«NIS: qazaqstandyq bilim júıesiniń brend-ambassadory» jobasy Reseıde ótken halyqaralyq baıqaýdyń «Aımaqty ilgeriletý» atalymy boıynsha jeńimpaz atandy. Quramyna kommýnıkasııa salasyndaǵy belgili reseılik sarapshylar men tájirıbeli mamandar kirgen qazylar alqasy NIS-tiń otandyq zııatkerlik brend jáne álemdik pedagogıkanyń sátti draıveri retinde aqparattyq jáne PR ilgeriletýdegi jumysyn joǵary baǵalady.
Bedeldi baıqaýǵa Reseı, Ýkraına, Belarýs jáne Qazaqstannan 500-den astam joba qatysty. Bul jobalardyń barlyǵy ekonomıka, saıasat, mádenıet jáne jalpy kommýnıkasııa salasynda belgili brend sanalady. NIS baspasóz qyzmetimen birge nomınasııanyń short-tizimine Vologod oblysynyń ınvestısııalyq kompanııasy, Reseıdiń tanymal ındýstrııalyq brendteriniń biri – Trýbalyq metallýrgııalyq kompanııasy engen bolatyn. Alaıda, NIS-ti halyqaralyq deńgeıde ilgeriletýdegi aýqymdy, kreatıvti jáne júıeli jumystary úshin, sonyń ishinde «Kembrıdj saǵatynda – Astana ýaqyty», «NIS jańaratyn energııasy», «Súıinshi, CIS, Kembrıdj, NARIC!», «Robottar álemdi baǵyndyrady!» syndy taqyryptyq medıalyq jáne PR jobalary úshin qazaqstandyqtar jeńimpaz atandy. Zııatkerlik mektepterdi shetelderde nasıhattaýda erekshe nazar Media Relations, Public Relations, Government Relations, Investor Relations, Community Relations ıntegrasııalanǵan aqparattyq jáne PR jobalaryna aýdaryldy.
– Jalpy kommýnıkasııanyń zamanaýı júıesinde eń joǵarǵy pılotaj – eldi tanýǵa baǵyttalǵan PR. Biz NIS-ti otandyq ıntellektýaldyq brend retinde halyqaralyq deńgeıde ilgeriletýge qosqan eńbegimiz úshin qýanyshtymyz, – dep aǵynan jaryldy «Nazarbaev zııatkerlik mektepteri» DBBU baspasóz qyzmetiniń jetekshisi Mıra Alıpınova.
