Aýyl áıelderine arnalǵan múmkindik

Solardyń biri – «Jasyl» ekonomıka jáne G-Global-dy damytý koalısııasy» uıym­das­tyrǵan  áleýmettik jo­ba. Osy joba arqyly aýyl áıelderi jeke kási­bin bastaýǵa bolady. Joba negizinde 10 adamǵa 4 myń dollar turatyn grantty utyp alýǵa múmkindik bar. Bul jóninde bar­lyq má­limetti óńirlerde bas­talatyn aýyl áıel­deri­niń oblystyq forýmdarynda bilýge bolady.

Aýyl áıelderiniń II Respýblıkalyq forýmyn ótkizýge arnalǵan brıfıngte sóz al­ǵan Parlament Májilisiniń depýtaty, forým­dy uıymdastyrý komıtetiniń tóraǵasy Maıra Aısına atalǵan shara aýyldyń áleýetin kóterý, áıelderdiń múmkindigin arttyrýǵa ba­ǵyt­talǵanyn aıtty. «Ár áıelge – is, eli­mizge – tabys» degen uranmen bıyl ekinshi ret ótkeli otyrǵan forýmdy Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııasy, sondaı-aq Eýropalyq basqarý jáne damý banki qoldady», dedi komıtet tóraǵasy. Onyń aıtýynsha, bıylǵy aýyl áıelderiniń respýblıkalyq forýmy 7-9 qa­rasha aralyǵynda elordada ótpek. Oǵan deıin osy aýqymdy sharaǵa daıyndyq retinde ob­lystyq forýmdar 4 shildede Almaty oblysynda bastaý alyp, qazan aıynda Qyzylorda oblysynda aıaqtalady. Oblystyq forýmdar ár óńirde eki kún bolady, onda túrli tre­nıng­ter, memlekettik jáne jekemenshik jobalardyń túsindirý jumystary, konsýltasııalar men kásipker áıelderdiń yntalandyratyn baıandamalary josparlanǵan.

Forým jumysynyń barysymen keńirek ta­nystyrǵan «Jasyl» ekonomıka jáne G-Global-dy damytý koalısııasy» basqarma tór­aǵasy Saltanat Raqymbekova 14 oblys­ta da  forýmnyń bastalǵanyn jetkizdi. «Biz byl­tyrǵy aýyl áıelderiniń respýblıkalyq I forýmynda 250 kóshbasshy názik jandardy iriktep, marapattadyq. Olar – qazir tamasha tre­nerler. Kóshbasshy qyz-kelinshekterdiń sózi, isi, oıy men árbir áreketi kásipti endi bas­tamaq aýyl áıelderin sózsiz shabyttandy­ra­dy», deıdi. Onyń málimdeýinshe, koalısııa qoǵamdyq uıym retinde óz jumysyn bas­taǵan oblystyq forýmdardyń kún tártibi sheń­berinde úsh bastama uıymdastyrypty. Olar: «Aýyl – el besigi» arnaıy jobasyn qoldaý jónindegi memorandýmǵa qosylý, «Aýyldy turaqty damytý úshin úzdik tájirıbeler men bastamalar» onlaın-platformasy quryldy, sondaı-aq jetistikke jetken aýyl  áıelderiniń respýblıkalyq marafony jarııalandy.