О́ńirdegi 1-4 aralyǵyndaǵy bastaýysh synyp oqýshylarynyń mektep ashanasynan tamaqtanýyn qamtamasyz etý úshin atalǵan jobanyń bastalǵanyn oblys ákimi Bolat Baqaýov mektepterdiń Qamqorshylyq keńes ókilderi, ata-analar, muǵalimdermen kezdesý barysynda jetkizdi.
– Bul kezdesýdi ótkizbes buryn ınstagram paraqshasyna mektepterge qatysty bir táýliktiń ishinde 350-den astam ótinish tústi. Ata-analar tarapynan mektep ashanasy jóninde suraq kóp. Barlyq pikirlerdi oqyp, ata-analarmen kezdesýdi uıǵardym, – dedi oblys ákimi Bolat Baqaýov.
Shaǵymdar men usynystar negizinen partalardy jańartý, kabınetterdiń terezelerin aýystyrý, jumys istemeı turǵan mektep basseınderin qalpyna keltirý jáne oqý oryndarynyń aýlalaryn abattandyrý sekildi máselelerdi qamtyǵan.
Al mektep ashanasyna qatysty máselege kelsek, jýyrda oblys ortalyǵyndaǵy Pavlodar aýylyndaǵy mektepte oqýshylar tamaqtan ýlanyp, aýrýhanaǵa túsken-di. Bul oqys jaǵdaı balalary mektepten tamaqtanatyn ata-analardyń alańdaýyna sebep boldy.
Bilim jáne ǵylym mınıstriniń 2017 jylǵy 27 shildedegi buıryǵy boıynsha Qamqorshylyq keńes jumysynyń jańa tártibi engizildi. Endi Qamqorshylyq keńestiń mekteptegi atqaratyn jumysy mańyzdy. Tamaqtaný balalardyń densaýlyǵyna tikeleı qatysty bolǵandyqtan, Qamqorshylyq keńesi mektep ashanasyndaǵy tamaq sapasyn qadaǵalaýǵa da quzyretti. Sondaı-aq mektepte tamaq sapasyn baqylaý boıynsha monıtorıng komıssııasy qurylýy tıis. Bul sharalardyń barlyǵy tamaq berýdi sapaly túrde uıymdastyrýǵa múmkindik beredi.
Oblystyq bilim berý basqarmasynyń ókilderi ótken oqý jylynan bastap óńirdegi mektepterde «Qazaq tamaqtaný akademııasy» men «Ulttyq salamatty taǵamtaný ortalyǵy» ázirlegen «Oqýshylardyń tamaqtaný rasıony boıynsha biryńǵaı standarttar» ádistemelik usynymdary boıynsha jumys istep jatqanyn aıtady.
Byltyr oblysta 7 myń bala 1-synypqa barsa, bıyl 14 myńǵa jetipti.
Jıyn barysynda oblys ortalyǵyndaǵy Ýsolka shaǵyn aýdanyndaǵy №42 orta mekteptiń ata-analary sóz alyp, bul aýdanǵa taǵy bir jańa mektep qajet ekenin aıtty. Shaǵyn aýdanda jyl saıyn kóp qabatty úıler salynyp, paıdalanýǵa berilýde, oqýshylar sany da kóbeıe túsken.
Taǵy bir másele, búkil qala mektepteriniń oqýshylary sómkelerin arqalap, sabaqqa qoǵamdyq kóliktermen qatynaıdy. Bul másele de Qamqorshylyq keńes múshelerinen qamqorlyq kútetin jaǵdaı. Qamqorshylyq keńes músheleriniń aıtýynsha, qala ishinde 15 jasqa tolmaǵan oqýshylar qoǵamdyq kólikterde 50 paıyz jeńildikti paıdalanýda. Qalǵan oqýshylar jolaqysyn tolyq tóleýge mindetti.
– Ýsolka shaǵyn aýdanynda oqýshy sany kóp ekeni belgili. Biraq endi mektep salatyn oryn joq. Sondyqtan jańa mektep basqa jerden salynady. Al jolaqy máselesine keletin bolsaq, qoǵamdyq kólikte 50 paıyz jeńildik qarastyrylatyn balalar jasyn 15 jastan ulǵaıtý qajet. Máseleni baqylaýǵa alamyz, – dedi B.Baqaýov.
Budan bólek, ata-analar aǵylshyn tili men qazaq tili pánderinen sabaq beretin muǵalimderge renishti. Ata-analar bul pánderden qosymsha repetıtor jaldaýda. Sondyqtan endi osy eki pánniń muǵalimderin attestasııadan ótkizý tapsyryldy. Qamqorshylyq keńes ókilderi bul jumysqa belsendi aralasyp, óz pikirlerin ashyq bildirmek.
