Kúrzi judyryq ıeleri arasynda eki halyqaralyq dárejedegi sport sheberi, 13 sport sheberi, álem, Azııa oıyndarynyń chempıondary men júldegerleri boldy. Olardyń básekesin aımaq basshysy Qumar Aqsaqalov tamashalady.
«Boks ardagerleri arasyndaǵy týrnır osymen úshinshi ret ótkizilip, halyqaralyq mártebe alyp otyr. Qatysýshylardyń sany byltyrǵyǵa qaraǵanda kóp. Tartys óte kúshti», deıdi K. Safın atyndaǵy boks mektebiniń dırektory, kásipqoı bokstan álem jeńimpazy Janat Jaqııanov.
Kil myqtylar aqtyq saıysqa shyǵap, 6 salmaq boıynsha ózara kúsh synasty. Sharshy alańda birinshi bolyp 64 salmaq dárejesi boıynsha Nur-Sultan qalasynyń 36 jastaǵy ókili, jazǵy Olımpıadaǵa qatysýshy Mırjan Raqymjanov pen 63 jastaǵy atyraýlyq Adık Bermeshov kóterildi. Ekeýi de jaqsy ázirlikpen kelgenderin baıqatty. Mırjan ózinen 27 jas úlken qarsylasyna inilik izetpen jol berdi.
Petropavldyq Murat Qurmanǵojınov /69 kg./ jerlesi, byltyrǵy týrnırdiń jeńimpazy Rýstam Jaqypovty birinshi raýndta jerge sulatyp saldy.
Qalǵan salmaqtar boıynsha mynalar jeńistiń eń bıik tuǵyryna kóterildi: 75 kg.–astanalyq Aleksandr Lýchshev, 81 kg.–qaraǵandylyq Qýanysh Isembaev, 91 kg-ǵa deıin–qaraǵandylyq Tımýr Baıserkeev.
91 kılodan joǵary alyptar aıqasy qos reseılik Sergeı Tannagashev pen Saıran Smaılovtyń arasynda ótti. Qarsylasynyń eńgezerdeı iriligine, boıshańdyǵyna qaramastan boıy kishi bolsa da Saıran aıqyn basymdyqpen jeńdi.
Jeńimpazdar men júldegerlerge «Rıng patshasy-2019» beldigimen qosa aqshalaı syılyqtar da tabystaldy.
Soltústik Qazaqstan oblysy.
