7 aıda jergilikti qazynadan sheneýnikterdiń qaltasynda ketken 75 mıllıon 700 myń teńgeniń 95 prosenti qaıtarylǵan. Tek ótken aptada ǵana eki qylmystyq is tirkelgen. Bul týraly Sybaılas jemqorlyqqa qarsy is-qımyl agenttigi oblystyq departamentiniń basshysy Ernar Baıanǵazın málimdedi.
Tımırıazev aýdany aýyldyq okrýginiń ákimi ákimshilik nysandy buzý úshin bir kásipkerden 100 myń teńge almaq bolǵan. Shal aqyn aýdany mal dárigerlik bóliminiń jetekshisi ákimshilik hattama toltyrmaý úshin osynsha kólemde syıaqy talap etken. Qazir eki qylmystyq oqıǵa boıynsha sotqa deıingi tergeý amaldary júrgizilýde.
«Qyzyljar–adaldyq alańy» baǵdarlamasy aıasynda qolǵa alynǵan 12 joba jemqorlyqty joıýǵa baǵyttalǵan. “Halyqtyq baqylaý” portaly arqyly 141 aryz tirkelgen.
«Azamattardan kelip túsken shaǵymdardy tıisti organdarǵa joldap otyramyz. Paraqorlyqty aýyzdyqtaýdyń basqa joldary da qarastyrylǵan» deıdi «Qyzyljar – adaldyq alańy» jobalyq ofıstiń jetekshisi Ekaterına Starostına.
Petropavl qalasynyń ákimi Bolat Jumabekov “Halyqtyq baqylaý” portalyna kelip túsken keı ótinishterdiń qaralmaıtynyn, sondaı-aq jemqorlyq faktilerine kadr tapshylyǵy da áser etip otyrǵanyn jetkizdi. Búginde sybaılas jemqorlyq faktileri boıynsha turǵyn úı-kommýnaldyq sharýashylyǵy aldyna qara salmaı tur. Áli kúnge deıin bólim jetekshisiniń orny bos.
Soltústik Qazaqstan oblysy
