Bir jyly dúnıege kelip, bir jylda repressııa qurbany bolsa da, qazaq ádebıetine teńdessiz úles qosyp ketken úsh báıterekti eske alyp, taǵzym paryzyn oryndaýda Halyqaralyq TÚRKSOI uıymy erekshe tartý jasady. «Úsh arys» atty kitaptyń tusaýkeserine halyq jazýshysy, memleket jáne qoǵam qaıratkeri Oljas Súleımenov, aqynnyń uly Saıat Jansúgirov jáne onyń ózge de urpaqtary, zııaly qaýym ókilderi qatysty. Keshti halyqaralyq uıymnyń Almatydaǵy ókili Asqar Turǵanbaev júrgizdi.
Moderatordyń aıtýynsha, keńestik kezeńde qalamgerdiń belgili bir shyǵarmasyn qylqalamdy serik etken sýretshiniń kózqarasymen baıandap shyǵatyn dástúr bolǵan. Qalamger men sýretshiniń rýhanı tandeminen týǵan bul dástúr keıin múldem úzilip qaldy. «Úsh arys» kitaby osy dástúrdi qaıta jalǵap, ótken ǵasyrdaǵy jáne qazirgi kezeńdegi belgili otandyq sýretshilerdiń náýbet qurbany bolǵan Sáken, Ilııas, Beıimbettiń shyǵarmalaryn oqı otyryp salǵan týyndylaryn osy kitap-albomǵa jınaqtaǵan. Jobanyń ereksheligi – ádebı týyndyny qylqalam sheberiniń kózimen taný, kórnekti jazýshynyń ádebı shyǵarmalaryn kórkemsýret, keskindeme óneri arqyly pash etý. Osy joba negizinde oqyrman qolyna tıip otyrǵan jańa jınaq baspa isiniń sońǵy tehnologııasy negizinde sapaly daıyndalýymen kóz tartady. Sáken men Ilııas óleńderiniń, Bı-aǵanyń eskirmeıtin, ómirsheń áńgimeleriniń jelisimen salynǵan sýretterdiń mańyzy men mazmunynyń ár alýandyǵy arnaıy sóz etýge turatyn jeke taqyryp bolýǵa laıyq. Ábilhan Qasteev, Úki Ájıev, Salıhıtdın Aıtbaev, Qurmanǵazy Aqashev, Áýbákir Ismaıylov, Sergeı Kalmykov, Qanafııa Teljanov, Ámen Qaıdarov, Maǵaýııa Amanjolov, Kámil Shaıahmetov, Jańataı Shárdenov, Nıkolaı Hlýdov, Oral Tańsyqbaev, Nurbek Tańsyqbaev, Ǵalı Myrzashev, Jeńis Kákenuly, taǵy basqa belgili sýretshilerdiń týyndylary qalamger shyǵarmalarynyń mazmunyn tolyqtyra túsken.
Kitap-albom Halyqaralyq TÚRKSOI uıymynyń tapsyrysymen «Central Asia Production» kompanııasy tarapynan qazaq jáne orys tilderinde Germanııada basyldy. Nemis elinde ótken baspa ónimderi arasyndaǵy baıqaýda birinshi oryndy ıelengen osy kompanııanyń dırektory Berik Barysbekov kitapty jaryqqa shyǵarý jumysy týraly baıandap berdi. Muraǵattardy izdeý, arhıv, mýzeı materıaldaryn saralaý, tarıhı kórkemsýretterdi jańǵyrtý jáne aýdarma jumystaryn atalǵan kompanııa iske asyrǵan. Shara aıasynda Ulttyq kitaphananyń qorynan Ilııas Jansúgirovtiń tutas ómir jolymen tanystyratyn «Halyq ómiriniń qaharman jyrshysy» atty kitap kórmesi uıymdastyryldy.
ALMATY
