Aksııa barysynda atalǵan ýnıversıtettiń Kitaphanalyq-aqparattyq ortalyǵynyń dırektory Gúljan Irjanova sóz alyp, kitaptyń mańyzdylyǵyna toqtaldy. Sonymen qatar, barsha jasty kitap oqyp, bilimderin shyńdaýǵa shaqyrdy.
Al, ýnıversıtettiń birinshi prorektory, tarıh ǵylymdarynyń doktory, professor Asqar Abdýaly «Jas kezimizde kitapty talasyp oqıtyn jastar kóp boldy. Búginde ınternet dáýirinde stýdentter, tipti jas oqytýshylardyń ózi ǵalamtorǵa kóp júginedi. Biraq ınternettegi málimet bilimdi shyńdaı almaıdy, ol tek aqparat kózi bolmaq. Naǵyz bilim – kitapta. Shetel jastary aıyna shamamen 500 AQSh dollar qarajatyn kitap satyp alýǵa jumsaıdy eken. Bizdiń de jastarymyz kitap satyp alýdy ádetke aınaldyrsa deımin», dep, óz oıymen bólisti.
Mereke qarsańynda kitapsúıer qaýym arasynda «Meniń súıikti kitabym» ádebı dılıjans baıqaýy da uıymdastyrylǵan bolatyn. Nátıjesinde eń kóp kitap oqyǵan stýdentter osy jıynda marapattaldy. Saıystyń qorytyndysyna sáıkes, 41 kitap oqyǵan tehnologııalyq fakýltettiń stýdenti Darıǵa Qońyrova bas júldeni jeńip aldy. Al, 38 kitap oqyǵan gýmanıtarlyq-áleýmettik ǵylymdar fakýltetiniń stýdenti Jazıra Jákenova men 27 kitap oqyǵan osy fakýltettiń stýdenti Indıra Dúısenbaeva birinshi oryndy ıelense, gýmanıtarlyq-áleýmettik ǵylymdar fakýltetiniń stýdenti Aıdana Tórtqulbaeva men tehnologııalyq fakýltettiń stýdenti Arýjan Beıbitova ekinshi orynnan kórindi. Sondaı-aq, 12 jáne 14 kitap oqyǵan Dıana Qanaı men Nazerke Israılova úshinshi orynǵa ıe boldy. Bas júlde men birinshi oryndy ıelengen úsh stýdent «Baldáýren – Qapshaǵaı» Respýblıkalyq oqý-saýyqtyrý ortalyǵyna joldama jeńip alsa, qalǵan jeńimpazdar kitaptarmen jáne TarMÝ-dyń brend ónimderimen marapattaldy.
Atalǵan aksııa aıasynda oqý ordasynyń qabyrǵasynan «COWORKING ZONE» jastardyń erkin oı almasý ortalyǵy ashyldy. Bul ortalyqta stýdent jastar óz oqyǵan kitaptaryn ózgelermen bólisý maqsatynda sórege qaldyryp kete alady. Jáne oqyǵan kitaptary týraly oılaryn ortaǵa salyp, áńgimelesýlerine de bolady.
