Sharaına
Sársenbi, 20 aqpan 2013 7:09
Shyǵyn kólemi – 11 mıllıard dollar
Damaskide 2011 jyldyń naýryzynan beri júrip jatqan soǵys qımyldary saldarynan Sırııa ınfraqurylymyna keltirilgen shyǵyn eseptep shyǵaryldy.
Sársenbi, 20 aqpan 2013 7:09
Shyǵyn kólemi – 11 mıllıard dollar
Damaskide 2011 jyldyń naýryzynan beri júrip jatqan soǵys qımyldary saldarynan Sırııa ınfraqurylymyna keltirilgen shyǵyn eseptep shyǵaryldy.
Onyń jalpy somasy 11 mıllıard dollardy quraǵan. Onyń syrtynda Sırııa úkimeti ótken jyly ınfraqurylymnyń jáne memlekettik mekemelerdiń mańyzdy nysandaryn jóndeý úshin 11 mıllıon dollar qarjy jumsaǵan. Buǵan deıin el prezıdenti Bashar Asad Sırııanyń qarsylastary eldiń ınfraqurylymyna jáne sırııalyq azamattardyń psıhıkasyna nuqsan keltirý jumystaryn josparly túrde júrgizýde dep málimdegen bolatyn. 2011 jyldan beri jalǵasyp kele jatqan qarýly qaqtyǵys saldarynan 70 myń adam qaza tapty.
Benedıkttiń jaǵdaıy ne bolmaq?
О́z erkimen taqtan bas tartqan Rım papasy Benedıkt XVI-ǵa ashtyqtan keler qaýip joq. Taqtan ketkennen keıin oǵan aı saıyn 2,5 myń eýro zeınetaqy tólenbek.
Onyń syrtynda eks-papaǵa eshteńege alańdaýǵa jáne eshteńe úshin aqy tóleýge týra kelmeıdi. Sondyqtan da kóptegen dindarlardy Benedıkttiń óz aqshasyn qaıda jumsaıtyny qyzyqtyrýda. Otstavkadaǵy pontıfıktiń zeınetaqysy tipti demalysqa ketken kardınaldyń zeınetaqysynan da tómen. Sonymen birge, Qasıetti Petr taǵynyń murageri Benedıktke qurmetti kardınal mártebesin beretin shyǵar degen de úmit bar. Al ol onyń aıyna 5 myń eýro zeınetaqy alýyna múmkindik beredi.
Qazirgi prezıdenttiń basym jeńisi
Cedatos uıymynyń aqparattary boıynsha, Ekvador prezıdenttiginen úmitker Rafael Korrea 61 paıyz daýys jınasa, onyń eń negizgi básekelesi Gılermo Lasso 20 paıyz ǵana daýys jınaǵan.
El astanasy Kıto qalasynyń ortalyǵynda Korreanyń jaqtaýshylary birneshe saǵattan beri onyń jeńisin toılaýda. Eldiń qazirgi prezıdenti Rafael Korreanyń elde ótip jatqan saılaýdyń birinshi týrynda-aq jeńiske jetkenin exit-poll málimetteri de aıǵaqtaýda. Saılaý zańnamasyna sáıkes eger kandıdat 50 paıyz jáne plıýs 1 daýys alsa nemese eń jaqyn turǵan básekelesinen 10 paıyzǵa oza otyryp, basym daýysqa ıe bolsa, ol birinshi týrda jeńgen bolyp esepteledi.
AQSh-ta quldyq túbegeıli joıyldy
Amerıkanyń Mıssısıpı shtaty konstıtýsııaǵa engizilgen quldyqty joıatyn 13-shi túzetýdi ratıfıkasııalaǵan AQSh-tyń eń sońǵy shtaty bolyp tabylady.
Ol Mıssısıpı ýnıversıtetiniń eki ǵalymynyń qyzyǵýshylyq tanytýy arqasynda júzege asqan. Taıaýda ekranǵa shyqqan S.Spılbergtiń «Lınkoln» atty fılmin qaraǵan olar óz shtatynda quldyqtyń qashan joıylǵanyn bilmek bolǵan. Sóıtse, 1995 jyly jergilikti parlament túzetýdi engizý úshin daýys bergen, biraq onyń kóshirmesi federaldyq reestrge jiberilmegen, al ol túzetý formaldy túrde shtat aýmaǵynda kúshinde tur degendi bildiretin. Ǵalymdar jergilikti bılikke suraý salǵan soń tıisti qujattar federaldyq reestrge jiberilgen kórinedi.
Áýejaı basyndaǵy urlyq
Brıýsselde belgisiz bireýler Belgııa astanasynan Sıýrıhke jetkizbek bolǵan almastyń iri partııasyn urlap ketken.
Oqıǵa Brıýssel áýejaıynda oryn alǵan. Eki mashınaǵa otyrǵan qylmyskerler ushý alańyn bólip turǵan dýaldy buzyp ótip, ushaqqa almastardy tıep jatqan ınkassatorlyq júk mashınasyna jaqyn kelgen. Qarýmen qorqyta otyryp, shabýyl jasaýshylar almastardy óz avtomobılderine salyp, ózderi kelgen izben qashyp ketken. Shabýyl saldarynan eshkim zardap shekpegen kórinedi. Polısııa qazir tonaýshylardy izdestirýde.
Sargsıan jeńiske jetti
Armenııa prezıdenti Serj Sargsıan 18 aqpanda ótken saılaýda 58 paıyzdan astam daýys jınap, óz laýazymyn saqtap qaldy.
Eýroıntegrasııany jaqtaýshy, burynǵy syrtqy ister mınıstri Raffı Ovannısıan 20 paıyzǵa keıin qalyp, ekinshi oryn alǵan. Ortalyq saılaý komıssııasy burmalaýlar jóninde shaǵymdar bolǵan joq dep raport berýde. Al «Mıras» partııasynyń baspasóz hatshysy Ovsep Hýrshýdıan saılaýda jappaı burmalaýlar oryn aldy dep málimdegen. Saılaýdyń túpkilikti nátıjelerin Armenııanyń ortalyq saılaý komıssııasy daýys berý aıaqtalǵannan keıin 7 kúnnen soń habarlaıtyn bolady.
Mıllıarderdiń baılyǵy kimge qalady?
Germanııadaǵy eń baı adamdardyń biri jáne Metro Group nemis rıteıleriniń negizin qalaýshy Otto Baıshaım 18 aqpan kúni ózine ózi qol jumsaǵan.
Bıznesmenniń múrdesi dúısenbi kúni tańerteń óziniń Bavarııadaǵy úıinde tabylǵan kórinedi. Bild basylymynyń jazýynsha, ol em qonbaıtyn naýqaspen syrqattanǵan jáne «óz densaýlyǵynyń úmitsizdigine baılanysty» ómirmen qoshtasýǵa bel býǵan. Bıznesmenniń jasy 89-da eken. Onyń balalary bolmaǵan, 1999 jyly zaıyby qaıtys bolǵan. О́tken ǵasyrdyń 60-shy jyldarynyń sońynda usaq kóterme saýda ıdeıasyn usyna otyryp, ol 3 mlrd. dollardan asatyn baılyqqa qol jetkizgen. O.Baıshaım negizin qalaǵan Metro Group kompanııasy búginde kólemi jaǵynan álemdegi besinshi sýpermarketter jelisi bolyp tabylady.
Internet materıaldary negizinde ázirlendi.
