Basyp ketedi de, qashyp ketedi
Sársenbi, 13 naýryz 2013 6:59
Ázirge aty-jóni belgisiz bir júrgizýshi kúni keshe ǵana Jambyl oblysynda bir áıeldi qaǵyp, qashyp ketti. Qaqsa qaqqan shyǵar, abaısyzda ne bolmaıdy dersizder. Biraq, ol nege qashady? Qashýdyń ornyna zardap shekken adamǵa der kezinde kómek kórsetpeı me? Biraq, ol óıtken joq. Mine, sonyń saldarynan álgi áıel jol-kólik oqıǵasy bolǵan jerde kóz jumdy. Oqıǵa Jambyl aýdanyna qarasty Túrkisib aýylynda oryn aldy. Qazir atalǵan is boıynsha oblystyq IID tártip saqshylary tergeý amaldaryn júrgizip jatyr.
Sársenbi, 13 naýryz 2013 6:59
Ázirge aty-jóni belgisiz bir júrgizýshi kúni keshe ǵana Jambyl oblysynda bir áıeldi qaǵyp, qashyp ketti. Qaqsa qaqqan shyǵar, abaısyzda ne bolmaıdy dersizder. Biraq, ol nege qashady? Qashýdyń ornyna zardap shekken adamǵa der kezinde kómek kórsetpeı me? Biraq, ol óıtken joq. Mine, sonyń saldarynan álgi áıel jol-kólik oqıǵasy bolǵan jerde kóz jumdy. Oqıǵa Jambyl aýdanyna qarasty Túrkisib aýylynda oryn aldy. Qazir atalǵan is boıynsha oblystyq IID tártip saqshylary tergeý amaldaryn júrgizip jatyr. Jalpy, oblysta jol-kólik oqıǵasy sońǵy jyldary jıi oryn alýda. Osydan birneshe jyl buryn Almaty-Tashkent jolynyń Merki aýdany aýmaǵynda bir avtobýs apat bolyp, birden 21 adamnyń kóz jumǵanyn qabyrǵamyz qaıysa otyryp jazǵanbyz. Jýyrda osy baǵyttyń Kúıik asýynda Ońtústik Qazaqstan oblysynan shyqqan 2 avtobýs jol tazalap júrgen tehnıkaǵa soqtyǵysyp, taǵy da birneshe adam opat boldy. Osy jaǵdaıǵa alańdaǵan oblys ákimi Q.Bozymbaev, tipti, Úkimet basshysy S.Ahmetovke birqatar usynyspen shyqty. Biraq, apat tıylar emes. Jaqynda ǵana Almaty-Tashkent baǵytynda taǵy da jol-kólik apaty oryn alyp, adam shyǵynyna jol berildi. Demek, oblys basshysy bekerge alańdap otyrǵan joq.
Mine, jyldyń bastalǵanyna úsh aı da tolǵan joq. Biraq osy ýaqyt ishinde oblysta 23 jol-kólik oqıǵasy tirkelip, 5 búldirshin kóz jumsa, 25 sábı jaraqat alypty. Al oblys ortalyǵy – Taraz qalasynda 7 jol-kólik oqıǵasy tirkelip, 8 bala jaraqat alǵan. Málimetke júginsek, jol-kólik oqıǵasyna tap bolǵan balalardyń jasy 10 men 14 jastyń arasynda. Al qaza tapqan balalardyń ortasha jasy 7-de eken.
Júrgizýshilerdiń tikeleı kinásinen (jaıbaraqattyq, nemkettilik, salaqtyq, dórekilik jáne t.b.) eresek adamdarmen birge balalardyń da kóz jumyp, múgedek bolyp qalýy alańdatpaı qoımaıdy. О́tken jyly, mysaly, jol-kólik apatynan 22 báıkúná sábı kóz jumsa, 177 bala jaraqat alǵan.
Úkimet búginde jol-kólik apatyn boldyrmaýdyń barlyq sharalaryn jasap jatyr. Onyń júzdegen mysaly bar. Sonyń biri – «Batys Eýropa – Batys Qytaı» tranzıttik dálizi. Bizdiń júrgizýshilerdiń dórekiligi men salaqtyǵynan, mine, osy dańǵyraǵan joldyń ózinde de jol-kólik oqıǵasyna jıi jol berile bastady. Jekemenshik avtobýs ıeleri men onyń júrgizýshilerine aqsha qandaı qajet bolsa, memleketimizge adam ómiri de aýadaı qajet. О́ıtkeni, eldiń eń basty baılyǵy – adam. Tasymal qyzmetin moıyndaryna aldy eken, adam taǵdyryna da basymen jaýap bergenderi jón. Muny nege basa aıtyp otyrmyz? О́ıtkeni, sońǵy jyldary jol-kólik apatyn jasaǵan transporttardyń 32-i avtobýs bolyp otyr. Sol jol-kólik oqıǵasynyń saldarynan 12 adam shyǵyn bolsa, 58-i jaralanǵan. Jaralanǵan degen jaı sóz, kemtar, múgedek bolyp qalýlary da múmkin ǵoı.
Oblys ákimi Q. Bozymbaev jaqynda ótken bir jıynda oblystyq IID bastyǵy B.Aımaǵambetovke: «Almaty-Tashkent jolynyń boıymen 300 shaqyrym júrip óttim. Sol ýaqyttyń ishinde Almaty oblysy aýmaǵynan nebary 2 jol polıseıin kórsem, al Qordaı mańyndaǵy joldyń azǵantaı bóliginen 8 jol polıseıin kezdestirdim. Olar jyldamdyqty baqylaıtyn beınekamerany qoıady da, ózderi tasada tyǵylyp turady. Muny júrgizýshilerdi bopsalaý tásili dep baǵalamasqa shara joq. Aıtaıyn degenim, jol polıseıleriniń mindeti – áıteýir bir júrgizýshini ustap alý emes, kerisinshe jol-kólik apatynyń aldyn alý. Sondyqtan, jyldamdyq ólshegishti qoısa qoısyn, biraq júrgizýshilerden jasyrynbaı, ashyq jerde tursyn», dedi.
Túsinetin bas bolsa, jaı aıtylǵanmen óte aýyr sóz.
Kósemáli SÁTTIBAIULY,
«Egemen Qazaqstan».
Jambyl oblysy.
