister mınıstrligi terrorıstik aktilerdi aıyptaǵan málimdeme taratty. Onda Qazaqstan terrorızmniń barlyq túrdegi formalaryn aıyptaıtyndyǵy jáne álemdik qoǵamdastyqpen birlesip, bul jaýyzdyqqa qarsy batyl kúres júrgizýi kerektigi aıtylǵan. Sonymen birge málimdemede japa shekkenderdiń otbasylaryna, barlyq Shrı-Lanka halqy men ókimetine kóńil aıtylyp, teraktilerdi uıymdastyrýshylar men oryndaýshylar tıisti jazasyn alatynyna senim bildirilgen.
Qazir Shrı-Lanka ókimeti elde tótenshe jaǵdaı jarııalap, komendanttyq saǵat engizgen. Eldiń qorǵanys mınıstri Rývan Vııevardene segiz jarylystyń ekeýin terrorıst-jankeshtilerdiń jasaǵany anyqtalǵanyn jarııalady. Qazir olardyń kim ekendigi anyqtalǵan jáne olar ekstremıstik toptarǵa múshe ekendigi de belgili boldy.
Eske sala ketetin bolsaq, bıyl 15 naýryzda Jańa Zelandııanyń Kraıstcherch qalasynyń eki meshitinde 28 jasar Brenton Tarrant degen qanisher de terrorıstik akti jasap, 50 adamdy óltirip, taǵy da 50-ge jýyq adamdy jaralaǵan edi. Aldymen ol Ál-Nur meshitine kelip, namaz ýaqytynda musylmandarǵa oq jaýdyrǵan. Sodan keıin avtomashınasyna minip, ekinshi meshitke jetken. Munda da kári-jasqa qaramaı, meshittegilerdiń bárin qyra bergen. Qanisherdiń qolynan qaza tapqandardyń jastary úsh pen 77 jas aralyǵyndaǵy beıbit jandar. Al qanisherdiń ózi Aýstralııanyń ýltra ońshyl kózqarastaǵy tobynyń múshesi ekendigi anyqtalǵan. Eger keıbir azamattar onyń qolyna umtylyp, qarýyn qaǵyp túsirýge tyryspasa, qaza bolǵandar men japa shekkender sany budan da artyq bolar edi. Sonyń biri Aýǵanstannan 80-jyldary Jańa Zelandııaǵa qonys aýdarǵan 71 jastaǵy Daýd Nabı bolǵan.
Terrorızmde ult ta joq, din de joq. Olardyń qandy áreketterin eshkim de, eshqashan da aqtamaıdy. Eshqandaı jazyǵy joq beıbit turǵyndardy óziniń qaskóı áreketiniń qurbany etý – naǵyz nadan adamdardyń áreketi.
