Almatyda 50 myńnan astam aǵash apatty jaǵdaıda tur. Al jarty mıllıonǵa jýyq tal aýrý dep tanylǵan. Emdeýdi qajet etetin aǵashtardyń deni Túrksib pen Naýryzbaı aýdanynda ósip tur. Qazir qala bıligi olardy jeke tekserip, mıneraldyq tyńaıtqyshtarmen emdeýdi qolǵa almaq.
Sondaı-aq, megapolıste jasyl jelektiń sanyn kóbeıtý kózdelip otyr. Osyǵan oraı, kúzde Jasyl Almaty úsh jyldyq jobasy bastalmaq. Onyń aıasynda qala boıynsha kem degende mıllıon túp aǵash otyrǵyzylady. Eń aldymen Alataý, Naýryzbaı, Jetisý, Almaly aýdandaryndaǵy taldardy kóbeıtý josparlanǵan. Jasyl ekonomıka basqarmasynyń mamandary aǵashtardy Indýstrııalyq aımaq mańyna otyrǵyzatynyn jetkizdi. Biraq qala ákimi aldymen halyq kóp shoǵarlanǵan jerlerdegi jasyl jelektiń sanyn kóbeıtýdi tapsyrdy.
«Eń aldymen adamdar turatyn jerge otyrǵyzý kerek. Alataý aýdanynyń halqy ne dep jatyr? Dalaǵa shyqqanda kóleńke joq, óıtkeni tal joq, saıabaq joq deıdi. Sol sebepti olar kúnniń aptap ystyǵynda otyrýǵa májbúr. Tipti oryndyqtar, balalarmen qydyratyn jer joq deıdi. Al shyn máninde tal egem degender bolsa, bos jer tolyp jatyr. Sondyqtan mamandarmen aqyldasa otyryp, qalanyń kórkin keltiretin, ári jasyl jelek bolatyndaı jerge egý kerek», dedi Baqytjan Saǵyntaev.
Budan bólek, mamandar Almatynyń ekologııalyq ahýalyn jaqsartý baǵytyndaǵy jumystardy ármen qaraı jalǵastyrmaq. Avtobýstardy 100 paıyzǵa jańartý men trolleıbýs parkin retteý, aýaǵa taraıtyn zııandy qaldyqtardy jylyna 630 tonnaǵa deıin azaıtýǵa múmkindik beredi. Sondaı-aq, qalaaralyq qoǵamdyq kólikterdi jańartý men jekemenshik sektordy tolyqqandy gazǵa qosý máselesi de pysyqtalýda. Al qala kórkin buzatyn suryqsyz qoqys konteınerlerin bir úlgide etip, jeke turǵyn úılerdiń qasyna da ornatý qarastyrylýda.
ALMATY
