Sharaına
Sársenbi, 13 naýryz 2013 6:57
Vatıkanda konklav bastaldy
Keshe Astana ýaqyty boıynsha 21.30-da Vatıkanda Rım papasyn saılaý úderisiniń I týry bastaldy. Oǵan otstavkaǵa ketken Benedıkt HVI usynǵan 67 kardınal qatysatyn bolady. Olardyń jasy 80-nen aspaǵan bolýy tıis. Jalpy, Vatıkanda 115 kardınal tirkelgen.
Sársenbi, 13 naýryz 2013 6:57
Vatıkanda konklav bastaldy
Keshe Astana ýaqyty boıynsha 21.30-da Vatıkanda Rım papasyn saılaý úderisiniń I týry bastaldy. Oǵan otstavkaǵa ketken Benedıkt HVI usynǵan 67 kardınal qatysatyn bolady. Olardyń jasy 80-nen aspaǵan bolýy tıis. Jalpy, Vatıkanda 115 kardınal tirkelgen.
Sarapshylar jeńiske jetedi degen adamnyń atyn naqty aıta almaı otyr. Sondyqtan konklav birshama ýaqytqa sozylýy múmkin. Degenmen, jańa Rım papasy osy jumadan qalmaı saılanady degen de pikirler bar. Jáne ol alǵash ret eýropalyq bolmaýy da yqtımal delinip otyr. Búginde Italııa astanasynda adam nópiri kóp. Qonaq úılerde oryn tapshy. Barlyǵy jańa papanyń saılanyp, Vatıkan terezesinen kórinýine kýá bolmaq.
Tańdaý Ulybrıtanııaǵa tústi
Folklend araldarynyń turǵyndary óz aýmaqtarynyń Ulybrıtanııada qalýy mártebesin saqtaýǵa daýys berdi. Araldardyń saıası mártebesin aıqyndaýǵa baılanysty ótkizilgen eki kúndik referendým nátıjesi osyny kórsetti. Daýys bergenderdiń 98,8 paıyzy Ulybrıtanııanyń qaraýynda qalǵandy jón kóretindikterin bildirdi.
Qarsy daýys bergender 3-aq adam boldy. Daýys berýge qatysý 92 paıyzdy qurady. Aralda turatyn daýys berýge quqyly 1672 saılaýshynyń referendýmǵa 1517-si qatysty. Nátıje jarııa etilgennen keıin araldyqtar ózderiniń jeńisterin toılaýǵa kirisip ketti. Folklend araldaryna talasýshy ekinshi jaq – Argentına tarapy aral turǵyndary arasynda júrgizilgen referendýmnyń zańdy kúshi joq dep sanaıdy.
Kım Chen Yn soqqy ornyn atady
Ońtústik Koreıamen arada janjal týyndaǵan jaǵdaıda Soltústik Koreıa birinshi kezekte soqqyny Sary teńizdegi shaǵyn ǵana ońtústikkoreıalyq Pennendo aralyna beredi. Bul týraly keshe Soltústik Koreıanyń basshysy Kım Chen Yn málimdedi. Ol KHDR artıllerııa áskerleriniń shekara shepterine barǵan bolatyn.
Buıryq berilgennen soń artıllerııashylar Pennendony otqa oraýy tıis. Al otqa oranǵan jaý shepteri sýretke túsirilip, olar Ońtústik Koreıanyń basshylyǵyna jiberilýi kerek, dedi Kım Chen Yn. Sondaı-aq, ol araldaǵy basym nysanalar retinde radıolokasııalyq beketterdi, teńiz kemelerine qarsy keshenderdi, reaktıvti mınometter men ózdiginen júretin gaýbısalardy atady. Sóıtip, Koreı túbegindegi jaǵdaı ýshyǵa tústi.
Qysqa qaıyryp aıtqanda:
Bakýde soldattardyń ólimi kóbeıe túsýine baılanysty narazylyq sherýi uıymdastyrylǵan edi. Oǵan áskerde qyzmet etip kelgender men bolashaq soldattar kóptep qatysty. Balalary áskerde kóz jumǵan ata-analar da qoldaý kórsetti. Sherý polısııanyń kúshimen toqtatyldy.
