Qazaq dalasyna esimi erte belgili bolǵan ánshi Ǵ.Qurmanǵalıev – Muhıt ánderin jetkizýshi jáne birden-bir oryndaýshysy retinde óz súrleýin salyp, sol jińishke soqpaqty dańǵyl jolǵa aınaldyra alǵan dástúrli ónerdegi soıy bólek sańlaq. Teatr dırektory Aıa Qalıeva arnaıy uıymdastyrylǵan konferensııada: «Ǵarıfolla Qurmanǵalıev – qazaq án óneriniń iri tulǵasy, tamasha dombyrashy, jarqyldaǵan terme men jeldirmeniń qaıtalanbas oryndaýshysy. Batys Qazaqstannyń vokaldyq-aspaptyq dástúrleriniń birden-bir saqtaýshysy men izin jalǵaýshy» dedi jeztańdaı ánshiniń shyǵarmashylyǵy haqynda.
HH ǵasyrdaǵy qazaq operasynyń kórnekti ártisi túrli beınelerdiń birqatar galereıasyn jasaǵan. Onyń ishinde «Qyz Jibektegi» Shege, «Er Tarǵyndaǵy» Saqan batyr men jyraý, «Jalbyrdaǵy» Elemes, «Dýdaraıdaǵy» molda men Doldy, «Birjan – Saradaǵy» Estaı, «Abaıdaǵy» Narymbet, «Daısıdaǵy» Tıto, «Narǵyzdaǵy» Latıf jáne taǵy basqa rólderi Ǵarıfollanyń sharyqtaǵan daýys dıapazonyn kórsetetin keń tynysty dramalyq beıneler. Ol 1966 jylǵa deıin Opera jáne balet teatrynyń ánshisi boldy. Sheteldik saparlarǵa jıi shyqty. Sheteldik tyńdarmandar Ǵarıfollanyń daýysynyń biregeıligine jáne qaıtalanbas oryndaýshylyq maqamyna tamsanyp, onyń daýysyn úntaspaǵa jazyp alǵan eken. Birde biregeı qubylysqa súısingen ıtalııalyqtar Ǵarıfolla Qurmanǵalıevtiń kómeıiniń kóshirme beınesin jasaýdy uıǵarady. Bul kóshirme qazir Genýıa murajaıynda saqtaýly. Ol ushy-qıyrsyz dalanyń keńdigimen ǵana ólshenetin ańyzǵa aınalǵan daýysymen Reseı, Qytaı, Pákistan, Iran, Germanııa jurtyn da bir tyńdaǵannan baýrap alǵan.
Konsertte Qazaqstannyń eńbek sińirgen qaıratkerleri Gúlzat Dáýirbaeva, Dına Dútmaǵanbetova, Balapan Jubaeva, Bolat Bókenov, Talǵat Kúzembaı, Bolat Jomartov, halyqaralyq baıqaýlardyń laýreattary Nurjan Bajekenov, Oleg Tatamırov, Dýlat Toqanov, Esengeldi Rza, Zarına Altynbaeva, Bolat Qanaǵatov, Nadııa Nadenova, Balýan Berkenov, Jadyra Amanova sııaqty teatrdyń úsh býyndaǵy talantty ártisteri ulttyq repertýardan jekelegen arııalar oryndady. «Qyz Jibek», «Er Tarǵyn», «Birjan – Sara», «Abaı, «Aısulý», «Qamar sulý», «Eńlik – Kebek», «Aqan seri – Aqtoqty», «Alpamys», «Abylaıhan» operalarynan oryndalǵan ánder shyǵarmanyń ishki ıirimderiniń tereńdigin ǵana tanytyp qoımaı, ánshilerdiń daýysyn, kásibı múmkindigin de kópshilik aldynda aınadaı jarqyratyp kórsete aldy. «Ǵarıfolla Qurmanǵalıev halyqtyń óz arasynan shyqqan, dástúrli án óneriniń dúldúlderinen sabaq alǵan, ózi de asa aıyryqsha daýysynyń arqasynda dańqqa bólengen ǵajaıyp ánshi. Halyq ónerin batystyń klassıkalyq shyǵarmalarymen de baılanystyra alǵan daryn ıesi. Alǵashqy qazaq operasynan bastap búgingi kúni repertýarda júrip jatqan ulttyq operalardyń arasyn jalǵap jatqan kózge kórinbes tin bar. Bul konserttiń ereksheligi sonda, konserttik baǵdarlamada teatrdyń 85-jyldyq tarıhynda qurylǵan qazaqstandyq kompozıtorlardyń operalaryndaǵy arııalar men kórinisterdi usyndyq. Kópshilikke tanymal birneshe arııalardy iriktep aldyq. Sondaı-aq, Ǵarıfolla Qurmanǵalıevtiń sırek kezdesetin sýretteri, beınerolıkteri kórsetildi. Teatrdyń shyǵarmashylyq trýppasy osy keshti bizdiń jetekshi tulǵalarǵa - qazaq operasynyń damýyndaǵy barlyq adamdarǵa arnaıdy», – dep atap ótti Abaı atyndaǵy QMAOBT dırıjeri, Qazaqstannyń eńbek sińirgen qaıratkeri Músilim Ámze.
Is-shara aıasynda Arte galereıasynda án óneriniń áıgili tulǵasynyń ómirinen syr shertetin «Ǵarıfolla Qurmanǵalıev – qazaq dalasynyń ańyz ánshisi» atty foto kórme uıymdastyrylyp, tyńdarman tanymyn keńeıtetin mol málimet usynyldy.
