Otyrysta Nur Otan partııasy Tóraǵasynyń birinshi orynbasary Máýlen Áshimbaev bastaǵan qatysýshylar atalǵan taqyryp tóńireginde pikirlerin ortaǵa saldy. Dástúrge saı sóz tizginin ǵalym, Halyqaralyq Túrki akademııasynyń prezıdenti, «Egemen Qazaqstan» respýblıkalyq gazeti» AQ basqarma tóraǵasy Darhan Qydyráli ustady.
Áýeli Máýlen Áshimbaev jastar máselesi memlekettiń udaıy nazarynda ekenin aıtyp, onyń dáleli retinde Elbasynyń bastamasymen osy jyldyń Jastar jyly bolyp jarııalanýyn keltirdi.
– Partııamyzdyń kezekten tys XVIII sezinde aldaǵy 10 jylǵa arnalǵan jańa baǵdarlamamyz qabyldandy. Bul qujatta naqty on maqsatty anyqtap aldyq. Solardyń biri jastarǵa qoldaý kórsetý isine arnaldy. Osy maqsatqa jetý úshin Elbasy, partııa Tóraǵasynyń tapsyrmasyna sáıkes 3 basym baǵytty anyqtadyq. Olar – jastarǵa áleýmettik qoldaý kórsetý, jas býynnyń áleýetin damytyp, patrıotızmdi kúsheıtý jáne memlekettik jastar saıasatynyń tıimdiligi men nátıjeligin arttyrý. Jas qazaqstandyqtardyń aldyńǵy býynǵa qaraǵanda anaǵurlym bilimdi, básekege qabiletti, jan-jaqty, kásibı bolýy úshin memleket pen qoǵam tarapynan júıeli qamqorlyq kórsetýimiz kerek, – dedi partııa Tóraǵasynyń birinshi orynbasary.
Osy rette Darhan Qydyráli Jastar jyly qarsańynda Aqparat jáne qoǵamdyq damý mınıstrligine artylar jaýapkershilik júgi kóp ekenin aıtyp, atalǵan mınıstrliktiń ókili vıse-mınıstr Juldyz Omarbekten ázirlengen Jol kartasy jóninde surady.
– Jastar kúsh-jigeri mol, eldi alǵa jeteleıtin top. Jalyndy jastardyń ózi bizge kómek kerek emes, tek kedergi keltirmeńder degendi jıi aıtady. Sondyqtan olarǵa kómek emes, jaǵdaı jasaýymyz tıis. Ol – sapaly bilim alý, sportpen shuǵyldaný, óz kásibin ashý sııaqty jan-jaqty damýyn qamtamasyz etý. Jastardy baspanamen qamtamasyz etý jaǵy da qarastyrylyp jatyr, aldaǵy ýaqytta dáriger, muǵalim bolyp isteıtin jas mamandarǵa jaldamaly páterler beriledi. «Áreketke – bereket», degendeı talapty jastar úshin «Jas kásipker» baǵdarlamasy boıynsha 3 jylda bıznes bastaýǵa 60 myń grant bólinedi, – dedi vıse-mınıstr.
Jastar máselelerin qozǵaǵanda jumyssyzdyq jaǵy nazardan tys qalmady. Belgili aqyn, «Shalqar» radıosynyń dırektory Qalqaman Sarın bilim qýyp ketkenderdi sanamaǵanda, biraz jas jumys isteımin dep shetel asyp jatqanyn tilge tıek etti. Olardyń deni aýyl jastary ekenin, sondyqtan Jastar jyly qala jastary úshin ǵana emes, aýyldaǵylarǵa da jańa tynys ashatyn múmkindik bolsa degen oıyn jetkizdi.
