Sharaǵa elimizdiń Ulttyq ekonomıka vıse-mınıstri Jaslan Mádıev, Ázerbaıjan Ekonomıka vıse-mınıstri Sahıb Mamedov, Qyrǵyz Respýblıkasy Ekonomıka vıse-mınıstri Eldar Abakırov, Túrkııa Saýda vıse-mınıstri Rıza Týna Týragaı, Túrki keńesiniń Bas hatshysy Baǵdat Ámireev jáne «Astana» halyqaralyq qarjy ortalyǵynyń basqarýshysy Qaırat Kelimbetov qatysty.
– Túrki keńesine múshe elderdiń memleket basshylarynyń joǵary deńgeıdegi qatynastary memleketter arasyndaǵy baılanysty nyǵaıtyp, qazir ekonomıkalyq vedomstvolary deńgeıinde órbigeni biz úshin úlken jetistik. Elbasy Nursultan Nazarbaevtyń bastamasymen qurylǵan «Astana» halyqaralyq qarjy ortalyǵy ekonomıkaǵa memlekettiń qatysýyn azaıtýǵa jáne jekeshelendirýge múmkindik beredi. Qarjy ortalyǵy – postkeńestik elderde aǵylshyn zańymen jumys isteıtin jalǵyz alań. Osy oraıda týysqan túrki elderiniń ekonomıka isteri jónindegi mınıstrleriniń 9-shy otyrysyn ótkizý bizdiń qarjy ortalyǵymyz úshin de úlken abyroı. Túrki keńesiniń jumysyna ózimizdiń tarapymyzdan úlesimizdi qosýǵa daıynbyz, – degen «Astana» halyqaralyq qarjy ortalyǵynyń basqarýshysy Qaırat Kelimbetov túrki elderiniń ekonomıkasy úshin Qazaqstan álemdik jáne óńirlik naryqqa ashylǵan esik ekenin aıtty.
– On jyl ishinde Túrki keńesi túrki tildes elder arasynda ınvestısııa, saýda, tasymal, kásipkerlik, týrızm jáne basqa da salalar boıynsha aıtýly ekonomıkalyq bastamalardy kóterip keledi. Keńes qurylǵaly beri múshe memleketter arasyndaǵy saýda 3 mlrd AQSh dollarynan 5,5 mlrd AQSh dollaryna jetti. 2018 jyly Túrki keńesine múshe memleketterden Qazaqstan ekonomıkasyna 300 mln AQSh dollaryna jýyq ınvestısııa tartylsa, Qazaqstan óz kezeginde múshe memleketterge shamamen 100 mln AQSh dollaryn ınvestısııalady. 2019 jyldyń 1 maýsymyndaǵy málimet boıynsha Qazaqstanda Túrki keńesine múshe memleketterdiń 3 myńnan astam kompanııasy jumys istep jatyr. Onyń 730-y birlesken kásiporyndar. О́zara ınvestısııa men saýdanyń ulǵaıýy Túrki keńesi elderi arasyndaǵy ıntegrasııanyń artyp kele jatqanyna dálel. Keńeske múshe memleketterdiń ekonomıkalyq ósimi jahandyq ekonomıkalyq ósim qarqynynan kem emes. Bizdiń óńirdiń eńbek resýrsy da baı. 3,7 mln sharshy shaqyrym aımaqty alyp jatqan óńirimizde 17 mln azamat ómir súredi, – dedi Ulttyq ekonomıka vıse-mınıstri Jaslan Mádıev.
Onyń aıtýynsha, Qazaqstan kólik ınfraqurylymy jobalaryn qarqyndy qolǵa alyp jatyr. Máselen, 400 myńnan astam avtokólik joly, 30 myńnan astam temir jol salyndy. – Jalpy, bizdiń óńir Eýropa men Azııany baılanystyratyn dálizge aınaldy. Sol sebepti kólik áleýetin damytýdaǵy jumysymyzdy odan ári jandandyra túsý kerek. Qazaqstan men Ázerbaıjan arasyndaǵy memleket basshylary deńgeıinde bastama retinde kóterilgen Túrki keńesiniń ınvestısııalyq qoryn qurý týraly ıdeıa qazir kún tártibinde. О́zara ınvestısııalyq qor qurý qarjylyq jáne ınstıtýsıonaldyq resýrstardy jumyldyryp, birlesken naqty jobalardy qarjylandyrýǵa jol ashpaq, dedi vıse-mınıstr.
Qazirgi tańda atalǵan qordy qurý týraly kelissózderdiń eki raýndy ótken. Endi qordy tikeleı ınvestısııalyq qor retinde nemese damý ınstıtýty retinde qurý týraly máseleler pysyqtalyp jatyr. Qordyń valıýtasy, kólemi, quqyqtyq mártebesi men ony basqarý jaǵy da aldaǵy ýaqytta talqyǵa salynbaq. Jalpy, qor qurylǵannan keıin Qazaqstan tarapy ony «Astana» halyqaralyq qarjy ortalyǵyna ornalastyrý týraly usynys tastap otyr.
