Ábekeń kólik tizgininde júrip búkil qazaq dalasyn aralap shyqqan, Reseıdiń Irkýtsk qalasyna deıin júk tasyǵan. Osydan tórt jyl buryn oılamaǵan jerden sýret salýǵa, qolóner buıymdaryn jasaýǵa degen qulshynysy kúsheıip, boıyndaǵy keremet qasıet oıana bastapty. Birde bizdiń keıipkerimiz Taraz qalasynda Qazaq handyǵynyń 550 jyldyǵyna arnalǵan aıtysqa barǵanynda «Balasaǵun» ortalyq konsert zalynyń dálizinde ashylǵan kórmeden kóne aǵash ydysty kóredi. Qolónerge degen qyzyǵýshylyǵy sol sátten bastalypty. Tarazdan kelgennen keıin úıiniń aýlasynda jemis bermeı turǵan órik aǵashyn kesip, ony keptirip, qoshqarmúıiz músin jasaýdy qolǵa alady. Buryn mundaı buıymdardy jasap kórmegen ol birinshi ret pyshaq, balta jáne ara sııaqty úı jaǵdaıyndaǵy qural-saımandardy qoldanady. Alǵash ret jasaǵan qoshqarmúıizi sátti shyǵyp, keıinnen pıala, kese, túrli kádesyı ataýlyny jasaı beredi. Bastapqyda jasaǵan buıymdaryn jaratpaǵan ol bárin de suraǵandarǵa syılyq retinde berip jiberedi.
Búginde Abylhan О́tepbergenov belgili qolónershige aınaldy. Ol ózi turatyn Aısha bıbi aýylynda jáne Taraz qalasyndaǵy ejelgi «Tórtkúl» kerýen saraıynda jumys isteıdi. Aǵash ustasynyń aıtýynsha, tuqymynda aǵashtan túıin túıgen sheber, qolónermen aınalysqan adam bolmaǵan eken.
Qazir Ábekeńniń qolynan shyqqan buıymdar oblys ortalyǵyndaǵy «Tórtkúl» keshenine qydyryp kelgender qarapaıym halyqty da, qolónershi mamandardy da tánti etýde. Tipti arnaıy tapsyrys berip, zattaryn qalap alyp jatqandar da bar eken. Endi Tarazǵa keletin týrıster «Tórtkúl» kerýen saraıynda tek ulttyq taǵamdardy ǵana emes, Abylhan О́tepbergenov syndy jambyldyq sheberler jasaǵan túrli qolóner buıymdaryn da tamashalaı alady.
Jambyl oblysy
