Memlekettik basqarý júıesin jetildirý jónindegi sharalar týraly
Qazaqstan Respýblıkasy Konstıtýsııasynyń 44-babynyń 5) tarmaqshasyna, «Qazaqstan Respýblıkasynyń Prezıdenti týraly» Qazaqstan Respýblıkasy Konstıtýsııalyq zańynyń 17-1-babyna sáıkes memlekettik qyzmet júıesin jáne sybaılas jemqorlyqqa qarsy is-qımyldy odan ári jetildirý maqsatynda QAÝLY ETEMIN:
1. Qazaqstan Respýblıkasynyń Memlekettik qyzmet isteri jáne sybaılas jemqorlyqqa qarsy is-qımyl agenttigi Qazaqstan Respýblıkasynyń Memlekettik qyzmet isteri agenttigi bolyp qaıta atalsyn. Qazaqstan Respýblıkasynyń Memlekettik qyzmet isteri agenttigi memlekettik qyzmet jáne memlekettik kórsetiletin qyzmetterdiń sapasynyń saqtalýyn baqylaý salasyndaǵy ýákiletti memlekettik organ bolyp tabylady dep belgilensin.
2. Qazaqstan Respýblıkasynyń Memlekettik qyzmet isteri jáne sybaılas jemqorlyqqa qarsy is-qımyl agenttiginiń Sybaılas jemqorlyqqa qarsy is-qımyl ulttyq bıýrosy (Sybaılas jemqorlyqqa qarsy qyzmet) Qazaqstan Respýblıkasynyń Prezıdentine tikeleı baǵynatyn jáne esep beretin memlekettik organ retinde Qazaqstan Respýblıkasynyń Sybaılas jemqorlyqqa qarsy is-qımyl agenttigi (Sybaılas jemqorlyqqa qarsy qyzmet) bolyp qaıta qurylsyn. Sybaılas jemqorlyqqa qarsy is-qımyl agenttigi (Sybaılas jemqorlyqqa qarsy qyzmet) sybaılas jemqorlyq qylmystyq quqyq buzýshylyqtaryn anyqtaýdy, jolyn kesýdi, ashýdy jáne tergeýdi júzege asyratyn quqyq qorǵaý organy bolyp tabylady dep belgilensin.
3. «Qazaqstan Respýblıkasy Prezıdentiniń Ákimshiligi týraly erejeni bekitý týraly» Qazaqstan Respýblıkasy Prezıdentiniń 2008 jylǵy 11 naýryzdaǵy № 552 Jarlyǵyna (Qazaqstan Respýblıkasynyń PÚAJ-y, 2008 j., № 12-13, 116-qujat) mynadaı ózgeris pen tolyqtyrý engizilsin:
joǵaryda atalǵan Jarlyqpen bekitilgen Qazaqstan Respýblıkasynyń Prezıdentine tikeleı baǵynatyn jáne esep beretin memlekettik organdardyń tizbesinde:
«Qazaqstan Respýblıkasynyń Memlekettik qyzmet isteri jáne sybaılas jemqorlyqqa qarsy is-qımyl agenttigi» degen jol mynadaı redaksııada jazylsyn: «Qazaqstan Respýblıkasynyń Memlekettik qyzmet isteri agenttigi»;
mynadaı mazmundaǵy jolmen tolyqtyrylsyn:
«Qazaqstan Respýblıkasynyń Sybaılas jemqorlyqqa qarsy is-qımyl agenttigi (Sybaılas jemqorlyqqa qarsy qyzmet)».
4. Qazaqstan Respýblıkasy Prezıdentiniń Ákimshiligi Qazaqstan Respýblıkasy Qaýipsizdik Keńesiniń Apparatymen birlesip bir aı merzimde:
1) Qazaqstan Respýblıkasy Prezıdentiniń qaraýyna Qazaqstan Respýblıkasynyń Memlekettik qyzmet isteri agenttiginiń jáne Qazaqstan Respýblıkasynyń Sybaılas jemqorlyqqa qarsy is-qımyl agenttiginiń (Sybaılas jemqorlyqqa qarsy qyzmet) tóraǵalarymen birlesip: agenttikter týraly erejelerdiń jobalaryn;
Qazaqstan Respýblıkasynyń Memlekettik qyzmet isteri jáne sybaılas jemqorlyqqa qarsy is-qımyl agenttiginiń shtat sanyn qaıta bólý jóninde usynystar engizsin.
2) osy Jarlyqty iske asyrý jóninde ózge de sharalardy qabyldasyn.
5. Osy Jarlyq qol qoıylǵan kúninen bastap qoldanysqa engiziledi.
Nur-Sultan, Aqorda, 2019 jylǵy 13 maýsym, №12
