Tabıǵat aıasynda tanymal opera juldyzdarynyń asqaq daýysymen shyrqalǵan ánderin tyńdaýǵa jıylǵan jurttyń qarasy da qalyń. Elimiz ben álemniń eń tanymal ánshileri ashyq aspan astynda Abaı men Latıf Hamıdıdiń lırıkalyq balladalaryn, Verdı, Pýchchını, Rossını sekildi áıgili ıtalıan kompozıtorlarynyń ólmes týyndylaryn, Chaıkovskıı men Debıýssıdiń shoqtyǵy bıik shyǵarmalaryn bıik kásibı sheberlikpen naqyshyna keltire oryndady. Alyp shahardyń aspanyn ánge bólep, kórermen kóńilin serpiltken festıvalde Memlekettik akademııalyq sımfonııalyq orkestrge dırıjerlik jasaǵan Qazaqstannyń eńbek sińirgen qaıratkeri Alan Bóribaev: « Bul – dástúrli festıval. Jyl saıyn aýqymy keńeıip keledi. Búgin birneshe jańa týyndynyń tusaýy kesildi. Almatylyq tyńdarmandardyń talǵamy óte joǵary. Qazir jastardyń da klassıkalyq mýzykaǵa qyzyǵýshylyǵy artyp keledi. Olar klassıkalyq mýzykany súıip tyńdaıdy. Buryn tek orta býynnan joǵary kórermender ǵana tyńdasa, qazir osyndaı ashyq alańdardyń arqasynda klassıkalyq mýzyka bárine de túsinikti bolyp keledi. Bul bizge shabyt syılaıdy», deıdi.
Festıval uıymdastyrýshylary jyl saıyn ótetin óner merekesin múmkindiginshe qaıtalamaýdy qadaǵalap, jańasha órnekpen ómirsheńdigin arttyra túsýge tyrysady. Tórtinshi ret ótkizilip otyrǵan klassıkalyq mýzyka festıvaliniń bıylǵy jańalyǵy – álemge tanymal tenor Ivan Defabıanıdyń Italııadan arnaıy shaqyrylýy boldy. Onyń ónerine eltimegen jan joq. Ol La-Skala, Arena dı Veron jáne Verdı teatrlarynda óner kórsetken. Ol osy keshte «Sevıl shashtarazy», «Madam Batterflıaı», «Týrandot» operalarynan arııalar shyrqady. «Meni Qazaqstanǵa shaqyrǵany úshin óte qýanyshtymyn. Munda alǵash ret kelýim, qala da, adamdary da unady. Kórermenderdiń ártisterdiń ónerin qurmettep, baǵalaýy tipti tańǵaldyrdy», deıdi Ivan Defabıanı.
«Astana Opera» teatrynyń ánshisi Aızada Kaponova, Janat Baqtaı sekildi elimizge ónerimen tanylǵan belgili ártisteri kórermen aldynda ulttyq operanyń búgingi deńgeıin ozyq úlgide dáleldeı bildi.
Almatynyń eń kórikti jerinde kórermenderge arnap oryndalǵan shyǵarmalar burynǵydan da áserli bolyp, elimizdiń mádenı mártebesin bıiktetete túsetin mýzyka merekesine tik turyp yqylas bildirdi.
ALMATY
