«Manchester Iýnaıted» komandasyn jankúıerlerge tanystyrýdyń ózi artyq bolar. 2017 jylǵy Eýropa lıgasynyń chempıony búginde ÝEFA klýbtar reıtınginde 10-orynda keledi. Sondaı-aq klýb jazǵy transfer kezeńinde 19 fýtbolshysymen qoshtasty. Olardyń arasynda belgııalyq shabýylshy Romelý Lýkaký, ıspanııalyq jartylaı qorǵaýshy Ander Errera, ekvadorlyq qorǵaýshy Antonıo Valensııa bar. Sonymen qatar chılılik shabýylshy Aleksıs Sanches, aǵylshyndyq tájirıbeli qorǵaýshy Krıs Smollıng pen taǵy 9 fýtbolshyny jalǵa bergen. Bir komandalyq quramdy taratyp jibergen MIý ishki birinshilikte ájeptáýir álsirep qaldy. Aǵylshyn Premer-lıgasynyń alǵashqy bes týrdyń eki oıynynda jeńiske jetse, eki matchta teń tústi. Al bir oıynda qarsylastaryna ese jiberdi. Alǵashqy týrda «Chelsıdi» 4:0 esebimen tas-talqanyn shyǵarǵany bolmasa, qalǵan oıyndarda Manchester komandasynyń jaǵdaıy asa máz emes. Besinshi týrda óz alańynda «Lester» klýbyn qabyldap, 8-mınýtta Markýs Rashfordtyń penaltıden soqqan jalǵyz golynyń arqasynda áreń jeńiske jetti. Quldyraý kezeńin bastan ótkerip jatqan aǵylshyndyq klýbty «Astana» da jeńip ketýi ǵajap emes.
Elorda komandasy el chempıonatyndaǵy sońǵy týrda «Shahter» komandasyn jeńip, Anglııaǵa jaqsy kóńil-kúıde attandy. Sondaı-aq «Astana» Chempıondar jáne Eýropa lıgasynyń toptyq kezeńinde Eýropanyń TOP-5 chempıonatyndaǵy «Atletıko Madrıd», «Vılıarreal» (Ispanııa), «Seltık» (Shotlandııa), «Benfıka», «Sportıng» (Portýgalııa) sekildi azýly komandalarmen kezdesip, tájirıbe jınaqtaǵan. Buǵan deıin «Manchester Iýnaıted» komandasy «Astananyń» Chempıondar lıgasynyń alǵashqy irikteý kezeńindegi qarsylasyn Rýmynııanyń ChFR (2:1), Shveısarııanyń «Bazel» (2:1) komandalary jeńip ketse, Reseıdiń ortanqol komandalarynyń biri «Rostovpen» (1:1) teń túsken. Mine, osy nátıjelerden-aq fýtboldyń boljap bolmaıtyn oıyn ekenin ańǵaramyz. Chempıondar lıgasynyń byltyrǵy maýsymyndaǵy «Lıverpýldiń», «Tottenhemniń» kambekterin fýtbol jankúıerleri birazǵa deıin umytpaıtyny anyq.
Oǵan qosa, «Astana» fýtbolshylary da jeńis úshin baryn salatynyn aıtyp jatyr. Mysaly, komandanyń úzdik qorǵaýshylarynyń biri Dmıtrıı Shomko Manchesterge alańda «saıahattaý» úshin emes, jeńis úshin barymyzdy salýǵa baramyz deıdi.
«Árıne, qazaqstandyq fýtbol jankúıerlerine Eýrododanyń kúzgi maýsymyn syılaǵanymyzǵa qýanyshtymyz. Sondaı-aq toptaǵy alǵashqy kezdesýdi azýly «Manchester Iýnaıted» komandasyna qarsy ótkizemiz. Quramynda juldyzdy fýtbolshylary bar «Manchester Iýnaıted» bizdiń toptyń úzdigi ekenine eshkim kúmán keltirmeıdi. Biraq juldyzdar da adam ekenin umytpaýymyz kerek. Olar da qatelesýi múmkin. Jeńis úshin baramyzdy salamyz», deıdi Shomko.
Evgenıı Postnıkov toptyq kezeńge jerebe tartý rásimi aldynda «Arsenal» nemese MIý bizdiń topqa tússe eken degen oı bolǵanyn jáne syrt alańda MIý-dan upaı alýǵa tyrysatyndyqtaryn jetkizdi. «Menińshe, «Manchester Iýnaıted» álem boıynsha jankúıerleri eń kóp, nómiri birinshi komanda. Atmosferany seziný jáne aǵylshyn komandasynyń deńgeıin kórý óte qyzyqty bolmaq. Qansha degenmen TOP komanda ǵoı. Qyzyqty oıyn bolatynyna kúmánim joq. Joq degende Manchesterden bir upaı alýǵa tyrysamyz», deıdi qorǵaýshy.
Qos komanda arasyndaǵy kezdesý búgin túnde ótedi. Matchty «Qazsport» telearnasynan saǵat 01:00-de tikeleı efırden tamashalaı alasyzdar.
