Resmı málimet boıynsha, elimizdegi eń alyp megapolıste jumyssyz jastardyń sany 16 myńnan asyp jyǵylady. Bul shara jastarǵa bilim berý oshaqtarynda qaı sala mamandaryna suranys kóp nemese tapshy ekenin jáne eńbek ótilinsiz de jumysqa ornalasýǵa bolatynyn anyqtaýǵa septesti. Joǵary oqý oryndarynyń túlekteri men jumyssyz jastarǵa arnalǵan bos oryndar jármeńkesin Almaty qalasy «Atameken» ulttyq kásipkerler palatasyna qarasty «Jas Qadam» qoǵamdyq qory uıymdastyryp otyr. Jármeńkege bıyl 300-den astam jumys berýshi kompanııa qatysty. Olardyń sapynda «Magnum Cash Carry» saýda jelisi, CRATA halyqaralyq zań fırmasy, DHL, HCK, Creetgo IT-kompanııasy tárizdi kóptegen irgeli ujymdar bar. Shara aıasynda 200-ge tarta bitirýshi túlek atalǵan kompanııalarda taǵylymdamadan ótýge múmkindik aldy. Oǵan qosa jastardyń bızneske degen yntasyn arttyrýǵa baǵyttalǵan semınar sabaqtar ótkizilip, kásipkerlikti damytý, turǵyn úı máselelerin sheshý, psıhologııalyq jáne zańgerlik kómek kórsetý sharalary uıymdastyryldy.
«Tuńǵysh Prezıdentimiz Nursultan Nazarbaev 2019 jyldy Jastar jyly dep jarııalap, óskeleń urpaqty jan-jaqty qoldaýǵa baǵyttalǵan is-sharalar tizbegin saralap berdi. Osy maqsatta jastarǵa arnalǵan túrli jobalar legi iske asýda. Kásiporyndar úshin – bul eńbekke qabiletti halyqtyń eń úzdik ókilderi arasynan bolashaǵy bar mamandardy tańdap alýdyń biregeı múmkindigi. Stýdentter úshin ózin áleýetti jumys berýshilerge usynýdyń ońtaıly joly. Bizdiń mıssııamyz – Qazaqstandaǵy jumyssyzdyq deńgeıin tómendetý», deıdi «SelfMade» jobasynyń úılectirýshisi Aıgúl Nısýpova.
Bos jumys oryndar jármeńkesin ótkizý jas mamandarǵa ǵana emes, jumys berýshiler úshin de mańyzdy. «Jastar ózderin qyzyqtyratyn bos oryndar týraly málimet alsa, biz úshin túlekterdiń iskerlik qasıetin baǵalaýǵa múmkindik týady» deıdi jumys berýshi uıymdardyń ókilderi.
ALMATY
