Alda atqarylatyn mindetter áli de kóp. Birinshi kezekte Qazaqstan Halqy Assambleıasy tóraǵasynyń orynbasary – QR Prezıdentiniń Ákimshiligi QHA hatshylyǵynyń meńgerýshisi Janseıit Túımebaev memlekettiń jastar saıasatyn júzege asyrýda belsendirek bolýǵa shaqyrdy. Ol forýmda jasaǵan baıandamasynda Prezıdent Qasym-Jomart Toqaevtyń ulyqtaý rásiminde sóılegen sózinde el jastaryna erekshe úmitpen qarap otyrǵanyna nazar aýdartty. Memleket basshysy: «Senderdiń aldaryńda Qazaqstan damýynda sheshýshi ról atqaratyn mindet tur. Meniń mindetim – senderdiń eń úlken armandaryńdy júzege asyrý jáne ózderińniń jeke tarıhı jetistikterińdi qurý úshin barlyq múmkindikterdi jasap berý», degen bolatyn. Alda atqarylatyn aýqymdy ári kúrdeli jumystyń jaýapty bóligi jastardyń ıyǵyna artylatynyn ár sanaly jastyń tereń sezinýi tıis ekenin eske saldy.
Búginde memleket jastardy qoldaý boıynsha birneshe baǵdarlamalardy júzege asyrýda: «Jastar – el tiregi» arnaıy jobasy, kásipkerlik ıdeıalardy damytýǵa baǵyttalǵan «Jas kásipker» baǵdarlamasy – sol maqsattyń aıqyn kórinisi. Aldaǵy ýaqytta da jastar startaptaryn qoldaıtyn, jastardy jumyspen qamtamasyz etýge baılanysty aýqymdy baǵdarlamalar qolǵa alynady. Eti tiri, bilimdi, uıymdastyrýshylyq qabileti zor jas basqarýshylar úshin memlekettik qyzmettiń barlyq deńgeıinde kadrlyq rezerv qurylady. Janseıit Túımebaev jastardy osy baǵdarlamalarǵa qatysýǵa, QHA alańyndaǵy eń úzdik jastar ıdeıasyn júzege asyrýǵa kómektesetin Jastar jyly – dangyl jol jobasy negizinde jastardyń áleýmettik ósý múmkindigin keńeıte túsýge shaqyrdy.
Bıylǵy jyly Assambleıa taǵy da birneshe qyzyqty jobalardy – áleýmettik hakaton, «Aýyl ákimi bolǵym keledi!» jobasy, «Jastar sınergııasy – 2019» forýmyn ótkizýdi josparlap otyr. Joǵary oqý oryndarynda «Jarasym» klýbynyń jelilerin keńeıte túsý de Assambleıanyń jastar qanaty aldynda turǵan úlken mindetterdiń biri.
Sondaı-aq, jıynda el aımaqtarynan kelgen jastar saraptamalyq top pen kásipkerlerge óz avtorlyǵymen ázirlengen startap jobasyn tanystyrdy. «Rýhanı jańǵyrý» baǵdarlamasynyń kezeńderin júzege asyrýdy maqsat tutqan shara aıasynda «Qazaqstannyń 100 jańa esimi» jobasynyń jeńimpazdary óz jetistikteriniń syrymen bólisti. О́ıtkeni forýmdy uıymdastyrýdaǵy maqsat ta sol – jastardy bilim alýǵa úndeý jáne bos ýaqyttaryn tıimdi, ári belsendi ótkizýdiń joldaryn ortaǵa salý, Jastar jyly aıasynda jańa ıdeıalar men jobalardy qoldaý, sondaı-aq, «Qazaqstannyń 100 jańa esimi» jobasy jeńimpazdarynyń jetistikterimen tanystyrý bolatyn. Forým el ekonomıkasynyń damýyna sep bolatyn jastardyń tyń jobalaryna qoldaý kórsetýdi kózdep otyrǵandyqtan, barlyq óńirden shaqyrylǵan belsendi jastar ónertabystaryn nazarǵa usyndy. Rasynda da, jastar jıynǵa tyń bastamalarymen kelip, ózderiniń ıdeıasynan týǵan aýylsharýashylyq, ekologııalyq, áleýmettik salalardy damytýǵa negizdelgen jobalarymen jarysa tanystyryp jatty. Almaty oblysynyń jastary pisip-jetilip, dáleldengen daıyn jobasyna ınvestorlar izdeýge kirisse, qyzylordalyq jastar úsh tildi damytý jobasynyń nátıjesin kórsetýge asyq.
Forýmnyń jas qatysýshylary úshin «Jetistik tarıhy» atty motıvasııalyq kezdesýler men jastarǵa kóshbasshylyq daǵdylardy sińirýge baǵyttalǵan ınteraktıvti semınar-trenıngter uıymdastyrylyp, olar jyldam damyp kele jatqan aqparattyq kezeńniń ilkimdi isterin úıretýge úndeıtin paıdaly ıdeıalardan qanattanyp shyqty.
ALMATY
