Qostanaı qalasynyń turǵyny Bıǵansha Qarına búginde 78 jasta. Zeınetker qalaǵa 2006 jyly Torǵaıdyń Kókalat aýylynan qonys aýdarǵan eken.
«Kósherde kúbim men qol dıirmenimdi qaldyrmaı ala kettim. «Kópqabatty úıde ony qaıtesiń?!» dep kúlgender boldy. Biraq olardyń sózin qulaǵyma qystyrǵan da joqpyn, – deıdi zeınetker. – Alpys jyl boıy ortaımaǵan bul kúbi – áýletimizdiń yrysy ispetti. О́zim 1959 jyly turmysqa shyqtym. Jubaıym Fazylhan aýylda baılanysshy bolyp qyzmet isteıtin. Úıde úsh birdeı enem boldy. Bizdiń jas shańyraǵymyzǵa syılyq retinde Sapa Seıilhanov esimdi sheber aǵash kúbi jasap berdi».
О́tken shaǵyn osylaısha eske alǵan ana, ydystyń tarıhy jaıly da baıandap berdi:
«Enem Qarlyǵash qazaqy saltty berik ustaıtyn kósheli kisi edi. Bosaǵamyzdan jylqy arylǵan joq. Ol kezde jer qaraıysymen kıiz úıge shyǵyp, ózen jaǵasyna kóshetinbiz. Otaýdyń qasynan shaǵyn qos tigiledi. Kemi eki-úsh bıe saýamyz. Aǵash kúbi – bapty kóp qajet etetin ydys. Ystap, maılap otyrmasań, óńezip, qańsyp ketedi. 1995 jyly enem dúnıeden ozdy. Kóz jumarynda «qara kúbińdi qańsytpa. Fazylhanymdy shóldetpe» dep ymdady. Ol kisiniń ósıetin adal oryndap kelemin. Biraq qalada bıe ustaı almaısyń. Sol úshin kóje ashytamyn. Kójege sý, un, tuz, sút ǵana qosamyn. Bálen jyl ys sińgen kúbiniń qasıeti shyǵar, ashyǵanda qymyzǵa bergisiz bolady. Kójeme, ásirese aıaǵy aýyr kelinshekter yntyq. Olarǵa tegin beremin.
Eldiń ıgi-jaqsylary, kórshi-kólem osy kúbiden dám tatyp, batasyn berdi. Qaısybir jyly, aqyn Aıbek balam Mekkege bara jatyr degendi estip, qoldaǵy barymdy quıyp, sálemdeme retinde jiberdim. Keıde astanadan arnaıy aldyratyndar bar. Báriniń aıtary – alǵys. Adamǵa odan artyq ne kerek?!
Kóp tilegi qabyl bolǵan shyǵar, Qudaıǵa shúkir, el qatarly turmys keshtik. Bosaǵamyzdan kisi arylǵan joq. О́mirge 11 bala ákelip, Keńes ókimetiniń «kúmis alqasyn», Qazaqstannyń «altyn alqasyn» keýdeme taqtym. Jubaıym Fazylhan Maýdanov ordendi baılanysshy. О́zim kýlınarııanyń meńgerýshisi bolyp istep, zeınetke shyqtym. Búginde nemere, shóbere súıip otyrmyz», – deıdi ájeı.
Bıǵansha ájeniń istegen taǵamy ǵana til úıirip qoımaıdy, ismerligi de bir tóbe.
«Bala kúnimnen is tigýge úıir boldym. Bizdiń jas kezimizde kıim-keshek qat edi. Kóılekten bastap, shabadan, kórpe-jastyqty qoldan tiktim. Elý jyl ustaǵan qol mashınamdy bir kelinime berdim. Qazir jańasyn satyp aldym. Qur qarap otyra almaımyn. Aýyldaǵy zamandastarym qyz jasaýyn qazirge deıin maǵan tiktiredi», deıdi zeınetker.
Bıǵansha ájeniń taǵy bir qyry, ol kisi jaıǵan dastarqanda dúkenniń tamaǵy sırek kezdesedi. «Jeıtinimiz et, sýsynymyz kóje. Qurt, irimshik, jenttiń bárin óz qolymnan jasaımyn. Ákem ustaǵan dıirmendi áli paıdalanamyn. Shalyma bıdaı tartqyzyp, jyl-on eki aı tek ulttyq taǵam tutynamyz. Sonyń qýaty shyǵar, 80 jasqa taıasaq ta, densaýlyǵymyz shúkirshilik. Áıtpese, biz kórgen beınettiń shegi joq. Besikten belimiz shyqpaı masaq terdik, ómir boıy aýyldy jerde tezek jınap, ot jaqtyq, ıinaǵashpen sý tasydyq. Úı sharýasy, bala kútimi, qonaq qarsy alý, bári-bárine úlgerdik. Teginde, taza, qunarly taǵam men tynymsyz eńbek adamǵa qýat beredi. Seksenge taıaǵan shaǵymda balkonda kúbi ystap, kóje ashytý ońaı emes. Biraq enemniń ósıetin jerde qaldyra almaımyn ári bul men úshin taptyrmas ermek», – deıdi 78 jastaǵy ájeı.
Alpys jyl úzdiksiz ustalynǵan kúbiniń syıymdylyǵy 15-20 lıtrdeı. Úshten birin qorǵa alyp qalyp, eki kún saıyn jańadan quıyp otyrady. Kúbi ystaýǵa qajet tobylǵyny Bıǵansha áje balalaryna qalanyń syrtynan aldyrtady eken.