Kezdesýde Aqsý qalasyndaǵy №7 mekteptiń qoǵamdyq keńes múshesi Andreı Rahmetov mektep aýlasyn abattandyrý qajettigin, Lenın kenti №32 mekteptiń Qamqorshylyq keńes múshesi Ýálıhan Nyǵmanov mektep aınalasyn qorshaýǵa kómek surady. О́ńir basshysy mekteptiń aınalasyn qorshaǵannan góri, aýmaǵyn abattandyryp, beıne-baqylaý qurylǵylaryn ornatýdy usyndy.
Qaladaǵy №35 mekteptiń Qamqorshylyq keńes múshesi Maıgúl Imanqulova mekteptegi ashanaǵa shaǵym bildirdi. Kóp balaly ana S.Sharapıeva mektep jasyndaǵy 3 balasynyń ystyq tamaǵyna kúnine 900 teńge tóleıtinin aıtyp, kómek surady.
Sondaı-aq Ýspen aýdanyndaǵy №2 mekteptiń ata-analary da ashana baǵasyna renishti. Az qamtylǵan jáne kóp balaly otbasylardan shyqqan balalar 350 teńgege tamaqtansa, aqyly negizde tamaq ishetinder asqa kúndelikti 500 teńge tóleýge mindetti.
Al kerisinshe Aqqýly, Sharbaqty aýdandarynda 1-4-synyp oqýshylary jergilikti demeýshiler qoldaýymen tegin tamaqtanady.
Oblys ortalyǵyndaǵy №19 mekteptiń ata-analary mektep mańyndaǵy qaptaǵan kólikterdi retke keltirýdi surady. Mektep «Halyqqa qyzmet kórsetý ortalyǵynyń» janynda ornalasqan. Kólikter keptelisi qatar ornalasqan №29, №36 mekteptiń oqýshylaryna da bóget keltirýde. Sondaı-aq №41 mekteptiń ata-analary baǵdarsham ornatýdy surady. Qaladaǵy №23, №16 balabaqshalar kúrdeli jóndeýdi qajet etedi.
Kelesi kezek ekibastuzdyq ata-analarǵa tıdi. Olar qaladaǵy №13 mekteptiń ata-analary mektep aýlasyn jaryqtandyrýdy, sonymen birge ózderimen birge bir ǵımaratta otyratyn №35 mekteptiń bolýy saldarynan kabınet sany jetkiliksizdigin, partalar tym eskirgenin, deneshynyqtyrý sabaǵynda bir ýaqytta 2-3-synyp daıyndalýǵa májbúr bolyp otyrǵanyn jetkizdi. Al №36 mekteptiń ata-analary oqýshylardyń kıim ilýine arnalǵan shkafqa bıýdjetten qarjy bólýdi surady.
– Mektepterdi shkafpen qamtý maqsatynda 100 mıllıon teńge bóldik. Qazirgi ýaqytta baıqaý jarııalandy. Osy qarjyǵa óńirdegi 3 mekteptiń shkafqa qajettilik máselesi sheshilmek, – dedi B.Baqaýov.
Kezdesýde jergilikti ata-analar tarapynan túsken barlyq saýaldy tyńdaǵan Bolat Baqaýov jaýapty oryndarǵa naqty tapsyrmalar berdi.
Oblys ákimi kezdesýge kelgen ata-analar tarapynan óńirdiń, oblys ortalyǵynyń bilim salasyna qatysty kóptegen máselelerin tyńdap, qaladaǵy №19, №35 mektepterdi jáne kúrdeli jóndeýdi qajet etetin balabaqshalardy aralap kórdi.
Sonymen birge kezdesý barysynda oblys ákimi Abaı atyndaǵy №10 qazaq mektep-lıseıiniń ashanasyna kirip, tamaqtanǵanyn da aıtyp ótti.
– Mektep ashanasyndaǵy habarlandyrýlar ózge tilde jazylǵan eken. Ekinshiden, as mázirinde bálish, toqash baǵalary joǵary. Qamqorshylyq keńes músheleri qaıda qarap otyr? Ashana sóresinde shokolad pen tátti sýsyndar da bar. Olaı bolsa, ata-analarmen birlesip, tamaq sapasyn baqylaý qajet-aq, – dedi B.Baqaýov.
Oblys ákimi ata-analarmen kezdesýde mektep ashanasyndaǵy tamaqtyń sapasyna Qamqorshylyq keńes ókilderi jaýapty ekenin atap ótti. Oblystyq bilim berý basqarmasynyń basshysy Dinıslam Bolathanulyna mektep ashanasyn bir jylǵa jalǵa bermeı, arendalyq shartta 3-5 jylǵa deıin uzartýdy usyndy.
Suraq ta, másele de az emes. Osy kezdesýden soń mektep ashanasy, aýlasy, basqa da kóptegen sharýashylyq máseleleri qalalyq, oblystyq bilim berý salasynyń basshylarynyń, mektep dırektorlarynyń, Qamqorshylyq keńes ókilderiniń nazarynan nege tys qalǵan degen oı keledi.
Pavlodar oblysy
