Úkimetaralyq keńes otyrysynyń kún tártibinde Odaqqa múshe memleketter arasyndaǵy saýda-ekonomıkalyq yntymaqtastyq jáne ózara saýda-sattyqty keńeıtý, sondaı-aq EAEO ishki naryǵy aıasyndaǵy kedergilerdi joıýǵa qatysty 13 másele qaraldy.
Shaǵyn quramda úkimet basshylary Odaqty damytýdyń birqatar tujyrymdamalyq máseleleri jóninde pikir almasty. EAEO sıfrlyq transformasııalaý aıasynda transshekaralyq ózara is-qımyldy tereńdetý, qatysýshy elder arasyndaǵy taýar aınalymynyń kólemin ulǵaıtý salasyndaǵy yntymaqtastyq, kedendik ákimshilikti jetildirý tetikteri talqylandy.
Keńeıtilgen kelissózder «biryńǵaı tereze» qaǵıdaty boıynsha syrtqy ekonomıkalyq qyzmetti retteýdi jetildirý máselelerine, EAEO saýdasynyń sıfrlyq ekojúıesin damytýǵa jaǵdaı jasaý, ónerkásiptik kooperasııany jáne tehnologııalar transferin damytý, ekonomıkanyń jekelegen salalarynda ıntegrasııalyq áleýetti odan ári ulǵaıtý máselelerine arnaldy.
Taraptar 2018 jyldyń qorytyndysy boıynsha EAEO mańyzdy áleýmettik-ekonomıkalyq kórsetkishteriniń oń qarqynyn atap ótti. Odaq elderiniń JIО́ ósimi 2,5%, ónerkásiptik óndiris ósimi 3,1% qurady. EAEO-da ótken jyly ózara saýda kólemi 9,2% ósti, syrtqy saýdada da osyndaı úrdis baıqalady, onda jyl qorytyndysy boıynsha ósim 18,8% qurady.
Qazaqstan Premer-Mınıstri A. Mamın óz sózinde álemdik ekonomıkanyń qubylyp turǵan shaǵynda damýdyń oń qarqynyn saqtaý úshin barlyq kúsh-jiger salý qajettigin atap ótti. Búginde Odaqqa qatysýshy barlyq eldermen ózara saýdadaǵy kedergilerdi joıý úshin belsendi birlesken jumystar júrgizilip jatyr. Tájirıbe kórsetkendeı, jańa kedergiler baıqalýda, bul óz kezeginde budan da tyǵyz ekonomıkalyq qatynastardy damytýdyń ındıkatory bolyp tabylady.
«Bizge qarqynymyzdy tómendetpeý kerek», — dedi Asqar Mamın. — Qazirgi kedergilerdi joıý ózara saýda kólemin ulǵaıtyp, elder arasyndaǵy ekonomıkalyq baılanystardy keńeıtýge múmkindik beredi».
Qazaqstandyq tarap EAEO aıasynda sáıkestendirý quraldary arqyly taýarlardy tańbalaý boıynsha ıntegrasııalyq yntymaqtastyq máselelerin retteýdi jetildirý qajettigine, tranzıttik tasymaldardy qadaǵalaý júıesin engizýge, kedendik ákimshilikti kúsheıtýge, sıfrlyq saýdany damytýǵa, Odaqtyń derekter tranzıti salasyndaǵy tranzıttik áleýetin arttyrýǵa nazar aýdardy.
«О́zara paıda, ymyraǵa kelý jáne barlyq taraptardyń múddelerin eskeretin tıimdi sheshimder shyǵarý qaǵıdattarynyń negizinde ózara qarym-qatynastarymyzdy qalyptastyrý EAEO odan ári nyǵaıtýǵa belsene yqpalyn tıgizetin bolady», — dedi Asqar Mamın. — 2025 jylǵa deıin eýrazııalyq ekonomıkalyq ıntegrasııany damytýda biz úshin basty shart — ekonomıkalyq komponettiń bolýy».
Otyrys qorytyndysy boıynsha «Eýrazııalyq ónerkásip kooperasııa, sýbkontraktasııa jáne tehnologııalar transferi jelisi» jobasyn iske asyrý týraly, Odaqtyń ishki naryǵynyń jumysy aıasynda kedergilerdi joıý boıynsha jumystar barysy týraly, EAEO-ta sıfrlyq saýda ekojúıesin damytý úshin jaǵdaılar jasaý týraly, syrtqy ekonomıkalyq qyzmetti retteý júıesinde «biryńǵaı tereze» ulttyq tetiginiń etalondyq úlgisin sıpattaý týraly, taýarlardy ákelý men shyǵarýda shyqqan elin anyqtaýda biryńǵaı tásilderdi bekitý týraly birqatar qujattarǵa qol qoıyldy.
Eýrazııalyq úkimetaralyq keńestiń kelesi otyrysy bıyl 9 tamyzda Sholpan ata qalasynda (Qyrǵyzstan Respýblıkasy) ótedi.
