Festıval Mádenıet jáne sport mınıstrliginiń qoldaýymen «Jahandaǵy zamanaýı qazaqstandyq mádenıet» baǵdarlamasynyń aıasynda ótkizildi. Tórt kún boıy Opera jáne balet teatrynda dúbirlep ótken klassıkalyq ónerdiń merekesi ońdy-soldy ótkiziletin qatardaǵy kóp jobalardyń biri emes, jalpy qazaq mádenıetindegi aıtýly oqıǵa retinde qabyldandy.
Festıvaldyń maqsaty – ulttyq jáne sheteldik opera, balet klassıkalaryn nasıhattaý jáne dáripteý, Qazaqstan halyqtarynyń mýzykalyq dástúrlerin saqtaý jáne damytý. Festıval baǵdarlamasyna teatr repertýarynyń altyn qoryn quraıtyn jáne ondaǵan jyldar boıy kórermenderdiń turaqty suranysy men súıispenshiligine ıe bolǵan spektaklder engizilgen. Festıval qonaqtary búgingi kúnge deıin repertýardan túspeı kele jatqan baıyrǵy qoıylymdarǵa jańa ári batyl kórkemdik ózgerister engizgen rejısserler eńbegin joǵary baǵalaı otyryp, ózgeshe pishin, jańa mazmun tapqan týyndylardy jyly qabyldady. Atap aıtqanda, festıvaldyń shymyldyǵy teatr repertýarynyń basty qoıylymyna aınalǵan A.Jubanov pen L.Hamıdıdiń «Abaı» operasymen ashylyp, Ajardyń arııasyn oryndaý úshin «Astana Opera» teatrynan Qazaqstannyń halyq ártisi, Memlekettik syılyqtyń laýreaty Nurjamal Úsenbaeva 35 jyl eńbek etken tól teatryna arnaıy shaqyryldy. Qoıylymǵa halyqaralyq baıqaýlardyń laýreaty Erbolat Ahmedııarov dırıjerlik jasady.
Sahna dekorasııasyn tolyǵymen ózgertip, týyndyny barynsha túrlendirgen ıtalııalyq rejısserdiń jumysy jetpis bes jyldyq tarıhy bar operanyń jańasha sıpatta baǵalanýyna jol ashty. Túrli jyldarda Belgrad fılarmonııalyq orkestrimen, Fransýz ulttyq orkestrimen, Dat radıosynyń sımfonııalyq orkestrimen, Berlın sımfonııalyq orkestrimen, Berlın nemis jáne komıkster operasymen, Shvesııanyń Koroldik operasymen jáne Úlken Bordo teatrymen birge jumys istegen maestro Dorıan Ýılson da AQSh-tan arnaıy shaqyrylyp, onyń dırıjerligimen sahnalanǵan S.Prokofevtiń «Romeo men Djýletta» baletiniń burynǵydan ózgeshe, jańa boıaýmen árlene túskenin kórermen birden baıqady. Solıster Dmıtrıı Sýshkov pen Qazaqstannyń eńbek sińirgen qaıratkeri Janel Tókeeva jáne Azamat Asqarovtyń aıaq ushymen shyr aınalyp, san márte áýede qalyqtaǵan bıshilik sheberligi kórermender tarapynan joǵary baǵalandy.
Qazaqstandyq rejısser, Qazaqstannyń eńbek sińirgen qaıratkeri Láılim Imanǵazınanyń sahnalaýyndaǵy J.Bızeniń «Karmen» operasy da festıvaldaǵy anshlagpen ótken qoıylymdardyń biri boldy. Hozeniń partııasyn Egıpet operasynyń ánshisi Hannı Abdelzaher oryndady. Ol G.Donısettıdiń «Mahabbat sýsynyndaǵy» Nemorıno, V.A.Mosarttyń «Sıqyrly sybyzǵy» operasyndaǵy Tamıno, J.Bızeniń «Karmenindegi» Hoze, Dj. Pýchchınıdiń «Týrandot» operasyndaǵy Kalaf, Dj. Verdıdiń «Travıatasyndaǵy» Alfredo jáne taǵy basqa partııalarymen bekzat ónerdiń tabynýshylary arasynda esimi keń tanylǵan ánshi. Al «Karmenge» álemdik mýzyka óneriniń shyńyna birden shyqqan jas ári talantty dırıjer, sheteldik kórermenderge ózindik stılimen, áýendi bar yqylasymen tereń sezinetin mýzykant retinde tanymal Krıstofer Okeısek (AQSh) dırıjerlik jasady. Áıgili dırıjer ár kezeńderde qazirgi zamannyń kórnekti ártisteri Plasıdo Domıngo, Ermonela Iаho, Artýro Chakon-Krýs, Maıkl Fabıano jáne Karıne Babadjanıanmen seriktes bolǵan.
Festıvaldaǵy este qalatyn eń jarqyn oqıǵanyń Marııa teatrynyń solısteri Oksana Skorık jáne Reseıdiń eńbek sińirgen ártisi Evgenıı Ivanchenkonyń qatysýymen qoıylǵan P.I. Chaıkovskııdiń «Aqqý kóli» baletimen baılanysty bolǵanyn erekshe atap ótken abzal. «Astana Opera» teatrynan kelgen Arman Orazǵalıevtiń dırıjerligimen usynylǵan spektakl bastalmas buryn kórermender úshin «Aqqý kóliniń qupııasy» taqyrybynda dáris oqyldy. Búkil álemniń úlken-kishi teatrlarynyń barlyǵynda ǵasyrdan astam ýaqyt qoıylyp kele jatqan eń ataqty balettiń tarıhy men tanymaldylyq qupııasy týraly balet synshysy jáne «Qazirgi zamanǵy horeografııa ortalyǵynyń» dırektory Flıýra Mýsına áńgimeledi.
Sondaı-aq «Qazaq opera teatrynyń ańyzdary» atty taqyryppen Abaı atyndaǵy akademııalyq opera jáne balet teatry murajaıynan alynǵan sırek kezdesetin muraǵattyq fotosýretter men opera jáne balet óneri ańyzdarynyń sahnalyq kostıýmderinen biregeı toptama kórsetildi. Festıval aıasynda teatr solısteri men festıval qonaqtarynyń jaqynyraq tanysýy úshin «Zavtrak so smyslom» atty jańa joba usynylyp, onda olar súıikti ártisterimen birge hosh ıisti kofe men tańdaýly shaıdan iship, syrly suhbat quryp, mereke áserimen bólisti.
ALMATY
