Baqytty taǵdyr

Sársenbi, 17 sáýir 2013 2:13

Áńgimelegeli otyrǵan keıipkerimizdi temirtaýlyqtar jaqsy biledi. Ol aldymen syılastyq, dostyq qurmetindegi jan turǵysynda tanymal. Arman qýǵan shaǵynda alystaǵy Aqadyr degen aýyldan Temirtaý dúbiri shaqyryp, ózindeı órender ortasyna qosylǵan kezinde taǵdyr bolashaq Tuńǵysh Prezıdentpen birge oqyp, birge eńbek etip, jaqyn aralasyp, syılasýǵa jarastyrýdy mańdaıyna jazatynyn qaıdan bilsin. «Synasýǵa jaraǵan syılasýǵa da jaraıdy» delingendeı, qatar shyńdalǵan ómir joly jarasymdy joldastyqqa jalǵastyrsa, sol qalpynda berik saqtalyp qalatyndyǵy qaıdan qaperine kelsin.
Baqytyna qaraı solaı boldy. Burynǵy áriptesterimen qaýyshý sátterinde Nursultan Ábishulynyń top ortasynan birden tanyp, qushaq ashyp, tós túıistirer Qýanysh Omashev degen kisi osy. Sondaıda Memleket basshysy men qatardaǵy azamat arasyndaǵy úzilmegen qurmet jurt júregin erekshe súısintip ótedi. Dostastyqtyń laýazym tańdamaıtyn, dáreje ekshemeıtin qadirine bólengen azamattyń mundaılyq iltıpatqa baýyr tartylýy, árıne, jaıdan-jaı emestigi anyq.
Aýyl mektebin bitirgen soń Temirtaýǵa birden tartqan shaǵynda eshqandaı mamandyǵy da, alǵa qoıǵan túpki maqsaty da joq bolatyn. Jastyq jalyn kóptegen qurby-zaman­dastaryndaı osy qalany jań­ǵyrtqan eńbek dúbiri ortasynan tabylýǵa talpyndyrǵan. Áýeli slesarlyqty, oǵan ile frezershilikti ıgerip, jumysqa belsene kirisedi. О́ndiriste ysylýy Qaraǵandy polıtehnıkalyq ınstıtýtyna oqýǵa túsýine jeńildik jasaıdy. Qatarlaryna metallýrg mamandyǵy boıynsha bilim tereńdetýge kelip qosylǵan temirtaýlyq áriptesteriniń ishinen alǵyrlyǵymen, shıraqtyǵymen birden kózge túsýshi jigit baýyrmal, ashyq minezimen baý­rap áketkeni esinde. Basqa turǵylastaryna qaraǵanda orysshaǵa da júırik, jas jaǵynan da úlkendigi bar, gornovoı retinde domna peshinde shoıyn qorytýdyń mektebinen de ótip úlgergen, sabaqqa úlgerimi de úlgili azamat aty-jóni Nursultan Nazarbaev ekenin aıtyp, óziniń de temirtaýlyq burynǵy jumysshy ekenin bilgende tipten jaqyn aralasa túsedi.
Qýanysh aǵamen áńgime ústinde aıtylyp ótilgendeı, kýrstasynyń ózgelerden ozyńqy qarym-qabileti oqý barysynda tanylyp qana qoımaı, stýdenttik qurylys jasaǵynda qoıan-qoltyq eńbek etýlerinde, Qazaqstan Magnıtkasynda óndiristik tájirıbede birge bolýlarynda baıqala bastaıdy. Iskerlik, uıymdastyrýshylyq qasıetter ushqyny Nura aýdanyndaǵy «Balyqtykól» keńshary turǵyndaryna arnalyp úıler salý kezinde aıryqsha bilinedi. Alǵashqy kúnderde jumysty úılestire de, jergilikti basshylarmen til tabysa almaı is berekesin ketirgen jetekshiniń ornyna stýdentterdiń qalaýymen qaıta saılanǵan jasaq komandıri jas Nazarbaevtyń qurylystyń júrgizilýin qolǵa alýy-aq jaǵdaıdy ózgertip sala beredi. Turalap qalǵan jumys tez jandanyp, kúzge deıin 10 shaqty turǵyn úı qonystanýshylarǵa tartý etiledi.
– Bul Nurekeńmen birge alǵash ret eńbekke etene aralasýym edi. О́zi de sharshaýdy bilmeıtin, ózgelerimizdiń de solaısha jumys isteýin qalaıtyn talaby qaıratymyzdy qaırap, jigerimizdi janydy. Kóbine mehanızatorlar men shopandar otbasy qonystanǵan úıler jandary alǵystyń úlkenin aldymen komandırimizge jaýdyrǵan bolatyn, – deıdi Kákeń.
