Bıýdjetten jegenniń búıiri tolmaıdy
Seısenbi, 23 sáýir 2013 3:15
Qostanaıda jalǵan kásiporyndar memleketti 1 mlrd. teńgeden astam shyǵynǵa batyrdy
Qostanaı oblysyndaǵy jalǵan kásiporyndar memleketke 1 mlrd. teńgeden astam somanyń zııanyn keltirdi. Bulardyń negizgi bóligi salyq pen basqa da mindetti tólemderdi aınalyp ótý arqyly zańsyz aqsha aınalymyn jasaýǵa mamandanyp alǵan mekemelerdiń úlesine tıedi.
Seısenbi, 23 sáýir 2013 3:15
Qostanaıda jalǵan kásiporyndar memleketti 1 mlrd. teńgeden astam shyǵynǵa batyrdy
Qostanaı oblysyndaǵy jalǵan kásiporyndar memleketke 1 mlrd. teńgeden astam somanyń zııanyn keltirdi. Bulardyń negizgi bóligi salyq pen basqa da mindetti tólemderdi aınalyp ótý arqyly zańsyz aqsha aınalymyn jasaýǵa mamandanyp alǵan mekemelerdiń úlesine tıedi.
– Osy kezge deıingi jedel-tergeý tájirıbesi kórsetkendeı, memleketke meılinshe iri mólsherde zalal keltiretinder salyq pen bıýdjetke mindetti tólenýge tıisti basqa da tólemderdi aınalyp ótip, aqsha qarajatyn zańsyz qolma-qol aqshaǵa aınaldyryp berýge mashyqtanyp alǵan jalǵan kásiporyndar bolyp otyr, – dedi jýrnalıstermen kezdesýinde oblystyq sybaılas jemqorlyqqa jáne ekonomıkalyq qylmysqa qarsy kúres departamenti bastyǵynyń birinshi orynbasary Talǵat Bashev.
Ol óz sóziniń dáleli retinde 2011 jylǵy qarasha aıynda Qostanaıda zańdy kásipkerlik jasaýǵa eshqandaı da nıeti bolmaǵan birneshe kásiporynǵa qarsy qylmystyq is qozǵalǵanyn keltirdi. Olar salyqty tólemeý arqyly memleketke 1 mlrd. teńgeniń ústindegi somada shyǵyn keltirgen bolyp shyqty.
Taǵy bir mysal, zańdy bıznespen aınalysýǵa eshbir qulqy bolmaǵan T.Tólekov esimdi jalǵan kásipker 2010-2011 jyldary áli tergeý anyqtaı qoımaǵan kúmándi tulǵalarmen kelisimge kelip, «DOS Plus KZ» JShS men «Optsnabservıs» JShS-nyń rekvızıtterin is júzinde atqaryla qoımaǵan jumystar úshin shot-faktýra toltyrýǵa paıdalanǵan. Osy arqyly ol memleketke 36 mln. teńgeden astam zalal keltirgen.
– Jedel-izdestirý sharalarynyń nátıjesinde Tólekov osyndaı jalǵan kásiporynǵa jazyp bergen jalǵan shot-faktýralary úshin 800 myń teńge kóleminde syıaqy alyp jatqan kezinde qolǵa tústi, – dep málimdedi T.Bashev.
Názıra JÁRIMBETOVA,
«Egemen Qazaqstan».
QOSTANAI.