Osy tusta áńgimege Máýlen Áshimbaev aralasyp, buryn myqty tulǵalardyń bári aýyldan túlep ushqanyn, ol sol kezdegi aýyldarda bilim berýdiń durys bolǵanyn aıtyp, sondyqtan aýyldarda bolashaq kóshbasshylardyń ósip shyǵýyna jaǵdaı jasaý kerektigin atap ótti. Onyń aıtýynsha, bul da partııanyń alǵa qoıǵan mindetteriniń biri, Elbasynyń tapsyrmasymen eldi mekenderde ınfraqurylymdy damytý úshin «Aýyl – el besigi» jobasy bastaý alady.
Sondaı-aq Nur Otan partııasy Jas Otan Jastar qanatynyń atqarýshy hatshysy Dáýlet Káribek «Dıplommen – aýylǵa!» baǵdarlamasymen 54 myń jas aýylǵa jumysqa barǵanyn, 17 aımaqta bilim ortalyqtary ashylǵanyn aıtyp, bul saýaldyń jaýabyn naqtylaı tústi.
Jastardyń jumyssyzdyqqa tap bolmaýynyń aıqyn joly – básekege qabiletti maman bolý. «Bolashaq» baǵdarlamasymen shetelde oqyp kelgen STEM akademııasynyń negizin qalaýshy Ábýtálip Mútáli IT salasynda aýqymdy jobalary baryn, biraq bul salada mamandar jetispeıtinin aıtty.
– Osy turǵyda men mynadaı usynys jasaǵym keledi. Jumysqa jastardy kóptep tartý úshin belgili bir mekemede jastardyń úlesi 30-40 paıyzdan assa, salyqty tómendetý kerek. Sonda biraz qurylymdar jas mamandardy ózderi daıyndap alar edi. Jáne buny júzege asyrýdy qaptaǵan qujat toltyrtyp qıyndatpaý kerek, – dedi IT mamany.
Áńgime tehnologııa salasyna qaraı oıysqanda, sózge «Qazaqstan» telearnasynyń júrgizýshisi Áıgerim Esenáli qosylyp, ortaǵa «búgingi kúnniń qaharmandary kimder?» degen suraq tastady. Buǵan partııa Tóraǵasynyń birinshi orynbasary «100 jańa esim» jobasynyń kózdegeni óz erkimen jetistikke jetken búgingi kúnniń qaharmandaryn taýyp, olardy halyq arasynda dáripteý ekenin aıtyp, jaýap qatty.
Jobalar jóninde sóz qozǵalǵanda forým týraly pikirler qylań berdi. Bul turǵyda Prezıdent Q.Toqaevtyń sózin basshylyqqa alyp, Jastar jyly jalań naýqanǵa aınalyp ketpesin degen másele kóterildi. Vıse-mınıstr Juldyz Omarbek Jastar jylyna arnalǵan Jol kartasy 86 tarmaqtan tursa, onyń ishinde tek beseýi ǵana forým ekenin keltirdi. Biraq onyń ishinde jastardyń bilimin ushtaýǵa baǵyttalǵan mańyzdy forýmdar bar eken. Mysaly, «Zeren 2019» jobasy 900 jasty oqytpaq.
Sonymen qatar bul otyrysta Nur Otan partııasy baspasóz qyzmetiniń jetekshisi Maksım Spotkaı áleýmettik jelilerdegi jastardyń belsendiligine toqtaldy. Onyń aıtýynsha, qazir qoǵamnyń basty oqıǵalary tek Facebook, Twitter, odan qalsa Instagramm jelisinde talqylanady. Al jastardyń deni VKontakte jelisin paıdalanady, onda negizinen oryssha mazmun kórinis beredi. Sondyqtan barlyq áleýmettik jelilerde qazaqsha kontenttiń sapasyn arttyrý kerek degendi aıtty.
Sóz sońynda «Jastar tárbıesimen kim aınalysyp jatyr?» degen ortaq saýal tóńireginde otyrysqa qatysýshylardyń árqaısysy jastar bolashaǵy jóninde bir-bir sózimen oılaryn túıindedi.
