Tuńǵyshy on segizde, al, sút kenjesi bar bolǵany eki jasar. Tirshilik qamytyn jalǵyz ózi súıreý ońaı ma, páteraqysyn ýaqytynda tóleı almaǵan soń jalǵyzilikti ana kolledjde oqyp júrgen úlken ulyn amalsyz oqýdan shyǵaryp ta alǵan. Turmys taýqymetin tartqan otbasyǵa baspana alyp bergende ana da, bala da, jınalǵan qaýym da aq túıeniń qarny jarylǵandaı qýandy.
Oblystyq meshit janynda «Zeket» qaıyrymdylyq qory osydan birneshe jyl buryn qurylǵan bolatyn. Qordyń basty maqsaty – tirshiliktiń aq bas tolqyndarymen alysqan jalǵyzilikti jandardy qoltyǵynan demeý. «El úlesi – páterge» atty áleýmettik joba sátti júzege asyp keledi. Buǵan deıin de tórt otbasyna páter alyp bergen bolatyn. Qor basshylarynyń aıtýyna qaraǵanda, páterdi satyp alý úshin qarjy jınaýǵa stýdentterden bastap zeınetkerlerge deıin qoldaý kórsetken. Sóz arasynda kókshetaýlyq jas ánshi Muratqazy Ápezhan qaıyrymdylyq konsertin ótkizip, odan túsken 500 myń teńgeni qorǵa aýdarǵandyǵyn aıta ketken lázim.
Bir jaqsysy, oblys ortalyǵynda taıaýda ǵana, Oraza aldynda ótken «Jaramazan» atty rýhanı keshte Bulandy jáne Birjan sal aýdandarynda da eki otbasyna jergilikti qaıyrymdy jandardyń kómeginiń arqasynda baspana kilti tabys etilgendigi jarııa etildi. Osylaısha, qaıyrymdy jandardyń kómeginiń arqasynda bir kúnde úsh otbasy baspanaly boldy. Jan jadyratar jaqsy is áli de jalǵasyn taba bermek.
