Elbasynyń alǵashqy baspasóz qatshysy, kórnekti rámiztanýshy, belgili qalamger hám jýrnalıst E.Shaımerdenov memleketshil minezimen, qaıratkerlik qasıetimen óz tuǵyryn qalap ketken eren tulǵa. Elin súıgen, halqynyń mádenıeti men tilin ulyqtap ótken tulǵany máńgi este qaldyrýdaǵy taǵy bir maqsatty qadam – ózi oqyǵan Ál-Farabı atyndaǵy Qazaq Ulttyq ýnıversıtetiniń jýrnalıstıka fakýltetinde Erbol Shaımerdenov atyndaǵy aýdıtorııa saltanatty túrde ashyldy.
Zamanaýı quraldarmen jabdyqtalǵan aýdıtorııanyń lentasyn ál-Farabı atyndaǵy QazUÝ-niń rektory, akademık Ǵalymqaıyr Mutanov pen aqyn, Memlekettik syılyqtyń laýreaty Nurlan Orazalın qıdy. Rektor Ǵ.Mutanov óz sózinde: «Erbol Shaımerdenov salmaqty minezine janynyń jaısańdyǵy jarasqan azamat edi. Qazaqstannyń tórt túkpiriniń jaqsylary onyń jaqyny boldy. Ol kisimen búkil Túrkııany birge aralap, saparlas bolǵan kúnderim áli kúnge jadymda jańǵyryp turady. Ásirese adamǵa erekshe áser qaldyratyn qasıeti – ol kisiniń memleketshildigi edi. Ne jazsa da, kimmen suhbat qursa da, aldymen memlekettik turǵydan oılaıtyn tereń oıly, keń júrekti azamattyǵyn baıqamaý, baǵalamaý múmkin emes. Sondyqtan Erbol sekildi tulǵalardy jastarymyzǵa úlgi etip, ónege tutý maqsatynda ózi bilim alǵan jýrnalıstıka fakýltetinen arnaıy aýdıtorııany ashyp otyrmyz. Bizdiń maqsatymyz bolashaqqa bilikti mamandar tárbıelep qosý bolsa, osy aýdıtorııanyń qabyrǵasynda órkenıetke umtylǵan eldiń qatarynan qalmaýǵa umtylǵan, bilimge qushtar jastarymyzǵa qaıratker azamattyń maǵynaǵa toly ómir joly óz taǵylymyn beredi dep senemiz» dedi.
Keń ári jaryq, jańa aýdıtorııanyń jabdyqtalýyna E.Shaımerdenovtiń otbasysy úlken kómek kórsetken. «Erbol Shaımerdenov kim boldy? El rýhanııaty aldynda qandaı eńbegi bar?» degen suraqqa tolyqtaı jaýap beretin, taqyryptarǵa bólingen qabyrǵa málimeti asa mol. Aýdıtorııada qaıratkerdiń balalyq shaǵynan bastap stýdenttik ómiri, jýrnalıstik qalyptasý jyldary, aqyndyq qyry, qaıratkerlik kelbeti, rámiztanýshylyǵy, aýdarmashylyǵy tutas kórinis tapqan.
Jıynda Erbol Shaımerdenovpen birge qyzmet istep, ómirdegi sáýleli sátterin birge bólisken áriptes aǵalary men zamandastarynyń esteligi, negizinen, bir arnaǵa toǵysyp jatty. Talǵamy bıik, tolǵamy tereń E.Shaımerdenovtiń qaı baǵytta qyzmet etse de, óz isine jaýapkershilikpen qarap, uqyptylyqpen atqarǵanyn súısine de, saǵyna da eske aldy. Belgili aqyn N.Orazalın onyń aqyn retinde erte kózge túskenin, «Pıoner» jýrnalynda qyzmet atqaryp júrgende, mektep oqýshysy bolyp júrgen onyń alǵashqy balaýsa óleńderine sát-sapar tilegenin, qaıyńdar elinen shyqqan Shaımerdenovtiń qazaq poezııasynyń qabyrǵaly shaıyry bolyp qalyptasýyna deıingi shyǵarmashylyǵynyń úzdiksiz ósý kezeńinde bolǵanyn aqyn baqytyna balady. Belgili aqyn, Memlekettik syılyqtyń laýreaty Nesipbek Aıtuly «Erbol jasaǵan úsh erlik» dep, onyń aýdarma salasynda jasaǵan akademııalyq eńbegin, qalyń orys ortasynda ósken bolashaq qalamgerdiń qazaq tiliniń qaımaǵy men máıegin bir adamdaı sińirip, táýelsizdiktiń alǵashqy jyldarynda tilge degen sol qurmeti men janashyrlyǵyn kúrespen jalǵastyrǵanyn jáne bizdiń qoǵamdaǵy rámiztaný isin ǵylym retinde qalyptastarýdaǵy eńbegin aıshyqty mysaldarmen atap ótti. «Erbolǵa aýdıtorııanyń qajeti shamaly, aýdıtorııa el erteńine jaýapty jastarymyz úshin kerek», dep túıindedi ol óz sózin.
Parlament Májilisiniń depýtattary Rahman Alshanov men Záýre Amanjolova bolmysy erek tulǵamen etene jaqyn aralasqandaryn aıtyp, qaıratkerlik qyry men jazýshylyq joly týraly júrekjardy lebizderimen bólisti. Al belgili qalamger Smaǵul Elýbaıdyń tebirenip otyryp aıtqan esteligi óz taǵdyryn el múddesimen eselegen Erbol Shaımerdenovti umytpaı, ulyqtaýǵa jıylǵan basqosýdy túıindegendeı boldy. «Azamattyń baqyty nede degen suraq týar bolsa, azamattyń eń birinshi baqyty, óz eline qyzmet etýden bastalady eken. Árbir ul men qyz óz mindeti men paryzyn laıyqty atqara bilse, ult osal bolmaıdy. Ekinshi baqyty, sol jasalǵan eńbekti, eńbek sińirgen azamatty eliniń baǵalaı bilýi. Jan-jaqty qyrymen erte tanylǵan Erbol o bastan danalyqqa qushtar edi. О́z eline Erboldaı eńbek sińirgen azamattardyń aty máńgi atalyp júrgeı, sonda ǵana halyq óz qalpynan bıikteı túsedi. Qazaqstan bıikteıdi».
