Jaqynda ol belgili sýretshi, «Qazaq eli» monýmentiniń avtory Senbiǵalı Smaǵulov bastap barǵan qazaqstandyq sýretshiler quramynda Kıprde bolyp qaıtty. Resmı shaqyrtý bıylǵy jyldyń mamyr aıynda Forbes tizimine kirgen tanymal bıznesmen, kıprlyq mıllıarder Sýat Gıýnselden kelip túsken. Bilim, densaýlyq, bank, qonaqúı qyzmeti, elektr jelileri sekildi bıznestiń san túrimen aınalysatyn 63 jastaǵy Sýat beı sapardyń bar shyǵynyn óz moınyna alyp, tek Qazaqstan sýretshilerin ǵana emes, túrki elderiniń, álemdegi musylman memleketterindegi óner ókilderin de shaqyryp, basqosýdy halyqaralyq sımpozıým deńgeıinde ótkizgen. Baýyrlas elderdegi qylqalam sheberleriniń mol shoǵyryn shaqyrýdaǵy maqsat – Sýat Gıýnsel el úkimetimen birlesip, úlken óner murajaıyn ashýdy kózdeıdi.
Álemniń ár qıyrynan kelgen áriptesterimen birge Gúlnazym da eki apta boıy sýret salyp, túrli taqyrypta týyndy jazǵan sheteldik sýretshilermen tájirıbe almasqany úshin sheksiz rıza. Sımpozıým aıasynda alty sýretshiniń jeke kórmesi uıymdastyrylyp, olardyń qatarynda Gúlnazymnyń da shyǵarmashylyǵyn tanystyrýǵa múmkindik alǵany qazaq sýretshisiniń aıryqsha qoltańbasyna kórsetilgen qurmet bolsa kerek.
«Sýretshiler sımpozıýmy keremet ótti. Aqteńiz jaǵasynda túrli taqyrypta kartınalar saldyq, men úshin qazaqstandyq jáne sheteldik áıgili sýretshilermen qatar jumys isteý úlken abyroı boldy. Bar ónerimdi salyp, elimizdiń namysyn qoldan bermes úshin kúni-túni eńbek etip, óz kartınamnyń mazmundy jazylýyna kóp kóńil bóldim», deıdi Gúlnazym. Onyń aıtýynsha, mártebeli meımandar qatarynda beıneleý óneriniń bilgirleri, mınıstrler men joǵary dárejeli laýazymdy tulǵalar arnaıy kelip tamashalaǵan kórme joǵary deńgeıde uıymdastyrylǵan.
Tynysy keń, qazaqtyń qaıtalanbas ulttyq dástúri negizinde jasalǵan týyndylaryn álem keńistigindegi ónerdiń búgingi baǵyttarymen toǵystyrý – Gúlnazymnyń bala kúnnen bergi armany. Býyrqanǵan boıaýlardyń qupııasyn ashpaqqa qushtar bolyp, shyǵarmashylyq ińkárlikti kúndelikti jumys yrǵaǵy etip belgilegen ol bul armanyn birtindep baǵyndyryp keledi de. Túrli-tústi boıaý tilimen jan dúnıesiniń tolqýy men tebirenisin jetkizip, ony ulttyq beder-naqyshpen úılestire bilgen G.О́mirzaqtyń jumystary búginde London, Lıýksembýrg qalalary men Germanııa, Fransııa, Túrkııa, Reseı elderindegi óner galereıalarynda saqtaýly tur. Talǵammen salynǵan týyndylary zamanaýı dızaın suranysyna tolyqtaı saı bolǵandyqtan birqatar kartınasy memlekettik mekemeler men qoǵamdyq uıymdardyń ıntererine qoıylǵan.
ALMATY
