– Naýryz aıynda AIVA-nyń basshylyq qyzmetinen ózbekstandyq Ǵafýr Rahımov ketti. Endi onyń ornyn kim basýy múmkin?
– Tokıo Olımpıadasyna bir jyldan sál ǵana astam ýaqyt qaldy. Boks Olımpııa oıyndarynyń baǵdarlamasynan shyǵarylýy múmkin degen pikir aıtylǵan. Al bokssyz Olımpıada ótpeıdi. Qazir AIVA tarapyna aıtylatyn syn kóp, qarjy máselesi bolsyn, tóreshilik jaǵynan bolsyn, tipti, jemqorlyqqa qatysty da daýlar týyndaǵan. Bálkim, basqa bir agenttik qurylyp ta qalar.
– Sonda AIVA taratylýy múmkin ǵoı?
– Bul oıdy da joqqa shyǵarýǵa bolmaıdy. О́ıtkeni HOK basshylyǵy boks uıymynyń jumysyna kóńili tolmaıtynyn ashyp aıtqan. Biraq tórtkúl dúnıe qyzyǵatyn, tarıhy tereńde jatqan sporttyń bul túrin Olımpıada baǵdarlamasynan alyp tastaýǵa bolmaıdy, ony Halyqaralyq Olımpıada komıteti de jaqsy biledi dep oılaımyn.
– Rahımov ketti. Buǵan deıin qysym kórsetilip keldi degen qazaqstandyq boksshylardyń endi shyn áleýetin baıqaı alamyz ba?
– Muny bir Rahımovpen baılanystyrǵan durys emes. Onyń barlyǵy AIVA tarapynan jiberilgen qatelikter. Tóreshilerdiń «barmaq basty, kóz qysty» áreketterinen qazaqstandyq boksshylar ǵana zardap shekti deýge kelmeıdi. Qaı qurlyq chempıonatyn alyp qarasaq ta, ondaı olqylyqtar tolyp jatyr.
– HOK-tiń eshbir eskertýine qaramastan ózbekstandyq kásipker basshylyq qyzmetke saılanyp, jarty jyldan soń ornyn bosatty. Rahımov bul orynǵa nege keldi jáne nege ketti?
– Birinshiden, muny jalǵyz Rahımov sheshpeıtinin umytpaıyq. Sondyqtan kemshiliktiń bárin ózbekstandyq kásipkerge ysyra salýǵa bolmaıdy. Júıeden, qurylymnan ketken qatelerdiń kesiri. О́zimiz AIVA-nyń kóptegen jıyndaryna qatystyq. Sonda atqarý komıteti músheleriniń toqsan bes paıyzynyń boksqa múlde qatysy joq. Kelesi jyly qurylǵanyna ǵasyr tolatyn AIVA-nyń osyndaı jaǵdaıǵa dýshar bolýyna ákep soqqan jaıttar anyqtalady, resmı málimdemeler jasalady dep úmittenemiz.
– Endi áńgimeniń aýanyn Gennadıı Golovkınge bursaq. Saýl Alvarespen bolǵan aıqasta jerlesimizdiń tarapyna biraz syn aıtyldy. Tipti «bokstan ketkeni durys» degender de az emes. Jerlesimizdiń ári qaraıǵy karerasyna qatysty pikirińizdi bilsek.
– Gennadııdiń alty jekpe-jek ótkizetinin estigende shynymen de qýanyp qaldyq. О́ıtkeni ol bizdiń juldyz boksshymyz, elimizde ǵana emes, álemde moıyndalǵan bylǵary qolǵap sheberi. Álginde aıtqanymdaı, kásibı boks ol – bıznes. Sondyqtan munda shamasy jetkender qyrqynda da qamal buza alady. Golovkın de solardyń qatarynan. Karerasyn aıaqtaýǵa kelsek, áleýetiń men múmkindikterińdi ózińnen artyq eshkim bilmeıdi. Onyń da bir oılaǵany bar shyǵar. Kezinde Djordj Formannyń 45 jasynda álem chempıony atanǵanyn umytpaıyq. Kópshiliktiń arasynda júrgen soń syn da, maqtaý da bolady. Otandasymyzǵa aldaǵy jekpe-jekterinde sáttilik tileımin.
– GGG men «Kanelo» arasynda úshinshi jekpe-jek ótýi múmkin be?
– О́tedi. Mindetti túrde. Babynda bolsa, elý jasta da chempıondyq belbeý ıelenýge bolady.
– Basqa-basqa, sizden «Astana arlandary» jaıly suramasaq bolmas. Sol klýbtyń negizin qalap, birneshe jyl basshysy boldyńyz. Elordanyń boks klýby taraǵany týraly jańalyqty siz qalaı qabyldadyńyz?
– AIVA alǵash osy jobany pash etken kezde bokstyń tóńireginde júrgen kóptegen azamattar kádimgideı qýanyp qaldy. Lıgalyq júıe boıynsha damıtyn joba retinde qarastyryldy. Biraq alǵashqy maýsym aıaqtalysymen-aq sporttyq jaǵynan da, uıym jumysyna da qatysty sharttar men talaptar ózgere bastady. Bul jylda qaıtalanatyn úrdiske aınaldy. Aldymen «árbir komanda qalaǵa bekitilsin» delingen. Biz de oılana kele kóshpendiler úshin orny bólek arlan ataýyn alyp, «Astana arlandary» degen baılamǵa keldik. Kelesi jyly salmaqtar sany besten onǵa deıin kóbeıtildi. «Memleket tarapynda bolsyn» degen talap qoıyldy. Medıaholdıngterdiń arasynda birde-bir seriktes bolǵan joq. Bastapqyda usynyspen kelgen alpaýyt ING kompanııasy da ekinshi maýsymda birlesip jumys isteýden bas tartty. Jumys júıelendirilmeı jatyp qyrýar qarjy suralǵan ǵoı. Sol kezde-aq uıym alysqa barmaıtynyn túsindik.
– Aldaǵy ýaqytta mundaı jobalar kerek pe?
– Kerek, eger naqty júıe bolsa. Áıtpese qalaǵan ýaqytta ózgere beretin erejeler kimge qajet?! Uıym jumys istegen segiz jyldyń ishinde talaı komanda kelip-ketti. Damyǵan memlekettiń ókilderi alǵashqy maýsymnan keıin-aq ketip qaldy. О́ıtkeni tabystan góri shyǵyn kóbeıip ketti.