Venesýela prezıdentiniń mindetin atqarýshy Nıkolas Madýro óziniń kandıdatýrasyn resmı túrde el prezıdenttigine usyndy. Ol qaıtys bolǵan prezıdent Ýgo Chavestiń izbasary bolyp tabylady.
Reseı lıberal-demokrattarynyń serkesi Vladımır Jırınovskıı «Ádiletti Reseı» partııasynan depýtat Dmıtrıı Gýdkovty «otanyn satqan» dep aıyptady. D.Gýdkov AQSh-qa sapar jasap, onda Reseıdi synaǵan turǵyda sóz sóılese kerek.
Kremldegilerdiń eńbekaqysy qansha?
Reseı prezıdenti ákimshiligi men úkimet apparaty qyzmetkerleriniń eńbekaqysy sońǵy birneshe aıda eki eseden astamǵa ósken. Bul týraly keshe, ıaǵnı 12 naýryzda «Forbs» jýrnalynda jarııalanǵan maqalada aıtylady.
Eger departament dırektory buǵan deıin 125 myń rýbl (toqsandyq syıaqyny qospaǵanda) alyp kelse, 1 qańtardan bastap 300-330 myń rýbl alatyn bolǵan. Vıse-premerdiń kómekshisi burynǵy 70-90 myńnyń ornyna 190 myń rýbl alatyn bolyp otyr. О́ziniń ákimshiligi qyzmetkerleriniń eńbekaqysyn kóterý týraly jarlyqqa Reseı prezıdenti Vladımır Pýtın úshinshi merzimge saılanysymen qol qoıǵan kórinedi.
Rembrandtyń kartınasy tabyldy
Osydan jeti jyl buryn urlanǵan Rembrandtyń «Áke portreti» kartınasy Serbııadan tabylǵan. Kartınany 2006 jyly Novı-Sade mýzeıinen eki belgisiz urlap ketken bolatyn. Endi ataqty kartına Belgradtyń túbindegi Sremsk-Mıtrovısa qaýymdastyǵynan tabylyp otyr.
Urlyqqa qatysy bar degen 4 adam qamaýǵa alynǵan. Biraq olardyń kimder ekeni jáne olarǵa aıyp taǵylǵany ne taǵylmaǵany ázirshe belgisiz. Kezinde mýzeıden «Áke portretimen» qatar, Rýbenstiń «Senekanyń ólimi», sondaı-aq, Per Franchesko Mol men HVI ǵasyrdaǵy belgisiz sýretshiniń kartınalary da urlanǵan edi. Qalǵan kartınalar ázirshe tabylmaı otyr. Bul jumystardyń jalpy baǵasy birneshe mıllıon eýroǵa baǵalanady. Rembrandt atalǵan kartınasyn 1630 jyly jazǵan bolatyn.
Saqtyq sharalary qolǵa alynýda
Bishkekte búgin mıtıng uıymdastyrylady. Onyń bastaýshylary oppozısııa bolyp otyr. Shara tártipsizdikter men zorlyq-zombylyqqa jáne urlyq-qarlyqqa ulaspas úshin aldyn ala saqtyq sharalary qarastyrylyp jatyr.
«Biz jumyldyrý sharalaryn júzege asyryp jatyrmyz. Mıtıng kezinde Bishkek kóshelerin kúzetýge 1,5-2 myń drýjınnık shyǵatyn bolady», dep málimdegen Bishkek qalalyq ishki ister basqarmasynyń basshylyǵymen kezdesýi kezinde drýjınalar kóshbasshylary. Mılısııa tarapynan tártip saqtaýǵa shamamen 100 adam shyǵarylmaq kórinedi. Al qaladaǵy jalpy tártipti 1,3 myń mılısıoner saqtaıtyn bolady. Sherý maqsaty – bıliktiń ketýin talap etý.
Internet materıaldary
negizinde ázirlendi.
