Nurotandyqtarǵa erekshe jaýapkershilik júkteledi
Juma, 8 aqpan 2013 7:31
«Nur Otan» halyqtyq-demokratııalyq partııasy Tóraǵasynyń birinshi orynbasary Baýyrjan Baıbek osy qyzmetke taǵaıyndalǵannan keıingi alǵashqy jumys saparyn Qyzyljar óńirinen bastap, birqatar mekemelerde boldy.
Juma, 8 aqpan 2013 7:31
«Nur Otan» halyqtyq-demokratııalyq partııasy Tóraǵasynyń birinshi orynbasary Baýyrjan Baıbek osy qyzmetke taǵaıyndalǵannan keıingi alǵashqy jumys saparyn Qyzyljar óńirinen bastap, birqatar mekemelerde boldy.
B.Baıbek alǵashqy kúni aımaq basshysy Samat Eskendirovpen birge Petropavl qalasyndaǵy №1 qalalyq aýrýhanaǵa soǵyp, osynda emdelip jatqan naýqastardyń hal-jaǵdaıymen tanysty. Jaıly palatalardyń ozyq medısınalyq qural-jabdyqtarmen jabdyqtalǵanyn kórdi. Emdeý mekemesiniń bas dárigeri Ǵalııa Mámetova 150 orynǵa laıyqtalǵan aýrýhanada terapııa, nevrologııa jáne eresekterge arnalǵan juqpaly aýrýlar bólimsheleri ornalasqanyn, emdelýshilerge qalypty em-dom kórsetiletinin, dári-dármek jetkilikti ekenin jetkizdi. Munda ınsýlt, osteohandroz dertine dýshar bolǵandar da aýrýynan aıyǵady. Medısınalyq qondyrǵylardy jańartý maqsatymen bıyl jergilikti qazynadan 400 mıllıon teńge qarastyrylǵan. Joǵary bilimdi dárigerlerdiń ortasha aılyq jalaqysy 160 myń teńgeden aınalsa, meıirbıkelerdiń qolyna 71 myń teńge tıedi.
Aq halatty abzal jandar «Nur Otan» HDP Tóraǵasynyń birinshi orynbasaryna egde adamdardyń fızıoterapııalyq em-dom alatyn arnaıy qural-jabdyqqa zárýligin aıtyp, qolushyn berýdi ótindi. B.Baıbek óz kezeginde máseleni jergilikti máslıhattaǵy fraksııamen aqyldasa otyryp, bıýdjetten qarjy bólý múmkindikterin qarastyratynyn aıtty.
Ekijaqty ashyq áńgime «Qazaqstan-2050» Strategııasy talaptarynan týyndaıtyn basym baǵyttar tóńireginde órbip, júzege asyrý joldary keńinen sóz etildi.
Osy kúni B.Baıbek «Nur Otan» HDP oblystyq fılıaly ǵımaratynda óz ótinishterin aıta kelgen bir top soltústikqazaqstandyq azamattardy qabyldap, mal sharýashylyǵyn sýbsıdııalaý, halyq mıgrasııasy, kóp balaly otbasylardy turǵyn úımen qamtamasyz etý, ınnovasııalyq jobalardy qarjylandyrý jaıly oı-pikirlerin tyńdady.
Reseıden kóship kelip, Báıterek aýylyna qonystanǵan Janat Otynshıev «Jumyspen qamtý-2020» baǵdarlamasy boıynsha jeńildetilgen nesıe alyp, jeke kásipkerlikpen aınalysatynyn, endi aǵash sehyn ashýǵa jer telimderin resimdeý qıyndyq týǵyzyp otyrǵanyn, aýyldaǵy elektr energııasy qýattylyǵynyń jetimsizdigin, ol úshin aralyq stansa salý qajettigin alǵa tartty. «Blok» JShS-nyń dırektory Ivan Shefer óndiristi odan ári keńeıtý maqsatymen shaǵyn jáne orta bıznesti qoldaý baǵdarlamasy sheńberinde nesıe alý nıetinde júr eken. Aınalym qarajatyna kómek berilse, 10 jańa jumys ornyn ashyp, óndiris kólemin 50 paıyzǵa arttyrýǵa ýáde etti. Nurotandyqtarmen, jastar aktıvimen júzdesýler de emen-jarqyn ótip, oı-pikirler almasyldy.
B.Baıbek kelesi kúni oblystyq fılıaldyń kezekten tys HVI konferensııasyna qatysyp, Memleket basshysy, «Nur Otan» HDP Tóraǵasy Nursultan Nazarbaev jergilikti fılıal tóraǵalyǵyna aımaq basshylyǵyna jańadan taǵaıyndalǵan Samat Eskendirovtiń kandıdatýrasyn uıǵarǵanyn jetkizdi. Delegattar bul usynysty biraýyzdan qoldap, daýys berdi. Jınalǵandar aldynda sóılegen sózinde B. Baıbek fılıaldyń jańa jetekshisine tabys tiledi. Partııanyń alda atqarylatyn jumys júıesin baıandap berdi.
Jumys saparynyń ekinshi kúni B. Baıbek Qyzyljar aýdanyna qarasty Asanov stansasyna atbasyn tiredi. Munda «Ábı Jer» JShS-inde júzege asyrylyp jatqan ozyq jobalarmen tanysyp, turǵyndarmen, ardagerler, jastar ókilderimen kezdesti. Aýyldyqtardyń Prezıdenttiń saıasatyn qoldaıtyndary aıqyn sezilip turdy. Dese de, turǵyndar partııa Tóraǵasy birinshi orynbasarynyń nazaryn keıbir máselelerge aýdardy. Mysaly, ardager ustaz Kúlpásh Qaparova aýyz sý jaıy qatty qınap turǵanyn qynjyla áńgimeledi. Tasyp jetkiziletindikten, sapasy kóńil kónshite bermeıtin kórinedi. «Aq bulaq» baǵdarlamasyn tezdetýdi ótindi. Budan basqa, turǵyndar sany 2 myńǵa jetpeıtin eldi mekenderde ambýlatorııalyq pýnktterdi qaldyrý, «Dıplommen – aýylǵa!» baǵdarlamasy aıasynda jumys isteıtin jas mamandardyń birjolǵy járdemaqysyn kóterý, taǵy basqa máseleler kóterildi. Saýaldarǵa oblys ákimi Samat Eskendirov yqtııatty jaýap berip, problemalarmen jaqsy tanys ekenin, barynsha oń sheshýge yqpal jasaıtynyn aıtty.
Baýyrjan Qydyrǵalıuly óz sózinde aýyl ákimderiniń róli men jaýapkershiligin arttyrý, derbestigin kúsheıtý, bıznes pen bılik oryndarynyń áleýmettik áriptestigi, qordalanǵan problemalardy birlesip sheshý, bıýdjet qarjysyn oryndy jumsaý, jemqorlyqpen kúres, partııalyq baqylaýdyń pármendiligin arttyrý máselelerine erekshe ekpin túsirdi. О́z sózin Elbasy tapsyrmalaryn buljytpaı oryndaýdyń aldyńǵy shebinde nurotandyqtar júrýi tıis, dep qorytyndylady.
О́mir ESQALI,
«Egemen Qazaqstan».
Soltústik Qazaqstan oblysy.
