Biraq kıiz úı halqymyz úshin qashanda qymbat qazyna. Ony jastar arasyna nasıhattaý, tigý jáne qaıta jyǵý, jınaýdy úıretý, jasaý-jabdyǵyn orny-ornymen qoldana bilýge baýlý kún tártibinen túspegeni durys.
Mańǵystaý oblystyq tarıhı-ólketaný mýzeıinde óńirdegi ulttyq dástúr men mádenı muranyń kózdiń qarashyǵyndaı saqtalyp kelgendiginiń aıqyn aıǵaǵyndaı Mańǵystaý kıiz úıiniń mártebesin kóterip nasıhattaý maqsatynda «Kıiz úı – ulttyq qundylyqtar qazynasy» taqyrybynda kıiz úı tigýden jarys ótti.
Halyq ónerin, babalar murasyn qasterleı otyryp, ulttyq dástúrli qolónerdi damytý men jandandyrýdy urpaq sanasyna sińirý, umytyla bastaǵan dástúrlerimizdi jańǵyrta jalǵastyrýǵa Sh. Esenov atyndaǵy Kaspıı memlekettik tehnologııalar jáne ınjınırıng ýnıversıteti tarıh fakýltetiniń 1-kýrs stýdentteri arasynda jasaqtalǵan «Alash», «Shańyraq» toptary qatysty. Olar kıiz úı súıekteriniń dástúrge saı ornalasýy, keregeniń jaıylýy men tańǵyshtarynyń durys baılanýy, syqyrlaýyqtyń aqaýsyz bekitilýi, shańyraqtyń kóterilýi, ýyqtardyń shanshylýy, baýlar men basqurlardyń durys ustalýy, shıler men kıizderdiń jabylýy boıynsha synǵa tústi.
– Kıiz úıdi bilý, ony tigý, quraldaryn durys ornalastyra bilý, sondaı-aq onyń buıymdaryn retimen, júıesimen qoıý – úlken bilgirlikti qajet etedi. Ony meńgerý ońaı sharýa emes, alaıda kıiz úıge degen qurmet qazaq jastarynyń, ásirese Mańǵystaý jastarynyń boıynda, qanynda bar qasıet bolǵandyqtan, ol óz-ózinen jáne birte-birte qalypqa túsip jetilip ketedi dep oılaımyn. Bizdiń maqsatymyz – jastardyń boıyndaǵy tuma bulaqtyń kózin ashý, ulttyq qundylyqtarymyzdy qasterlep, ózderinen keıingi urpaqqa tanytýyna kúsh salý, deıdi qazylar alqasynyń tóraǵasy, Mádenıet qaıratkeri, «Has sheber» ataǵyn ıelengen qolónershi Áýes Saǵynaeva.
Aıtsa aıtqandaı, jastar kıiz úı tigýge erekshe yntamen, qulshynyspen kiristi. Ázilderin aıtyp, ándete júrip kıiz úıdi ornyqty etip tikti, jasaýyn jaıǵastyrdy. Jastardyń jalynyna rıza bolǵan qazylar eki topty teń baǵalap, birdeı upaı berip, dıplomdarmen marapattap, mýzeı atynan kitaptar syıǵa tartty.
Kıiz úı ǵana emes, ózge de ulttyq erekshelikterimizge saı qundylyqtarymyz mýzeıde odan ári turaqty, ári keń kólemde nasıhattala beretin bolady.
Mańǵystaý oblysy
