Árkez halyqtyń muń-muqtajyn jyrlap júrgen «ot aýyzdy, oraq tildi» shaıyrlar «Rýhanı jańǵyrý» baǵdarlamasy aıasynda «Uly dala án men jyry, aqyndyqtyń jeti qyry» atty shyǵarmashylyq keshin usyndy.
Aıtys sahnasynyń tarlandaryna jurtshylyq atynan jasy 90-dy alqymdap qalǵan Táshenova Sapýra qajy qurmet kórsetti. Taqııa kıgizip, oramal jaýyp, aq batasyn berdi.
Balǵynbek pen Jandarbek oneki aıdyń sultany Ramazan aıyn, ulttyq qundylyqtarymyzdy ulyqtap, sııasy kebe qoımaǵan óleńderin oqydy. Olardyń ot basy, oshaq qasyndaǵy bala tárbıesine, ata-ana róline qatysty taǵylymdy áńgimeleri talaılarǵa oı saldy. Syzylta án salǵan Sara ózge qyrynan tanylsa, Aınur kesteli jyrlarymen bólektendi.
Erik Asqarov atyndaǵy oblystyq aqyndar mektebiniń túlegi Dáýlet Qurmash pen tarazdyq Áset Dúısebaı arasyndaǵy dostyq ráýishke toly sóz qaǵysy kórermenderdiń aıyzyn qandyrdy.
Al aıtýly tórt jyr súleıiniń ózara aıtysýy sahna kórigin qyzdyryp, kesh ajaryn asha tústi. Tapqyrlyqqa, ádemi ázil-qaljyńǵa qurylǵan jyr shýmaqtary tógilip, qoǵamdaǵy keleńsizdikter, ózekti máseleler de nazardan tys qalmady. Máselen, Aınur «Bes bala tapqan anaǵa, Eki bólmeli páterden, Berilý kerek eń kemi. Balanyń jasy tyıylmaı, Anaǵa baqyt buıyrmaı, Damyǵan memleket deýimiz, Eshkim senbeıtin ertegi», deı otyryp, kópbalaly otbasylar jaıly keńinene tolǵady.
Halyqtyń kózaıymyna aınalǵan aıtys ónerin nasıhattaý, jergilikti jas aqyndarǵa qoldaý kórsetý, kópshilikke rýhanı qaınar bulaqtarymyzdyń mán-mańyzyn túsindirý maqsatyn dittegen kesh kórermender kóńilinen shyqty.
Soltústik Qazaqstan oblysy
