Sh.Aımanov búkil sanaly ǵumyryn teatr óneri men kıno salasyn qalyptastyrý men damytýǵa arnady. Ol – san qyrly talant ıesi. Akter retinde keıipkeriniń jan dúnıesin ashýǵa jáne soǵan laıyqty utymdy qımyl-áreketter jasaý sheberligimen erekshelense, rejısser retinde shyǵarmaǵa ıdeıalyq mazmun darytýǵa, ulttyq bolmysymyzdyń boıaýyn qanyq etýge, zaman men qoǵam týraly fılosofııalyq oı-tolǵam jasaýǵa aıyryqsha mán berýimen daralandy. Sh.Aımanovtyń rejısserligimen túsirilgen «Bizdiń súıikti dáriger», «Atameken», «Aldar Kóse», «Taqııaly perishte», «Atamannyń aqyry» sekildi kartınalar ulttyq kınonyń úzdik úlgilerine aınaldy. Bul fılmder áli kúnge deıin qalyń kórermenniń súıip kóretin kınolary qatarynda.
Músinniń ashylý saltanatyna Almaty qalasy ákimi Baýyrjan Baıbek, orynbasary Arman Qyryqbaev, KSRO halyq ártisi, Qazaqstannyń Eńbek Eri Asanáli Áshimov, Qazaqstannyń halyq ártisi, Eńbek Eri Iýrıı Pomeransev, aqyn, memleket jáne qoǵam qaıratkeri Oljas Súleımenov, KSRO halyq ártisi, Sosıalıstik Eńbek Eri Bıbigúl Tólegenova, «Taqııaly perishte» fılminiń basty keıipkerleri Álimǵazy Raıymbekov, Sholpan Altaıbaeva jáne ózge de teatr men kıno óneriniń tarlandary, Sh.Aımanovtyń urpaqtary men týǵan-týystary qatysty. Qonaqúı aldyna jınalǵan qaýymdy Sh.Aımanov músininiń ashylýymen quttyqtap, sóz alǵan Almaty qalasynyń ákimi Baýyrjan Baıbek dara tulǵanyń biregeı qasıetteri týraly jan-jaqty áńgimeledi.
– Elbasy N.Nazarbaev «Uly dalanyń jeti qyry» atty baǵdarlamalyq maqalasynda elge eńbegi sińgen, ataqty tarıhı tulǵalarymyz ben olardyń jetistikterin óskeleń urpaqqa úlgi etip dáripteý úshin eskertkish-músinder ornatý qajettigin atap kórsetken bolatyn. Sońǵy jyldardyń ózinde Elbasy tapsyrmasymen qalamyzdyń tarıhynan syr shertetin kóptegen eskertkishter boı kóterdi, 60-tan astam eleýli tulǵalar ómir súrgen úıge taqtalar ornatyldy. Aldaǵy ýaqytty Qyz Jibek pen Tólegenge, Shámshi Qaldaıaqovqa jáne Balýan Sholaqqa eskertkish ornatý josparlanǵan. Búgingi ashylyp otyrǵan Sh.Aımanov eskertkishi de Elbasy tapsyrmasynyń oryndalýynyń birden-bir kórinisi. Halqymyzdyń dańqty óner maıtalmanyna kórsetilgen qurmet.
Budan keıin eskertkishtiń shymyldyǵy túrilgende, kósheniń qarsy betindegi Abaı atyndaǵy Qazaq memlekettik akademııalyq Opera jáne balet teatryna oıly janaryn qadaı, shabytqa toly qııaly sharyqtap, kezekti týyndysyna tolǵanyp otyrǵandaı sátte beınelengen Sháken kelbeti jarq ete tústi. О́zi otyrǵan oryndyqtyń arqalyǵyn qapsyra qushaqtap, aıaqtaryn aıqastyrǵan kúıi alysqa kóz tikken. Kóz úırengen eskertkishterden erek. Músinniń kompozısııasy, ıdeıalyq sheshimi, tehnıkalyq oryndalýy shyǵarmashylyqty bárinen bıik qoıyp, únemi shabyt ústinde júrgen Sháken-sheberdiń bolmysyn qolmen qondyrǵandaı dál tapqan. Qońyrqaı tústi qoladan quıylǵan músinniń avtory – belgili músinshi Nurlan Dalbaı.
Sh.Aımanov eskertkishiniń ashylý saltanatynda onyń ǵajaıyp kartınalaryndaǵy kóktemniń ózindeı jandy baýrap alatyn kórkem ánderi oryndalyp, talanttyń kózin kórgender tebireniske toly estelikterimen bólisti. Maestronyń eshkimge uqsamaıtyn erekshe beınesiniń janynda turyp sýretke túskenderdiń qatary kópke deıin tolastamady.
