Cýretti túsirgen Rafhat HALELOV
Toqsanynshy jyldary Almaty qalasynyń teatrsúıer jurtshylyǵy Ǵabıt Músirepov atyndaǵy Qazaq akademııalyq balalar men jasóspirimderge arnalǵan teatry sahnalaǵan Sultanáli Balǵabaevtyń «Eń ádemi kelinshek» qoıylymyna qalmaı baratyn. Ásirese basty róldegi Gúlbarshyn – Ásel Mámbetovanyń óneri kórermendi erekshe áserge bóleıtin. Aktrısanyń memlekettik «Daryn» syılyǵyna ıe bolǵan jyldary da sol kez.
Á.Ábishevtyń «Mádı» (Dildar), Ý.Shekspırdiń «Jazǵy túndegi tús» (Germııa), A.P.Chehovtyń «Chaıka» (Nına Zarechnaıa), F.Ońǵarsynovanyń «Baqyt pen qaıǵy» (Aqynqyz), S.Asylbekovtyń «Rabıǵynyń mahabbaty» (Roza); I.Jansúgirovtyń «Isataı-Mahambet», Ǵ. Músirepovtyń «Qozy Kórpesh - Baıan Sulý» (Kúnikeı) jáne basqa spektaklderde basty rólderdi somdaǵan Ásel Mámbetova «Eren eńbegi úshin» medaliniń ıegeri atandy. 2000 jyldan beri Temirbek Júrgenov atyndaǵy Qazaq ulttyq óner akademııasynyń dosenti, aǵa oqytýshysy bolyp, óner jolyn qýǵan shákirtterine tálim-tárbıe berdi.
Sońǵy jyldary Ásel Imanǵalıqyzy óziniń týǵan jeri – Batys Qazaqstan oblysyna oralǵan bolatyn. Búginde Hadısha Bókeeva atyndaǵy qazaq drama teatrynda qyzmet etetin aktrısa oqytýshylyq qyzmetin de jalǵastyryp keledi. Sahna sheberiniń 60 jyldyǵyna oraı ótken shyǵarmashylyq keshte Ásel Mámbetova Mahambet О́temisuly atyndaǵy Batys Qazaqstan memlekettik ýnıversıtetiniń «Qurmetti professory» ataǵymen jáne «Qurmet gramotasymen» marapattaldy.
Ýnıversıtettiń saltanat zalynda ótken syrly keshte Ásel Imanǵalıqyzy óz kórermenine esep bergendeı boldy. О́zi tálim beretin rejıssýra mamandyǵynyń stýdentterimen birge qoıǵan «Aq Jaıyq» sazdy-horeografııalyq kompozısııasyn jıylǵan jurtshylyq yqylaspen qabyldady.
Batys Qazaqstan
