Qalyptasqan dástúrge sáıkes konferensııa eki kún boıy ótedi: Alǵashqy kúndi teorııalyq jáne ózekti máselelerge arnasa, ekinshi kún tájirıbelik daǵdylardy damytýdy pikir-talas ózegine aınaldyrmaq. Qazaqstan, Reseı jáne Qyrǵyzstannan kelgen BAQ basshylary, jýrnalıster men blogerler kommýnıkasııalar ındýstrııasyndaǵy daǵdarysqa qarsy turý, digital-trendter, ótken jyldyń eń qyzyqty keısteri sııaqty ózekti taqyryptardy talqylyp jatyr. «Biz sizdermen Almaty qalasynda qaýyshyp otyrǵanymyzǵa qýanyshtymyz. Bizdiń jyl saıynǵy konferensııamyz tek Qazaqstanda ǵana emes, jalpy Ortalyq Azııa aımaǵynyń kommýnıkasııa salasynyń basty oqıǵasyna aınalady dep úmittenemin. Osy jyldar ishinde forým tek kásibı mamandardyń ortasy emes, otandyq mamandarǵa óz tájirıbesimen bólisip, naryqtaǵy jahandyq trendter jaıly aqparat alýǵa, kásibimizdiń bedelin kóterýge múmkindik beredi» dedi Qazaqstan baspasóz klýbynyń prezıdenti Ásel Karaýylova.
Osymen on besinshi ret ótkizilip otyrǵan forým qazirgi ýaqyttaǵy eń ózekti trendterdi anyqtaýdy dástúrge aınaldyrǵan. Bıylǵy forým «Tranzıttik kommýnıkasııa – Alaman báıge» taqyrybyna aınalyp otyr. «Saılaý qarsańynda» dep atalatyn plenarly sessııa kezinde sarapshylar men spıkerler úmitkerlerdiń saılaýaldy tuǵyrnamasyna taldaý júrgizdi: Halyqpen jumys jasaý, aqparattyq kommýnıkasııalardy paıdalaný deńgeıine de kóńil bóldi. «Qazaqstan blog salasyndaǵy «Taqtar talasy»: Áleýmettik jeliniń temir taǵyna kim otyrmaq» taqyrybyna arnalǵan sessııada ınflıýenser men halyqaralyq trendtter jáne Qazaqstan naryǵyna yqpaly jóninde sóz qozǵady.
ALMATY