Oqý bitirip, Temirtaýǵa oralyp, aýyr eńbektiń qaınaǵan qazanyna tap bolǵanynda mamandyǵynan aınyńqyrap, tipti ony tastap, aýylǵa qaıtý týraly da oı kelipti sol kezde jıyrmadan endi attaǵan keıipkerimizge. Eshqandaı jasyrarlyq syry joq ádetimen Nurekeńe osyndaı nıe­tin sezdirgende: «Qýanysh, bir bastaǵan isti aıaqsyz qaldyrý jón bolmas. Búgin sen aýylyńa qaıtsań, erteń men aýylyma qaı­tar bolsam, ornymyzdy kim baspaq?! Bir­tindep kúsh jınap, qýaty artyp kele jat­qan Magnıtkamyzdyń keleshegi bizdiń qo­lymyzda emes pe? Eńbekke eńseńdi tú­sir­me», deıdi. Mundaılyq oryndy aqyl-ke­ńes, qıyndyqqa moıymaýǵa jiger quıý bir ózin ǵana emes, birqatar áriptesterin de maqsattaryna beriktikti beriktirgenin rı­zalyqpen eske alady Qýanysh Omashev aǵa.
Metallýrgııalyq kombınattyń ár býynynda eńbek etkenderimen, jaqsy joldastyq qarym-qatynas úzilmeıdi. Sóz oraıynda Kákeń maqtanyshpen aıtyp ótkendeı, úılenip, jeke shańyraq kóterýine Nursultan dosy dáneker bolypty. «Jańa otaý qurýshylardyń Temirtaýdaǵy tuńǵysh komsomol-jastar toıy Zoıa Balapashqyzy jeńgeń ekeýmizdiń toıymyz boldy. Dombyra da shertetin, syrnaıda da oınaıtyn, táp-táýir ánshiligi de bar Nurekeń ony ózi basqardy. Prezıdent bolar adamnyń toı asabasy bolýy álemde tek bizde kezdesken shyǵar, sirá», degen Qýanysh Omashuly maqtanyshy shynynda maqtanarlyqtaı ǵoı.
Júzinen jylylyq esken, kókireginen nur tógilgen, bálkı, osyndaılyq minezimen qadir tutýǵa laıyq aǵamyz ot pen jalyn ótinen ótken metallýrg áriptesterindeı súıikti Temirtaýlarynyń ataq-dańqy asýyna, qaıtadan jasaryp, jasanýyna Elbasynyń úlesi úlken ekenin tereń razylyqpen ataıdy. Toǵyz jyl boıy ıyq tirestirip shoıyn qorytqan, metallýrgııa alybynyń tynysyn birge keńeıtken Arǵyn Júnisov, Nıkolaı Nazarov, Vladımır Kolbasa, Vıktor Nıkonov, Ermek Tileýbaev, Altynbek Asanov, Toqtarhan Ysqaqov,Tóleý Dúısembaev, Vladımır Kaýs syndy óndiris sańlaqtary ómir Qýanysh Omashevtaı adammen qatar eńbek etý baqyty buıyrtýyn, syılas bolýdy taǵdyrlarynyń qymbat syıy sanaıdy.
Nursultan Ábishulynyń oblysqa jumys saparlarynda birinshi kezekte Temirtaýǵa atbasyn tirep, birden bárine ystyq uıa – kombınatqa burylyp, ózderimen júzdesý sátteri árqashanda júrekterin tolqytarlyq, kóńilderin ósirerlik oqıǵa. «Qaı eldiń Prezıdenti burynǵy eńbektes áriptesterin áste umytpaı, baıaǵy qalpynsha emen-jarqyn qaljyńdasyp, erkin áńgimelesip, muń-muqtajdaryn, talap-tilekterin bilip, birge shoıyn qorytýǵa qatysyp jatady. Eńbek adamyna degen qurmetten aınymaýyna oraı «Bizdiń Nursultan Nazarbaev» dep ózimsine aıtýymyzdy maqtan tutamyz», deıdi Vladımır Kolbasa.
Keı retterde olar Qýanysh Omashevtyń shańyraǵynda bas qosyp, máre-sáre bolyp qalady. Mundaıda Elbasymen tildestirýshi Qýanysh dostaryna, oǵan ejelgi syılastyqty jaras­tyrýshy retinde rızalyqtary sheksiz. Bul kúnde úsh balasynyń úsheýi de metallýrgtik joldy jalǵastyrǵan Omashevtar ordaly áýlet retinde belgili. Otbasy qýanyshtarynda Astanadan telefon shalynǵanda «Ata, sizben Prezıdent sóıleskeli jatyr», dep jarysa daýystap, telefon qulaǵyn ala júgirip shattanatyn nemereleri ósip keledi.
Osyndaı taǵdyr buıyrǵan Qýanysh Omashev soǵan laıyq jan. Bul jaǵynan Kákeń, álbette, baqytty adam.
Aıqyn NESIPBAI,
«Egemen Qazaqstan».
 Temirtaý.