Baldyrǵandardyń talaby men talantyn sarapqa salýǵa ánshi Aırı kelipti. Júzderi bal-bul janǵan júzdegen jaýqazyn qazylar alqasynyń aldynda qazaq, orys, aǵylshyn tilderde áýelete án shyrqap, boıdaǵy daryn men qabilet-qarymyn sarapqa saldy. Bala kóńil úshin bul baıqaý tolqynysqa toly mańyzdy sát ekeni aıtpasa da túsinikti. Dúbirli baıqaýǵa oblysymyzdyń ár túkpirinen at aryltyp jetken 8 ben 12 jas aralyǵyndaǵy jas daryndar óz qabiletterin kórsetý úshin tyrysyp, baryn saldy. Ánshi Aırıdiń aıtýynsha, Kókshe jerinde óner kórsetken talantty jastar baıqaýǵa asa bir yjdahattylyqpen daıyndalǵan eken. Tálimgerler qatysýshylardy tek tyńdap qana qoımaı, aqyl-keńesterin aıtyp, tájirıbelerimen bólisip, kishkentaı ónerpazdarǵa qoldaý kórsetip otyrdy.
Án besigi atanǵan kıeli Kókshe óńiri talantty ónerpazdarǵa baı ekendigi anyq baıqaldy. Atadan qalǵan sol asyl murany jalǵap kele jatqan óskeleń urpaqtyń da kókireginde ónerdiń oty lapyldap turǵandyǵyn kórdik. Qazylar alqasyna da kil júıriktiń ishinen úzdigin tańdaý ońaıǵa soqpady. Baıqaýda top jarǵan Ersultan Shaımurat Aqmola oblysynyń namysyn qorǵaıtyn bolady. Qatty tolqyp, qýanyshtan kózine jas úıirilgen ónerpaz óren: «Baıqaýǵa qatysýǵa kelgen osynshama balany kórgende jeńis maǵan buıyra qoımaıtyn shyǵar dep oıladym. Biraq bar kúshimdi jınap, irikteýdiń barlyq kezeńderinde ózimdi senimdi ustaýǵa tyrystym. Jeńiske jetkenime qatty qýanyp turmyn», – dedi. Sonymen, elimizdiń ár óńirinen úzdik shyqqan ónerpazdar anyqtalǵan soń olar kásibı mýzykanttardan, horeograf, stılısterden mýzyka mektebinde bir aı tálim alatyn bolady. Al, qazan aıynyń 25-27-si aralyǵynda Almaty qalasynda ótetin fınaldyq baǵdarlamada qazylar alqasy men sms-daýys berý arqyly telekórermender júregin jaýlaı bilgen has talant parıjdik «Dısneılendke» tegin qydyryp qaıtý joldamasyna jáne Qazaqstandaǵy eń úzdik mýzykalyq oqý oryndarynyń biriniń grantyna ıe bolmaq. Baıqaý uıymdastyrýshylarynyń aıtýynsha, osy jyldar aralyǵynda irikteý týrlaryna 20 156 bala qatysqan, teledıdardan 12 konserttik shoý, 24 kúndelik, 128 ımıdjdik rolık kórsetilgen. «Bala daýysy» túlekteri búginde «Jandaný álemi» qorynyń qoldaýymen mýzykalyq mektepter men kolledjderde bilim alýda.
